हङकङ । हङकङमा जारी आन्दोलनको चपेटामा चर्चित विमान कम्पनी क्याथे प्यासिफिक समेत परेको छ । सोही आन्दोलनकै कारण क्याथे प्यासिफिकका सीईओ र कमर्सियल अफिसरले जागिरबाटै हात धुनु परेको छ ।  सो एयरलाइन्सका कर्मचारीको आन्दोलनमा सहभागितालाई लिएर चीनले कडा दबाब दिएको थियो । सीईओ रुपर्ट होगले गएको शुक्रबार राजीनामा दिएकोमा उनको राजीनामा भोलि सोमबारदेखि लागु हुनेगरी स्वीकृत भएको छ । 

उनका सहयोगी रहेका पाउल लूले पनि आफ्नो जागिर छोडेका छन् । कम्पनीका अध्यक्ष जोहन स्लोसरले हालैका गतिविधिले गर्दा क्याथे प्यासिफिकको उडान सुरक्षाका सम्बन्धमा रहेको ख्यातिमाथि दबाब परेको जनाएका छन् ।  उनले नयाँ व्यवस्थापनमार्फत् यसलाई पहिलाकै आत्मविश्वासका साथ अघि बढाउने समेत जनाएका छन् । होगले क्याथे प्यासिफिकको नेतृत्व दुई वर्षसम्म गर्न पाउनु आफ्नो लागि सम्मानको विषय भएको जनाएका छन् । 

तर पछिल्ला दिन कम्पनीकालागि चुनौतिपूर्ण रहेको र आफू र पाउलले त्यसको जिम्बेवारी लिने समेत बताएका छन् । आन्दोलनमा सामेल भएको भन्दै केही अघि सो एयरलाइन्सले दुई जना पाइलटलाई पनि कारवाही गरेको थियो ।  (एजेन्सी)