काठमाडौं । इजरायलमा रहेका नेपालीलाई त्यहाँको नेसनल इमर्जेन्सी पोर्टलबाट अध्यावधिक स्थानीय सुरक्षा प्रोटोकलबारे जानकार रहन अनुरोध गरिएको छ ।

इजरायलस्थित नेपाली दूतावासले विज्ञप्ति जारी गर्दै त्यहाँ पछिल्लो समय विकसित परिस्थितिलाई मध्यनजर गर्दै यस्तो अनुरोध गरेको हो । जुनसुकै बेला इजरायली होम फ्रन्ट कमाण्डद्वारा सर्वसाधारणका लागि नयाँ निर्देशनहरू जारी हुन सक्ने भन्दै प्रोटोकलबारे जानकार रहन भनिएको हो ।

उक्त प्रोटोकलहरू पालना गर्न र आफ्नो सुरक्षातर्फ विशेष ध्यान दिन एवं सुरक्षित आश्रयस्थलको सुविधा भएको स्थलको आसपासमै रहन समेत दूतावासले अनुरोध गरेको छ ।

साथै, दूतावासको वेबसाइटमा रहेको फाराम भर्न छुटेका इजराइलमा रहेका नेपाली नागरिकहरूले आफ्नो विवरण अनिवार्य रूपमा भर्न समेत अनुरोध गरिएको छ ।  

हमासले अक्टोबर ७ मा दक्षिणी इजरायलमा गरेको आक्रमणले युद्ध सुरु भएको थियो । आक्रमणमा अधिकांश सर्वसाधारणसहित एक हजार १९७ व्यक्तिको मृत्यु भएको थियो ।

आक्रमणका क्रममा हमासका लडाकुहरूले २५१ बन्धकलाई पनि कब्जामा लिएका छन् । यसमध्ये १११ अझै पनि गाजामा बन्धक छन् र ३९ जना मारिएका छन् । हमासविरुद्ध इजरायलको प्रतिशोध अभियानमा गाजामा कम्तीमा ३९ हजार ४८० को मृत्यु भएको छ ।