काठमाडौं । नेपालमा सायदै यस्ता कोही क्रिकेट समर्थक छन्, जसलाई नेपाल प्रिमियर लिग (एनपीएल)को चर्चा थाहा छैन ।  नेपाल क्रिकेट संघ (क्यान)को आयोजनामा हुन लागेको यो फ्रेन्चाइज क्रिकेट नेपाल मात्र नभइ विश्वभर नै चर्चाको विषय बनिरहेको छ । 

चर्चित भारतीय टेलिभिजन च्यानल स्टार स्पोर्ट्ससँग प्रत्यक्ष प्रसारणका निम्ति सम्झौता हुनुले पनि यो चर्चा झनै चुलिएको हो । प्रतियोगिताका निम्ति क्यानले आठ फ्रेन्चाइज टिमको फ्रेन्चाइजी बिक्री गरिसकेको छ ।  जसअनुसार पहिलो संस्करणमा विराटनगर किंग्स्, जनकपुर बोल्ट्स, काठमाडौं गुर्खाज, लुम्बिनी लायन्स, पोखरा एभेन्जर्स, कर्णाली याक्स, सुदूरपश्चिम रोयल्स र चितवन राइनोजले प्रतिस्पर्धा गर्नेछन् । 

प्रतियोगिताका आठवटै टिमले आफ्नो मार्की खेलाडी घोषणा गरिसकेका छन् भने विदेशी खेलाडी समेत सार्वजनिक गरिरहेका छन् । 

क्यानले प्रतियोगिताको सबै खेलहरू कीर्तिपुरस्थित त्रिवि क्रिकेट मैदानमा हुने जनाइसकेको छ । प्रतियोगिता मंसिर १५ देखि पुस ६ गतेसम्म आयोजना हुने तालिका छ ।

एनपीएलको पहिलो संस्करण आयोजना हुँदै गर्दा बाह्रखरीले तयार पारेको आठ टिमको संक्षिप्त विवरण यस्तो छ– 

टिम – विराटनगर किंग्स्
स्वामित्व – एमएडी ड्रिम स्पोर्ट्स
मुख्य प्रशिक्षक – केभिन ओ‘ब्रियन
मार्की खेलाडी – सन्दीप लामिछाने 
ब्रान्ड एम्बासडर – दयाहाङ राई (अभिनेता)

एमएडी ड्रिम स्पोर्ट्सले विराटनगर किंग्स्को स्वामित्व क्यानबाट एक करोड ५१ लाख रुपैयाँमा किनेको थियो । टिमको मार्की खेलाडीमा नेपाली राष्ट्रिय टिमका पूर्वकप्तान समेत रहेका सन्दीप लामिछाने छन् । 

विराटनगरले लोकेश बम र प्रतिश जिसीलाई प्रतियोगिताकै उच्च मूल्य तिर्दैै अनुबन्ध गरेको छ । लोकेश र प्रतिश प्रतियोगिताका निम्ति १५ लाख रुपैयाँमा बिक्री भएका १२ खेलाडीमध्येका हुन् । न्युजिल्यान्डका पूर्वओपनर मार्टिन गप्टिल यो टिमको सबैभन्दा चर्चित अनुहार हुन् । 

विराटनगर टिम : सन्दीप लामिछाने (मार्की), बसिर अहमेद, लोकेश बम, दीपक बोहरा, सुवास भण्डारी, नरेन भट्ट, प्रतिश जिसी, मृगंल गुरुङ, अनिल खरेल, जितेन्द्र मुखिया, राजेश पुलामी

विदेशी खेलाडी : अकिब इल्यास (ओमान), मार्टिन गप्टिल (न्युजिल्यान्ड), क्रिस सोल (स्कटल्यान्ड), इस्मत आलम (अफगानिस्तान)

टिम – चितवन राइनोज 
स्वामित्व – चितवन मेडिकल कलेज
मुख्य प्रशिक्षक – उमेश पटवाल
मार्की खेलाडी – कुशल मल्ल 

चितवन राइनोजको फ्रेन्चाइज चितवन मेडिकल कलेजले एक करोड ७६ लाख रुपैयाँमा क्यानबाट किनेको थियो । टिमको मार्की खेलाडीको रूपमा नेपाली क्रिकेट टिमका युवा ब्याटर कुशल मल्ल छन् । टिमले अनुभवी अलराउन्डर शरद भेषावकरको समेत साथ पाउने छ । चितवन प्रतियोगिताका निम्ति ‘ए’ श्रेणीका खेलाडीमा अन्तिम बोली मूल्य १५ लाख रुपैयाँ लगाउने एक मात्र टिम समेत हो । इंग्ल्यान्डका रवि बोपारा यो टिमका सबैभन्दा चर्चित खेलाडी हुन् ।

