काठमाडौं । अन्तर्राष्ट्रिय मित्रता दिवस २०२४ अवसरमा सार्वजनिक भएको एक सजीव नयाँ गीत हो ‘साथी’ । यो गीतले साँचो मित्रताको मर्म र आफ्ना मित्रहरूले प्रदान गर्ने अविचलित समर्थनलाई चित्रण गरेको जनाइएको छ ।

“यो गीत ती मित्रहरूलाई समर्पित गरिएका हो, जो हाम्रा सुख–दुःखमा साथमा उभिन्छन्, सान्त्वना र आनन्द प्रदान गर्दछन्,” यस गीतका गायक तथा गीतकार मुकेश प्रधान भन्छन् ।

गीतका शब्दहरू मित्रताको गहिरो सम्बन्धलाई सुन्दर रूपमा व्यक्त गर्दै सुरु हुन्छन् 

“सुन्य सुन्य भएको बेला, सारा संसार हारेको बेला
सम्झिने मान्छे मै त हो तिम्रो
कुरा तिम्रो दिन रात सुनेनी, सारा समय सँगै भएनी
नथाक्ने मान्छे मै त हो तिम्रो”

यो गीतले सबैलाई जोड्न सक्दछ । साथ अनि साथीको अनुभूति गराउन सक्दछ । सधैं सँगै हुँदा, हरदम कुराकानी भैरहँदा पनि, भेट्ने अनि बोलि सुन्ने चाह नघट्ने र साथ दिन नथाक्ने साथीको चित्रण गरेको पाइन्छ । 
“हिजो आज तिमी छौ कता
सम्झनाले सताउँछ मलाई यता 
ठिकै त होलौनी तिमी पनि
मुस्कान आजै तिम्रो उस्तै होला 
रहर मेरो कति हो कति, तिमीलाई भेट्ने समुन्द्र जति
सबै नाता टादिएको बेला, आशाहरु मरेको बेला
सम्झिने मान्छे मै त हो तिम्रो”

आज त्यो साथी सँगै नहोला, उसको साथले छरेका उर्जा जीवनमा सँधै रहिरहने र त्यो मुस्कान अनि खुसीमा कसैको नजर नलागोस् भन्ने भाव गीतले व्यक्त गरेको छ ।
साथै, साथी जहाँ भए पनि, जीवनमा भएका सानो आशाको किरण निभे पनि, सबै नाता अनि सम्बन्धहरुले साथ छोडे पनि अन्तिम घडीसम्म साथ हुने साथीको खुबै मर्मश्पर्षी बखान गीतले गरेको छ ।