काठमाडौं । चालु आर्थिक वर्ष २०८०/०८१ को सात महिनामा ६ हजार १५९ वटा विद्युतीय गाडी (ईभी) नेपाल भित्रिएका छन् ।

गत वर्षको यसै अवधिमा दुई हजार ९ वटा विद्युतीय जीप, कार तथा भ्यान आयात भएको थियो । गत वर्षको तुलनामा यसवर्ष तीन गुणा बढी ईभी आयात भएका छन् ।

भन्सार विभागको तथ्यांकअनुसार चालु आर्थिक वर्षको माघ महिनासम्म १५ अर्ब चार करोड रुपैयाँ बराबरका ईभी नेपाल भित्रिएका हुन् । यसबाट सरकारले ६ अर्ब ६२ करोड रुपैयाँ राजस्व संकलन गरेको छ ।

यस अवधिमा सबैभन्दा बढी ५० देखि एकसय किलोवाट क्षमताका तीन हजार ३९४ विद्युतीय जीप, कार तथा भ्यान आयात भएका छन् ।

यस्तै, शून्यदेखि ५० किलोवाट क्षमताका दुई हजार ६७७ विद्युतीय गाडी आयात भएका छन् ।