काठमाडौं । ०७९ को निर्वाचनबाट उदाएका जनमत र नागरिक उन्मुक्ति पार्टी (नाउपा) एकताको सहमतिनजिक पुगेका छन् । केही समययता एकताका लागि छलफल गरिरहेका दुई दलले सहमतिको मस्यौदा तयार गर्न कार्यदल नै बनाएका छन् ।

रेशम चौधरी संरक्षक र रञ्जीता श्रेष्ठ चौधरी अध्यक्ष रहेको नाउपा र डा. चन्द्रकान्त (सीके) राउत अध्यक्ष रहेको जनमत पार्टीले पनि कार्यदल गठन गरहेका हुन् । यसै सन्दर्भमा नाउपाका अध्यक्ष श्रेष्ठसँग बाह्रखरीका कुञ्जरमणि भट्टराईले गरेको संक्षिप्त कुराकानी :

जनमत पार्टीसँग एकताको सहमति नजिक पुग्नुभएको हो ?
शुक्रबार र शनिबार हाम्रो केन्द्रीय समिति बैठक बसेको थियो । बैठकले पार्टी एकता गर्ने निर्णय गरेको छ । जसका लागि कार्यदल पनि गठन गरेका छौँ । माननीय गंगाराम चौधरीको संयोजकत्वमा उपाध्यक्ष सुनिता चौधरी र टीकापुर नगरपालिकाका मेयर रामलाल डगौराथारुको सदस्यतामा हुनुहुन्छ । त्यो कार्यदल र जनमत पार्टीको कार्यदलको बैठक सम्भवतः सोमबार बस्छ होला, र केही कुरा आउँला ।   

०७९ को निर्वाचनबाट उदाएको दुवै पार्टी एकता गर्नुपर्छ भन्ने निर्णयमा चाहिँ कसरी पुग्नुभयो ?
जनमत पार्टी मधेसबाटै उदयमान भएन आयो, हाम्रो पश्चिमबाट उदय भएर आएको पार्टी । हाम्रो विधानमा नै कुनै पनि सिद्धान्त, विचार मिल्ने एकताबद्ध भएर जानुपर्छ भन्ने छ । हाम्रो मुद्दा, सबै मिल्ने भएर हो ।

हाम्रो संरक्षकले पनि भेटघाटका क्रममा एकता गरेर जानुपर्छ कुरा राख्दै आउनुभएको थियो । धेरैअघि सीके राउतजीले पनि बैठकमा एक हौँ भन्नुभएकै थियो । एक वर्षअघि नै कार्यगत एकता पनि गरेका थियौंँ । अहिले त्यसको प्रतिफल पनि हो ।

नयाँ पार्टीको अध्यक्ष को बन्नुहुन्छ ? चुनाव चिह्न लगायतका विषयमा सहमति जुटिसकेको हो ?
संयुक्त बसेर छलफल गर्दा सहमतिमा नै जाने कुरा भएको छ । पार्टीको नेतृत्व, चुनाव चिह्न, त्यसमा कुनै विवाद होला जस्तो लाग्दैन । नयाँ बन्ने पार्टीको संरक्षकमा रेशम चौधरीजी, अध्यक्षमा सीके राउतजी र सह–म रहने भन्ने कुरा पनि आएको छ । एकता गर्ने कुरा भयो । त्यसमा छलफल भइसकेको छैन । अहिले जे छ त्यो नहुन पनि सक्छ । समय अझै छ । छलफलपछि नै कसरी जाने भन्ने टुंगिन्छ ।

एकता कहिले गर्ने भन्ने कुरा भएको छ ?
यही समय भनेर मिति तोकेका छैनौँ । कार्यदलको बैठक बसोस्, छलफल होस् । उहाँहरूले एउटा निक्र्यौल निकाल्नुहुन्छ नि । त्यसपछि निर्णय भइहाल्छ । हामी सकारात्मक नै छौँ ।

डा. बाबुराम भट्टराई नेतृत्वको नेपाल समाजवादी पार्टी (नेसपा) पनि एकताको छलफलमा हुनुहुन्छ भन्ने सुनिन्छ नि !
हामी दुई पार्टी (जनमत र नाउपा) एक भएर जाँदा सकारात्मक प्रतिक्रिया दिइरहनुभएको छ । शुशेच्छा व्यक्त गर्नुभएको हो, खुसी हुनुभएको हो । उहाँ पनि आउने भन्ने त्यस्तो कुरा भएको छैन ।