जनकपुर । रौतहटमा एक जना पुजारीलाई गोली हानी हत्या गरिएको छ । बुधबार राति माधवनारायण नगरपालिका –२, खेसरहियास्थित हनुमान मन्दिरका पुजारी श्रीराम साहलाई अज्ञात समूहले गोली हानी हत्या गरेको प्रहरीले जनाएको छ । 

राति करिब सावा ९ बजे खाना खाइरहेको बेला पुजारी साहलाई एक व्यक्तिले गोली हानेपछि घटनास्थलमै मृत्यु भएको इलाका प्रहरी कार्यालय गरुडाका इन्चार्ज डीएसपी ज्ञानकुमार महतोले जानकारी दिए । 

अहिलेसम्म हत्याको कारण पत्ता नलागेको बताउँदै डिएसपी महतोले बिहीबार बिहानै अपराध अनुसन्धानमा सघाउने कुकुर सहित विशेषज्ञ टोली बोलाइएको जनाए । 

“हत्यारालाई त जसरी पनि पक्राउ गरिन्छ” महतोले भने, “घटनावारे जानकारी प्राप्त भएदेखि हाम्रो टोली निरन्तर सक्रिय छ ।”  एउटा हत्या घटनामा संलग्न अपराधीलाई कानुनी दायरामा ल्याउन नपाउँदै अर्को हत्या घटनाले जिल्लाको सुरक्षा अवस्थामा चुनौति थपिएको छ । 

रौतहटमा एक हप्ता अगाडि २२ वर्षीय एक युवकको घाँटी रेटेर हत्या गरिएको थियो । गत आइतबार गरुडा नगरपालिका –८, जिंगडिया टोल बस्ने निरञ्जन रामलाई घाँटी रेटेर हत्या गरी फालिएको अवस्थामा भेटेको थियो ।  गाउँदेखि करिब तीन सय मिटरको दुरीमा हत्या गरि शव फालिएको उक्त घटनामा संलग्न अपराधीको पहिचान भइसकेको र एकदुई दिनभित्रै नियन्त्रणमा लिएर सार्वजनिक गर्ने महतोले बताए ।