काठमाडौं । निर्माणकार्य अघि बढेको करिब पाँच वर्ष बितिसक्दा पनि उस्तै छ जोरपाटी–सुन्दरीजल सडकखण्ड । स्थानीय, पैदलयात्रु, सवारीचालक, सर्वसाधारणले धुलोधुवाँ र हिलाम्य सडकको सास्ती खेप्दै आएका छन् ।

शनिबार बिहान बेसीगाउँका किरण बराल सडकमा पानी छर्कंदै थिए । ‘‘अब त सडक पिच हुने आशा मरिसक्यो । अलि–अलि धुलोधुवाँ कम हुन्छ कि भनेर पानी छर्कंदै छु । धुलोधुवाँले बसिनसक्नु छ यो क्षेत्र । पसलमा बिक्री–वितरण गर्न राखिएका अधिकांश सामानहरू धुलोधुवाँले बिग्रने गरेको छ,” बरालले भने, ‘‘धुलोधुवाँले अहिले बाटो नै देखिँदैन । धुलोधुवाँकै कारण स्थानीयको स्वास्थ्यमा पनि गम्भीर असर परिरहेको छ ।”

नेपाल मेडिकल कलेज शिक्षण अस्पताल जाने सुत्केरी, बिरामी, चिकित्सक, नर्स, कर्मचारी, सर्वसाधारणले यसको सास्ती खेपिरहेका छन् । पर्यटकीय क्षेत्र सुन्दरीजल घुम्न जाने आन्तरिक तथा बाह्य पर्यटकहरूले पनि धुलोधुवाँको सास्ती खेपिरहेका छन् ।

सडक विस्तारमा भएको ढिलासुस्तीविरुद्ध स्थानीयले पटक–पटक सडक अवरुद्ध गर्दै आएका छन् । शनिबार निर्माण कम्पनीले गोकर्णेश्वर नगरपालिका कार्यालयनजिकै सडकछेवैमा रहेको रुख काट्न मुख्य सडक अवरुद्ध गर्‍यो । सडक अवरुद्ध हुँदा एउटा मोटरसाइकल गल्लीबाट छिर्ने क्रममा भित्तामा ठोक्किएर दुर्घटना भयो । मोटरसाइकल चालक सामान्य घाइते भए ।

त्यस्तै, नेपाल मेडिकल कलेजभित्रको सडकबाट सार्वजनिक गाडीहरू गुडे । जोरपाटी निस्कने सडक एकदमै अप्ठ्यारो छ । जोरपाटी निस्कनै लाग्दा एउटा बस ओरालोमा फस्यो । उक्त बस फसेको ठाउँबाट निकाल्नै करिब पाँच घण्टा लाग्यो ।

नगरपालिकाले मुआब्जा विवाद मिलाएर गएको वैशाखमा सडक पिच गरिने आश्वासन दिएको थियो । निर्माण कम्पनीले सडक पिच गर्न गिट्टीलगायत निर्माण सामग्री पनि बिछ्यायो । तर, भनेको समयमा सडक पिच गर्न सकेन ।

अर्कातर्फ, फुटपाथ नहुँदा पैदलयात्रुहरू बीच सडकमै हिँड्न बाध्य छन् ।

गोकर्णेश्वर नगरपालिका र निर्माण कम्पनी आशिष र सीएम जेभीबीच ०७३ सालमा सो सडकखण्ड निर्माणसम्बन्धी सम्झौता भएको थियो । सम्झौताबमोजिम ०७५ असोजमा काम सकाउनुपर्ने थियो ।

सात किलोमिटर सडक विस्तार र निर्माणका लागि ५४ करोड रुपैयाँमा सम्झौता भएको थियो । सडकको बीचबाट ११–११ मिटर चौडा बनाउनुपर्ने थियो । लामो समय नगरपालिकाले मुआब्जा विवाद मिलाउन नसक्दा सडक पिच हुन सकेन  ।

गोकर्णेश्वर नगरपालिकाले सडक विस्तार गर्दा नै स्थानीयले पटक–पटक अवरोध गर्दा र मुआब्जा मिलाउन नसक्दा समयमै सडक पिच गर्न नसकिएको जनाएको छ । ‘‘सडक निर्माणमा पटक–पटक स्थानीयले अवरोध गरिरहे । पटक–पटक अवरोधपछि निर्माण कम्पनीले काम गर्न मानेन,” गोकर्णेश्वर नगरपालिकाका प्रवक्ता मनोजकुमार ढुंगानाले भने ।

नगरपालिकाले मुआब्जाको विवाद मिलिसकेकाले अब छिट्टै सडक पिच हुने जनाएको छ । निर्माण कम्पनीले पनि सबै समस्या समाधान भइसकेकाले सडक विस्तारको कामले गति लिएको जनाएको छ ।

चाबहिल–जोरपाटी–सुन्दरीजल–साँखु सडक आयोजनाका सूचना अधिकारी अशोककुमार यादवले आउँदो तीन महिनाभित्र यो सडक पिच गरिसक्ने बताए । ‘‘वैशाखमै मुआब्जा विवाद मिलिसकेको थियो । त्यस बेला पिच गर्ने भन्दाभन्दै वर्षायाम सुरु भयो । वर्षा भइरहेको बेला पिच गर्ने कुरा भएन । अब वर्षायाम सकिएसँगै सडक निर्माणको काम अघि बढिरहेको छ,” प्रवक्ता यादवले भने ।

सडक क्षेत्रमा परेका पोल सार्ने, ढल हाल्ने, घर भत्काउनेलगायत काम सकिइसकेको नगरपालिकाले जनाएको छ । अहिले नगरपालिकाअगाडिको सडक क्षेत्रमा परेको रुख काटेर सडक चौडा गर्ने काम भइरहेको छ ।