काठमाडौं । करारका कर्मचारीलाई बढी सेवा सुविधा दिएको भन्दै आइतबार नेपाल वायु सेवा निगमका स्थायी पाइलटले हडताल गरे ।  हडतालका कारण काठमाडौंबाट अन्तर्राष्ट्रिय गन्तव्य जाने र नेपाल आउने यात्रु प्रभावित भए । 

उसै कहिले महिनौ ‘सी–चेक’ गर्न पठाएको र नियमित उडान गर्न नसकेको भन्दै बदनाम भएको निगम आइतबार आफ्नै पाइलटका कारण आलोचित हुन पुगेको छ । 

नेपाल नागरिक उड्ड्यन प्राधिकरणले कात्तिक २३ गतेदेखि त्रिभुवन अन्तर्राष्ट्रिय विमानस्थलमा ‘ट्याक्सी वे’ निर्माण गरिरहेको र पर्यटकीय सिजनको चापमा उडान नहुँदा यात्रुहरु विमानस्थलमा अलपत्र परेका थिए । 
प्राधिकरणले काठमाडौंबाट ३० प्रतिशत उडान कटौती गर्दा हवाइ भाडा उच्च छ । 

राति १० देखि बिहान आठ बजेसम्म विमानस्थल बन्द हुँदा त्यसको मार यात्रुहरुले व्योहोर्नु परेको छ ।  त्यसमा पनि निगमका पाइलटहरु अघोसितरूपमा हडतालमा उत्रिएका कारण यात्रुहरुले हैरानी व्यहोर्नु परेको छ ।

निगमका आठ जना स्थायी पाइलट बिरामी र घरायसी बिदा भन्दै अचानक बिदामा बसेपछि त्यसले वायुसेवा निगमका उडान आइतबार प्रभावित भयो । 

दुई वाइडबढी र दुई न्यारोबडी विमान भएको निगमका आठ पाइलट आन्दोलनमा उत्रिएका कारण मुम्बई जाने जहाज आठ घण्टा डिले तथा दुवई उडान क्यान्सिल भएको थियो ।

सरकारले अत्यावश्यक सेवामा बन्द हड्ताल गर्न निषेध गरेको छ ।  आवश्यक सेवा सञ्चालन ऐन २०१४ को दफा ३ को उपदफा (१) अनुसार स्थल तथा हवाइमार्गबाट यात्री वा मालसामान ओसारपसार गर्ने यातायात सेवामा हड्ताल गर्न नपाइने उल्लेख छ । 

तर,  पाइलटहरुले अघोसित रुपमा बिरामी–घरायासी काम भन्दै सेवा ठप्प पारेका हुन् ।  निगमले पाइलट आन्दोलनको विषयमा यात्रुहरूलाई समयै जानकारी नगराई विमानस्थलमा उपस्थिति गराई अलपत्र पारेको थियो । निगमलाई पाइलटहरुको आन्दोलन थाहा हुँदै हुँदै पनि आफूहरुलाई विमानस्थलमा बोलाएर अलपत्र पारेको भन्दै यात्रुहरु आक्रोशित विमानस्थल अशान्त भएको थियो । 

आइतबार दिल्लीबाट दिउँसो ३ः१५ को उडान समय रहँदा १२ बजेदेखि नै विमानस्थलमा बोलाएर अलपत्र पारेको एमएड्ब्लू इन्टरप्राइजेजका मार्केटिङ अफिसर पुनम सिंहले बताइन् । “नेपाल एयरलाइन्सको कस्तो लापरवाही हो । फ्लाइट हुँदैन भन्ने थाहा हुँदै हुँदै यसरी अलपत्र पार्न हुन्छ ? विमानस्थल आएर घण्टौं बसेपछि क्यान्सिल गर्ने हो ?” आक्रोशित हुँदै उनले भनिन्,“हामीलाई ट्याक्सीमा होटेल जानुस् र रिसिप्ट लिएर आउनुस् भन्छन् । कस्तो लापरबाही हो यो ।”

विमान नउड्ने भएपछि निगमका कर्मचारी यात्रुअघि समेत देखा नपरेको सिंहको भनाइ छ ।

“फ्लाइट क्यान्सिल भएपछि त्यहाँ कर्मचारी समेत देखा परेनन् । एक भारतीय कर्मचारीलाई पठाएर फ्लाइट क्यान्सिल भएको भने,” उनले भनिन् । 

निगमका ४३ जना स्थायी पाइलट छन् । करारका पाइलटको सेवा सुविधा धेरै भएको र उक्त सुविधा आफूहरुले पाउनुपर्ने माग गर्दै पाइलटहरुले आन्दोलनमा छन् । 

मंसिर ६ गतेबाट आन्दोलन सुरू गरेका पाइलटहरुले आइतबार भने अचानक घरायसी काम र बिरामी बिदा लिएपछि ‘फ्लाइट क्यान्सिल’ भएको थियो ।  पाइलटहरुले अचानक बिरामी बिदा लिएपछि आइतबार समस्या परेको निगमका प्रवक्ता रमेश पौडेल बताउँछन् । 

“तलबभत्ता बढ्नुपर्ने माग राख्दै आठ जना पाइलटले बिरामी बिदा लिएर असन्तुष्टि जाहेर गरेका हुन्,” उनले भने,“सोमबारबाट फ्लाइट नियमित छ ।”

समस्या समाधानको लागि प्रयासका बाबजुद पाइलटहरुले अचानक अघोसित हडतालका कारण काठमाडौं–मुम्बई, काठमाडौं–दुवई उडान समस्या भएको पौडेलले जनाए । 

“मुम्बईको त डिले भएको हो । आइतबार क्यान्सिल भएको दुवई उडान सोमबार भएको छ,” पौडेलले भने ।  करार सेवामा कार्यरत पाइलटहरुले भत्ता र तलब बापत १० देखि १२ लाख लिइरहेका छन् ।  यस्तै स्थायी पाइलटहरुले ६ देखि ८ लाखसम्म लिइरहेका छन् । 

करारमा रहेका पाइलटहरुको सेवा सुविधा बढी भएको भन्दै स्थायी पाइलटहरूले अघोसित आन्दोलन गरेको निगमले जनाएको छ ।  सेवा सुविधा बढाउने तयारी गर्दा गर्दै पाइलटहरुले एकाएक आन्दोलनमा आएका कारण समस्या भएको निगमका अध्यक्ष युवराज अधिकारी बताउँछन् । 

“उहाँहरुले सेवा सुविधाको माग गर्नु भएको थियो हाम्रो तर्फबाट प्रयास गरिरहेका छौं,” उनले भने, “सुविधा बढाउने फाइल व्यवस्थापन, बोर्ड तथा पर्यटन मन्त्रालयबाट सिफारिस भएर अर्थमा पुगेको छ । त्यहाँ छलफलमा रहेको छ । यो तत्काल हुने विषय होइन । सीक लीभ भनेर केही पाइलटहरु बिदामा बस्नुभएको छ । यो राम्रो होइन ।” 

यसअघि पनि निगमको ‘क्याबिन क्रु’ को आन्दोलनका कारण उडान प्रभावित भएको थियो ।