चितवनको टिम : कुशल मल्ल (मार्की), शरद भेषवाकर, कमलसिंह ऐरी, दीपक बोहरा, रिजन ढकाल, सन्तोष कार्की, गौतम केसी, रञ्जित कुमार, विपीन रावल, अमरसिंह रौटेला, दीपेश खतिवडा 

विदेशी खेलाडी : रवि बोपारा (इंग्ल्यान्ड), मर्चन्ट डे लिंगे (दक्षिण अमेरिका), लुक बेन्किन्सटन (इंग्ल्यान्ड), हसन एसाखिल (अफगानिस्तान), जान निकोल लफ्टी इटोन (नामिबिया)

टिम – जनकपुर बोल्ट्स
स्वामित्व – ड्रिम स्पोर्ट्स 
मुख्य प्रशिक्षक – पुबुदु दासानायके
मार्की खेलाडी – आसिफ सेख
ब्रान्ड एम्बासडर – पूजा महतो

ड्रिम स्पोर्ट्सले मधेस प्रदेशको राजधानीको नाममा रहेको जनकपुर बोल्ट्सको स्वामित्व दुई करोड पाँच लाखमा किनेको थियो । प्रतियोगिताको पहिलो संस्करणका निम्ति टिमलाई नेपाली राष्ट्रिय क्रिकेट टिमका पूर्वप्रशिक्षक समेत रहेका पुबुदु दासानायकेले प्रशिक्षण दिनेछन् । टिमको मार्की खेलाडीमा नेपाली टिमका ओपनर आसिफ सेख छन् । 

प्रतियोगिताका निम्ति जनकपुरले नेपाली टिमकै ललितनारायण राजवंशी र अनिल साहलाई १५ लाख रुपैयाँमा अनुबन्ध गरेको छ । न्युजिल्यान्डका जिम्मी निसम जनकपुरका चर्चित विदेशी खेलाडी हुन् । यस्तै, टिमले पाकिस्तानका आक्रामक ब्याटर सोहैब मक्सुदको समेत साथ पाउने छ ।

जनकपुरको टिम : आसिफ सेख (मार्की), हेमन्त धामी, सुवास कंसाकार, किशोर महतो, शेर मल्ल, ललितनारायण राजवंशी, रुपेश सिंह, अनिल साह, तुल थापा, आकाश त्रिपाठी, अर्निको यादव

विदेशी खेलाडी : जिम्मी निसम (न्युजिल्यान्ड), जोसुवा ट्रोम्प (अमेरिका), सोहैब मक्सुद (पाकिस्तान), मोहम्मद माहसिन (पाकिस्तान), लहिरी मिलान्था (अमेरिका)

टिम – कर्णाली याक्स
स्वामित्व – हिमालयन बिल्डर्स (मालिक – झनकदत्त खनाल, निर्देशक – गृहेन्द्र घिमिरे)
मुख्य प्रशिक्षक – ज्ञानेन्द्र मल्ल
मार्की खेलाडी – सोमपाल कामी 
ब्रान्ड एम्बासडर – स्वस्तिमा खड्का

एनपीएल पहिलो संस्करणमा सबैभन्दा धेरै प्रचार–प्रसार गर्ने टिममा पर्छ, कर्णाली याक्स । यसको स्वामित्व हिमालयन बिल्डर्सले क्यानबाट एक करोड ११ लाख रुपैयाँमा खरिद गरेको थियो । नेपाली राष्ट्रिय टोलीका पूर्वकप्तान समेत रहेका ज्ञानेन्द्र मल्लको प्रशिक्षणमा टिम छ । 

कर्णाली नेपाली टिमका नियमित सदस्य सोमपाल कामीको कप्तानीमा मैदान उत्रिने छ । भारतीय टिमका पूर्वओपनर शिखर धवन यस टिमका सबैभन्दा चर्चित विदेशी खेलाडी हुन् । कर्णालीले नेपाली टिमका युवा अलराउन्डर गुल्सन झालाई १५ लाख रुपैयाँमा अनुबन्ध गरेको छ ।  

