काठमाडौं । अभिनेता सौगात मल्लको प्रमुख भूमिका रहेको चलचित्र ‘बम बहादुर’को टिजर सार्वजनिक भएको छ । टिजर सार्वजनिक गर्दै चलचित्रको रिलिज मिति पनि घोषणा गरिएको छ । यो चलचित्र पुस ५ गते रिलिज हुनेछ । 

‘बम बहादुर’ले सन्देशमूलक कथा र ऐतिहासिक संघर्षलाई चित्रण गरेको निर्माणपक्षले जनाएको छ । दार्जिलिङ पहाड र डुअर्समा बसोबास गर्ने नेपाली भासीको संघर्षलाई चलचित्रले उजागर गर्नेछ । 

चलचित्रलाई जोन राईले निर्देशन गरेका छन् । चलचित्रको मुख्य भूमिकामा सौगातसँगै कलाकारहरू प्रशान्त राई, अनिशा रसाइली, भास्कर प्रधान, महेन्द्र बग्दास, मदन भुजेल, भरत वशिष्ठलगायतको अभिनय रहेको छ । 

‘बम बहादुर’का निर्माता सञ्जीव सार्की हुन् । जोन राई र रुपेश तामाङको कथा र पटकथा रहेको यस चलचित्रको छायांकन सुजोय कुमार घोष ‘मुन्ना’ले गरेका छन् ।