शासकहरूको नालायकीले गर्दा नेपालीहरू संसारभर हेपिँदै गएका छन् । त्यसमा पनि निकट छिमेकीहरूको हेपाइ अलि बढी नै भइसकेको छ । भारतले अनौपचारिकरूपमा कब्जा गरिराखेको नेपाली भूमिमा सडक बनाएर हालै उद्घाटन गरेको छ । काठमाडौंमै शुक्रवार चिनियाँहरूले निषेधित क्षेत्रमा प्रदर्शन गर्दा रोक्न गएका प्रहरीमाथि आक्रमण गर्ने आँट गरेका छन् । केही दिन पहिले भारतबाट नेपाल प्रवेश गर्न रोकेकोमा सीमामा सशस्त्र प्रहरीमाथि भारतीयहरूले आक्रमण गरेको समाचार आएको थियो । नेपाल सरकार भने चीन र भारतसँग सधैँभन्दा राम्रो सम्बन्ध भएको गफ हाँकेर बसेको छ । अर्कातिर, छिमेकीहरूको हेपाइ झन् झन् बढ्दो छ । छिमेकीको हेपाइ बढ्दै गएसँगै बाँकी विश्वबाट नेपाल बिस्तारै अलग्गिँदै गएको छ । लोकतान्त्रिक मूल्यमान्यताप्रतिको द्वेषका कारण पश्चिमी मुलुकहरूसँग टाढिने शासकहरूको मूर्खताले नेपाललाई अन्धकार युगतर्फ धकेल्दै लगेको देखिएको छ । 

भारत र चीनसँग निकट हुने क्रममा पश्चिमसँगको सम्बन्ध पनि बिग्रँदै गएको छ । आफ्नो स्वार्थ मिल्नेबित्तिकै हाम्रा ‘महान्’ छिमेकीहरू नेपालको सामान्य हित हैन सार्वभौमसत्ताकै अपमान गर्न हिचकिचाउँदैनन् भन्ने पुष्टि त नेपाल भूकम्पका कारण थिलथिलो भएकै बेला २०७२ सालको जेठमा नेपाली भूमि लिपुलेकलाई भारत र चीनले दुई देशको व्यापार नाका बनाउने सम्झौता गरेबाट भएको थियो । तत्कालीन प्रधानमन्त्री सुशील कोइरालाले भारत र चीनले नेपालको सार्वभौम सत्ताको अपमान गरेकोमा विरोध जनाएर पत्र पनि पठाएका थिए । तर, त्यसपछिका सरकारहरू यस प्रकरणमा मौन रहेपछि भारतले त्यही भूभागसमेतलाई आफ्नो देशभित्र देखाएर नक्सा सार्वजनिक गर्‍यो । यसको नेपालभित्र जनस्तरमा चर्को विरोध भयो तर सरकार आलटालमै रमायो । अहिले चीनको नाका जोड्ने सडक यहीँबाट बनाउने आँट त्यही आलटालले दिएको हो । चीन र भारतबीचको २०७२ कै सम्झौता कार्यान्वयनजस्तो देखिने सडक निर्माण हुँदासम्म नेपाल सरकार मौन बस्नु रहस्यमय नालायकी हो ।

सत्तारुढ दलका नेताले चीनप्रति देखाउने ‘भक्तिभाव’ बिस्तारै नेपाल कम्युनिस्ट पार्टी (नेकपा) को आन्तरिक मामिलामा मध्यस्थतामा पुगेको छ । हालै नेकपामा देखिएको चर्को रडाको एकाएक मत्थर हुनुमा चिनियाँ राजदूतको सक्रिय मध्यस्थता मुख्य कारण रहेको नेपाली जनताले राम्रै बुझेका छन् । सार्वजनिक भएका विवरणअनुसार सिंहदरबारको निषेधित क्षेत्रमा प्रदर्शन गर्न नपाएको झोँकमा प्रहरीमाथि आक्रमण गने चिनियाँहरू घटनाको केही क्षणअघि चिनियाँ दूतावासमा परामर्श गर्न पुगेका थिए । हुनत, घटनापछि चिनियाँ दूतावासले प्रेस नोट जारी गरेर स्पष्टीकरण दिएको छ तर सरकारविरुद्ध प्रदर्शन गरे श्रम शिविरमा जानुपर्ने राज्यका नागरिकले कसैको आड नपाई विदेशमा प्रहरीमाथि आक्रमण गर्ने आँट पक्कै गरेनन् भन्ने बुझ्न धेरै माथापच्ची गर्नु पर्दैन । संसार बहुध्रुवीय हुँदै जाँदा नेपाल छिमेकीको मात्र भर परेका खण्डमा लोकतन्त्र र राष्ट्रियता जोगाउन सकिँदैन । सरकारले छुद्रता प्रकट गर्न छाडेर जनतालाई विश्वासमा लिने र सार्वभौम सत्ताका विषयमा उदासीन नहुने हो भनेमात्र नेपालको पुरानो साख फर्कने देखिन्छ ।