कर्णालीको टिम : सोमपाल कामी (मार्की), मौसम ढकाल, दीपेन्द्र रावत, दीपक डुम्रे, देव खनाल, रित गौतम, अर्जुन घर्ती, गुल्सन झा, भुवन कार्की, युनिस सिंह, नन्दन यादव

विदेशी खेलाडी : शिखर धवन (भारत), हुसैन तलात (पाकिस्तान), बाबर हायात (हङकङ), चान्डविक वाल्टन (वेस्ट इन्डिज)

टिम – काठमाडौं गुर्खाज
स्वामित्व – काठमाडौं स्पोर्ट्स डेभलपमेन्ट भेन्चर (कान्तिपुर मिडिया ग्रुप)
मुख्य प्रशिक्षक – वसन्त शाही
मार्की खेलाडी – करण केसी
ब्रान्ड एम्बासडर – इन्दु बर्मा (क्रिकेटर)

काठमाडौं गुर्खाजको फ्रेन्चाइजी कान्तिपुर मिडिया ग्रुपले तीन करोड ३३ लाखमा किनेको हो । काठमाडौं पहिलो संस्करणको दोस्रो सबैभन्दा महंगो फ्रेन्चाइज टिम समेत हो । टिम वसन्त शाहीको प्रशिक्षणमा छ । 

राष्ट्रिय टिमका बलर करण केसीलाई काठमाडौंले मार्की खेलाडीको रूपमा अनुबन्ध गरेको छ । काठमाडौंले अक्सनबाट भीम सार्की र साहब आलमलाई सबैभन्दा धेरै १५ लाख रुपैयाँ खर्चिदै टिममा भित्र्याएको छ । स्टेफन एस्किन्जी र डान डथवेथ टिमका चर्चित विदेशी अनुहार हुन् । टिमले नेपाली राष्ट्रिय महिला टिमकी कप्तान इन्दु बर्मालाई ब्रान्ड एम्बासडर बनाएको छ ।

काठमाडौंको टिम : करण केसी (मार्की), साहब आलम, दीपेश कँडेल, कृष्ण कार्की, राशिद खान, विवेक केसी, सुमित महर्जन, शंकर राना, प्रतिक श्रेष्ठ, कृष कार्की (आइकोनी प्लेयर)

विदेशी खेलाडी : गेर्हार्ड इरास्मस (नामिबिया), माइकल लेभिट (नेदरल्यान्ड्स), स्टेफन एस्किन्जी, डान डथवेट

टिम – लुम्बिनी लायन्स
स्वामित्व – फच्र्युन हेल्थ केयर (ईश्वर जिसी)
मुख्य प्रशिक्षक – नन्दन फाडनिस
मेन्टर – शक्ति गौचन 
मार्की खेलाडी – रोहित पौडेल
ब्रान्ड एम्बासडर – राजेश हमाल (अभिनेता)

एनपीएलको पहिलो संस्करणका निम्ति फच्र्युन हेल्थ केयरले क्यानबाट एक करोड ८६ लाखमा लुम्बिनीको स्वामित्व किनेको हो । टिमको मुख्य प्रशिक्षकमा नेपाली राष्ट्रिय क्रिकेट टिमका कन्सलट्यान्ट प्रशिक्षक समेत रहेका फाडनिस छन् । नेपाली राष्ट्रिय टिमका पूर्वखेलाडी शक्ति गौचन टिमको मेन्टरमा छन् । लुम्बिनी नेपाली राष्ट्रिय क्रिकेट टिमका कप्तान रोहित पौडेलकै कप्तानीमा मैदान उत्रिने छ । टिमले अभिनेता राजेश हमाललाई ब्रान्ड एम्बासडरको रूपमा नियुक्त गरेको छ । लुम्बिनीले अक्सनबाट तीन खेलाडीलाई सर्वाधिक १५ लाख रुपैयाँमा अनुबन्ध गरेको छ । जसमा सूर्य तामाङ, सन्दीप जोरा र विवेक यादव छन् । बेन कटिंग टिमका चर्चित विदेशी खेलाडी हुन् ।

लुम्बिनीको टिम : रोहित पौडेल (मार्की), सूर्य तामाङ, विकाश आग्री, दिनेश अधिकारी, अभिषेस गौतम, आयुतोष घिरैया, सन्दीप जोरा, दूर्गेश गुप्ता, तिलकराज भण्डारी, अर्जुन साउद, विवेक यादव

