काठमाडौं । समीर केसी (नाम परिवर्तत) युवा व्यवसायी हुन् । उनको भेट इटहरीकी सुष्मा विकसँग भयो । सुष्मासँग समीरको भेट सामाजिक सञ्जालमार्फत भएको हो, करिब दुई वर्षअघि ।

सामाजिक सञ्जालमार्फत भएको चिनजान प्रत्यक्ष भेटघाट हुँदै विस्तारै प्रेम सम्बन्धसम्म पुग्यो । समीरलाई लागेको थियो, सुष्माले मनबाट नै आफूलाई प्रेम गरिरहेकी छन् ।

व्यवसायबाट केही फुर्सद हुँदा समीर सुष्मालाई लिएर काठमाडौंका विभिन्न ठाउँमा गएर समय बिताउँथे । गएको सोमबार पनि सुष्माले समीरलाई भेट्न ललितपुरको भैँसेपाटीमा बोलाइन् ।

समीर सुष्मालाई भेट्न आफ्नो गाडीमा भैँसेपाटी पुगे । सुष्माको आग्रहमा समीर यसअघि पनि पटक–पटक उनलाई भेट्न गएका थिए । समीरलाई लागेको थियो, योपटक पनि त्यसैको निरन्तरता होला ।

तर, प्रेमिका भेट्न भैँसेपाटी पुगेका समीरको होसहवास त्यति बेला उड्यो, जब उनी प्रहरीको थुनामा जानुपर्‍यो । सुष्मालाई भेट्नासाथ उनकै छेउमा बसेका प्रहरीले समीरलाई प्रहरी कार्यालय पुर्‍याए ।

प्रहरीसामु समीरलाई सुष्माले भनिन्– मैले यहाँ बलात्कारको उजुरी दिएकी छु, त्यही भएर बोलाएकी हुँ । अब के गर्नुहुन्छ ?

समीर आकाशबाट एक्कासि धर्तीमा बजारिएजस्तै भए ।

सुष्मासँग विभिन्न ठाउँ घुमेका कारण उनी आफू बलात्कार आरोपमा फस्ने भयमा थिए । उनले सुष्मालाई आग्रह गरे– किन यस्तो गरेको ? बरु, मैले के गर्नुपर्छ गर्छु । प्लिज, यस्तो नगर – मेरो लाइफ डामाडोल हुन्छ ।

सुष्मा र समीरबीचको संवाद प्रहरी प्रभाग भैँसेपाटीकी प्रमुख एवं प्रहरी निरीक्षक (इन्स्पेक्टर) बिनुकुमारी शाहीले सुनिरहेकी थिइन् ।

समीरको गुनासोपछि सुष्माले भनिन्– ‘ल भन न त तिमी आफैँ, मैले उजुरी दिइसकेँ, अब के गर्ने ?

समीरले भने– कसरी हुन्छ सेटल गरौँ । उजुरी फिर्ता लिऊ, म तिम्रो लागि के गर्नुपर्छ गर्छु ।

प्रभागका प्रहरी प्रमुखको अगाडि भएको संवादपछि समीरले सुष्मालाई आर्थिक सहयोग गर्ने बताए । सुष्माले त्यसका निम्ति ६० लाख रुपैयाँ ‘डिमान्ड’ गरिन् ।

‘बार्गेनिङ’पछि समीर ३० लाख रुपैयाँ दिन मन्जुर भए । समीरले सुष्माको साथीको खातामा २० लाख रुपैयाँ ‘डिपोजिट’ गरिदिए । अर्को १० लाखको चेक समेत सुष्मालाई थमाइदिएपछि मात्र उनी प्रहरीको पन्जाबाट बाहिर निस्किए ।

कार्यालय परिसरमा पार्किङ गरिएको समीरको गाडी निकाल्न समेत प्रहरीले पैसा मागे । एक लाख ५० हजार रुपैयाँ प्रहरीलाई बुझाएर उनले गाडी बाहिर निकाले ।

‘हनी ट्रयापिङ’को समूहमा इन्स्पेक्टर समेत
भैँसेपाटी प्रहरी कार्यालयभित्र लगेर बलात्कारको उजुरी भन्दै पैसाको बार्गेनिङ हुन थालेपछि समीरले आफू ‘हनी ट्रयापिङ’मा परेको निष्कर्ष निकालिसकेका थिए । उनलाई त्यहाँबाट जसरी पनि उम्किनु थियो ।

त्यसैले उनी सुष्माले भनेबमोजिम पैसा दिन सहमत भए । पैसा दिएपछि भने साथीमार्फत उनले घटनाबारे जिल्ला प्रहरी परिसर ललितपुरलाई जानकारी गराए । लगत्तै परिसरको टोलीले सुष्मा र उनको केटा साथी ताज स्लामलाई ललितपुर प्रहरी कार्यालयमा बोलायो ।

उनीहरू दुवैजनामाथि सोधपुछ गर्दा हनी ट्रयापिङको खुलासा भयो । त्यसपछि दुवैजनालाई प्रहरीले थुनामा राखेर अनुसन्धान अगाडि बढाएको छ । उनीहरूमाथि प्रहरीले आपराधिक लाभ कसुरमा अनुसन्धान अघि बढाएको हो ।

प्रहरीले प्रहरी प्रभाग भैँसेपाटीकी प्रमुख एवं इन्स्पेक्टर शाहीमाथि समेत छानबिन थालेको छ । उनलाई जिम्मेवारीबाट हटाएर ललितपुर प्रहरीका डीएसपी नरहरि अधिकारीको नेतृत्वमा छानबिन सुरु गरिएको हो ।

शाहीलाई निलम्बन गरेर अनुसन्धान गर्न उपत्यका प्रहरी कार्यालयलाई सिफारिस गरिएको जिल्ला प्रहरी परिसर ललितपुरका प्रमुख एवं एसएसपी शेखर खनालले जानकारी दिए । निलम्बनका निम्ति प्रहरी प्रधान कार्यालयले गृह मन्त्रालयमा पत्राचार गर्नुपर्ने हुन्छ ।

सुष्माले केही युवासँग मिलेर समीरलाई हनी ट्रयापमा फसाएर रकम लिने योजना बनाएको प्रहरीको प्रारम्भिक अनुसन्धानका क्रममा खुलेको छ । उक्त हनी ट्रयाप समूहमा जोडिएका एकजना अझै फरार रहेका प्रहरीले जनाएको छ ।