काठमाडौं । त्रिभुवन राजपथअन्तर्गत धादिङको झ्याप्लेखोलामा अवरुद्ध सडक खुलेपछि राजमार्गमा अलपत्र सवारीसाधन काठमाडौं उपत्यका भित्रिएका छन् ।

गृह मन्त्रालयका प्रवक्ता ऋषिराम तिवारीले आइतबार साझँदेखि झ्याप्लेमा अवरुद्ध सडक खुलेयता अलपत्र यात्रुसहित लिएर सवारीसाधन काठमाडौं भित्रिएको बताए । राजमार्गमा अलपत्र एक हजार ७०७ सवारीसाधन काठमाडौं उपत्यका भित्रिएका हुन् ।

त्यसैगरी सोमबार दिउँसोपछि काठमाडौंबाट पनि सो राजमार्ग भएर सवारीसाधन पठाउने तयारीमा प्रहरी खटिएको प्रवक्ता तिवारीले जानकारी दिए ।

“आजबाट उपत्यकाबाट पनि नागढुंगा–नौबिसे हुँदै सवारीसाधन बाहिरिने छन्” उनले भने, “मुख्य राजमार्गका साथै अन्य अवरुद्ध सडक सञ्चालनका लागि गृह मन्त्रालयले अन्य निकायसँग समन्वय गरेर अघि बढेको छ ।”

सोमबार दिउँसो गृह मन्त्रालयमा केन्द्रीय सुरक्षा समितिको बैठक समेत गृहमन्त्री रमेश लेखकले डाकेका थिए । बैठकमा सुरक्षा निकायका प्रमुखहरूले बाढी, पहिरो, डुबान तथा विपद्मा भइरहेको उद्धार, राहत, घाइतेको उपचार र अवरुद्ध सडक खुलाउने विषयमा छलफल भएको जानकारी गराएका छन् ।

“आज साझँसम्म बीपी राजमार्गअन्तर्गत रोशी खोलामा अलपत्र परेका सबै यात्रुहरूको उद्धार भइसक्छ ।” प्रवक्ता तिवारीले भने, “त्यहाँ नेपाली सेनासहित सुरक्षाकर्मीको टोली हवाई उद्धारदेखि डोरीको सहायताबाट समेत अलपत्र यात्रुहरूको उद्धार निरन्तर गरिरहेको छ ।”

प्रवक्ता तिवारीले मौसम पूर्ण रूपमा सामान्य बनिनसकेको अवस्था रहेकाले यात्रा गर्दा सावधानी अपनाउनुपर्नेमा जोड दिए । “विस्तारै सडक खुल्ने र खुलाउनेक्रममा छ ।” उनले भने, “अझै पहिरोलगायत जोखिम टरिसकेको छैन् ।”

अवरुद्ध सडक सुचारु गर्न सरोकारवाला निकायका साथै देशका विभिन्न स्थानमा सुरक्षाकर्मीको टोली समेत परिचालन भएको छ ।

“रोशी लगायत प्रभावित क्षेत्रमा स्वास्थ्य शिविर सञ्चालन गर्नुका साथै राहत वितरण पनि हुँदैछ,” प्रवक्ता तिवारीले भने, “घाइतेहरूको उद्धार गरी विभिन्न अस्पतालमा निःशुल्क उपचार भइरहेको छ ।”