विदेशी खेलाडी : बेन कटिङ (अस्ट्रेलिया), उन्मुक्त चन्द (अमेरिका), टम मोरेस (इंग्ल्यान्ड), रोमन सिमोन्ड्स (वेस्ट इन्डिज)

टिम – पोखरा एभेन्जर्स
स्वामित्व – नेपाल टी–ट्वान्टी प्रा.लि (सुवोध त्रिपाठी)
मुख्य प्रशिक्षक – राजीव कुमार 
मेन्टर – जोन्टी रोड्स
मार्की खेलाडी – कुशल भुर्तेल 

एनपीएलको सबैभन्दा महंगो फ्रेन्चाइजी टिम हो, पोखरा एभेन्र्जस । पोखराले क्यानबाट तीन करोड ५७ लाखमा टिमको फ्रेन्चाइजी खरिद गरेको छ । टिम भारतीय प्रशिक्षक राजीव कुमारको प्रशिक्षणमा छ । राजीव इन्डियन प्रिमियर लिग (आईपीएल)को टोली चेन्नाई सुपर किंग्सका फिल्डिङ प्रशिक्षक समेत हुन् । 

यस्तै, पोखराले उत्कृष्ट फिल्डिङका कारण चर्चित दक्षिण अफ्रिकाका पूर्वक्रिकेटर जोन्टी रोड्सलाई मेन्टरको रूपमा भित्र्याएको छ । टिमको मार्की खेलाडीमा नेपाली टिमका शीर्षक्रम ब्याटर कुशल भुर्तेल छन् । वेस्ट इन्डिजका रेमोन रेफर पोखराका चर्चित विदेशी खेलाडी हुन् ।

पोखराको टिम : कुशल भुर्तेल (मार्की), आकाश चन्द, तीर्थराज दास, सागर ढकाल, सुनम गौतम, अमृत गुरुङ, नारायण जोशी, दिनेश खरेल, विपीन खत्री, दिलीप नाथ, किरण ठगुन्ना, सुदीप अर्याल (आइकोनिक प्लेयर)

विदेशी खेलाडी : आन्द्रियास गौस (अमेरिका), बास डे लिडे (नेदरल्यान्ड्स), म्याट क्रिट्चली (इंग्ल्यान्ड), रेमोन रेफर (वेस्ट इन्जिड), माइकल लियस्क (स्कटल्यान्ड)

टिम – सुदूरपश्चिम रोयल्स 
स्वामित्व – इम्पायर स्पोर्ट्स (स्वतन्त्र प्रताप शाह)
मुख्य प्रशिक्षक – जगत टमाटा
कन्सलट्यान्ट – ब्राड हग
मार्की खेलाडी – दीपेन्द्रसिंह ऐरी

क्यानबाट सुदूरपश्चिम रोयल्सको स्वामित्व इम्पायर स्पार्ट्सले एक करोड ६८ लाख रुपैयाँमा किनेको थियो । टिमको मुख्य प्रशिक्षकमा नेपाली युवा टिमको प्रशिक्षण जिम्मेवारी सम्हालिरहेका जगत टमाटा छन् । सुदूरपश्चिमले अस्ट्रेलियाका पूर्वमध्यक्रम ब्याटर ब्राड हगलाई मेन्टरमा ल्याएको छ । 

टिमले नेपाली टोलीका अलराउन्डर दीपेन्द्रसिंह ऐरीलाई मार्की खेलाडीको रूपमा अनुबन्ध गरेको छ । सुदूरपश्चिमले नेपाली टिमकै मध्यमक्रम ब्याटर आरिफ सेखलाई अक्सनबाट १५ लाख रुपैयाँमा भित्र्याएको छ । न्युजिल्यान्डका स्कट कुगेलेन सुदूरपश्चिमको चर्चित विदेशी खेलाडी हुन् ।

सुदूरपश्चिम टिम : दीपेन्द्रसिंह ऐरी, विनोद भण्डारी, भोजराज भट्ट, अभिनाश बोहरा, खडक बोहरा, नरेश बुढाएर, अर्जुन कुमाल, इशान पाण्डे, नरेन साउद, आरिफ सेख, अमित श्रेष्ठ

विदेशी खेलाडी : ब्रान्डन म्याकमुलम, सैफ जैब, स्टक कगेलेन, रोहन मुस्तफा