सिड्नी । अष्ट्रेलियास्थित सिड्नीको प्रतिष्ठित भेन्युका रूपमा चिनिएको आईसीसीमा शनिबार अबेर रातिसम्म नेपाली झन्डा र ‘यो मन त मेरो नेपाली हो’ गीतले गुन्जायमान भयो । करिब ४५ सय सिड्नीबासी नेपाली चन्द्रसूर्य अंकित झन्डाले भरिभराउ थिए । आईसीसीमा नेपाली सांगीतिक समूह १९७४ एडीको ‘यो मन त मेरो नेपाली हो’, ‘गुराँसै फुल्यो’, ‘छुँदैन तिम्रो मायाले’, ‘सम्बोधन’जस्ता कर्णप्रिय आवाजले दर्शकलाई झन्डै मध्यरातसम्म जुरुक्कै पारेको थियो । 

नेपाली सांगीतिक समूह १९७४ एडी आफ्नो ३०औँ वर्षगाँठ मनाउने क्रममा सिड्नी आइपुगेका थिए । लामो समयपछि पुनः एकतामा बाँधिएको ब्यान्डले आफ्ना नयाँ पुराना गरी करिब डेढ दर्जन गीत पस्केको थियो । यो सांगीतिक समूहले आफ्नो तीन दशक यात्रालाई भव्य र सभ्य मनाउने क्रममा विश्वव्यापी भ्रमणको दौरान अमेरिकाबाट सुरु गरेर अस्ट्रेलिया रोजेको हो । 

गत मे र जुनमा अमेरिकाबाट सुरू भएको ब्यान्डको यात्रा शनिबार अस्ट्रेलियामा समापन गरेको हो । सिड्नीको दर्शक र माया देखेर भक्कानिएको एड्रियन प्रधानले विभिन्न आरोह र अवरोहपछि ३० वर्षको आफ्नो यात्रामा सिड्नीको उपस्थिति र मायाभाव कहिले नभुल्ने बताए । “हाम्रा गीत सुनेर संगीतसँग जीवन जोडिएका प्रशंसकको यस्तो माया र साथले हामी नतमस्तक भएका छौँ,” प्रधानले सुनाए । 

ब्यान्डका मेन भोकलिष्ट फिरोज स्याङ्देनले दर्शक स्रोताको माया र स्नेहसँगै आफूहरूले मञ्चलाई भरपुर सदुपयोग गरेको बताए । यो आफनो समूहको अविष्मरणीय क्षणका रूपमा रहेको समेत उल्लेख गरे ।  

कुनै पनि नेपाली ब्यान्डले आईसीसीमा प्रस्तुति दिएको यो पहिलोपटक हो । ब्यान्डका सदस्यहरू संजय श्रेष्ठ, मनोज केसी र निराकर याकथुम्बाले नेपाल र विश्वभर फैलिएका नेपाली स्रोतामाझ संगीत क्षेत्रमा पहिचान बनाउन पाउनु सफलताको विषय भएको बताए । 

चिनिएको नाम र ब्यान्ड हो– १९७४ एडी । केही समय छुट्टिएर पुनः एकाकार भएको यो समूहको गीत संगीतप्रतिको लगाव र लोकप्रियता थप चुलिएको छ । करिब एक दशकअघि मुख्य गायक फिरोज स्याङ्देन अचानक अमेरिका जानु र लगत्तै अर्का गायक एड्रियन प्रधान समेत अनुपस्थित भएपछि ब्यान्डका प्रशंसकहरू निराश भएका थिए ।  गीत गाउने दुवै गायक साथमा नभएपछि ब्यान्डमा केही खल्लोपन देखिएको थियो । फिरोज र एड्रियन गायक मात्र नभई सर्जक पनि थिए । सन् २०१९ मा समूहका पाँचैजना पुराना सदस्य फिरोज, एड्रियन, निराकार याक्थुम्बा, मनोज केसी र सञ्जय श्रेष्ठ फेरि ब्यान्डमा सामेल भएपछि यसले पुर्नताजगी पाएको थियो ।

आयोजक रोटेपिङ इन्टरटेन्टमेन्टका रोशन भट्टराईले आफूहरूले पहिलोपटक सिड्नीको आईसीसीमा कार्यक्रम आयोजना गरेको र यो पूर्ण रूपमा सफल भएको बताए । “कुनै पनि नेपाली ब्यान्डले यो भेन्युमा कार्यक्रम गरेको पहिलोपटक हो । करिब पाँच हजार दर्शक क्षमताको उक्त हल पूरै भरिनु हाम्रो र नेपाली गीत संगीतको लागि खुसीको कुरा हो,” उनले भने ।