विश्व स्वास्थ्य संगठनले नेपाल पनि कारोनाभाइरस (कोविड —९)को संक्रमणको उच्च जोखिममा रहेको भन्दै सावधान गराएको छ । नेपाल सरकारले पनि भ्रमण वर्ष — २०२० को विदेशमा प्रचार प्रसार गर्ने कार्यक्रम स्थगित गरेको छ । यी दुवै घटनाबाट नेपाल सरकार र नेपाली जनता कोरोनाको प्रकोपबाट जोगिने तयारीमा लागेको भान हुन्छ । दुर्भाग्य, देशभित्र आसन्न विपत्तिका बारेमा हल्ला र भ्रम त फैलेको छ तर राज्य संयन्त्रबाट सही र व्यवस्थितरूपमा सचेतना सन्देश प्रवाह गरिएको छैन । यस्तै, संसारका कतिपय देशले विदेश यात्रामा प्रतिबन्ध लगाइसकेका भए पनि नेपालमा संक्रमित देशमा कर्मचारीहरूको भ्रमणसमेत रोकिएको छैन । विदेशबाट आउनेहरू निर्बाध नेपाल आइरहेका छन् र एकमात्र अन्तर्राष्ट्रिय विमानस्थलमा समेत संक्रमणका लक्षणहरू पत्ता लगाउने वैज्ञानिक प्रविधि छैन । अर्थात्, नेपालमा कोरोनाको संक्रमण रोक्ने जिम्मा पनि पशुपतिनाथलाई नै सुम्पिइएको छ । 

तयारी सुरु गरेको भए पनि पूर्ण हुने थिएन । आलोचना र टिप्पणी भइरहने थिए । तर, कम्तीमा तयारी गरेकोमा सन्तोष त मान्न पाइन्थ्यो । अमेरिकामा राष्ट्रपति डोनाल्ड ट्रम्पले सुरुमा कोरोनाको संक्रमण रोक्ने कार्यक्रमप्रति बेवास्ता देखाउँदा अहिले भद्रगोल भएको समाचार द वासिङटन पोस्टले दिएको छ । चीनले सुरुमा सूचना लुकाउने प्रयास गर्दा निकै महँगो मूल्य चुक्ता गर्नुपरेको छ । अमेरिका र चीनजस्ता देशहरूले त सामना गर्न धौ धौ भएको कोरोनाको कहर हामी भने सजिलै थाम्न सकिनेजस्तो गर्दैछौँ । कम्तीमा सरकारले स्वास्थ्य मन्त्रालयले गरेको उपचारको तयारी, रोकथामका लागि जनस्वास्थ्यका उपायहरूलगायतका विषयमा जानकारी दिएको भए भ्रम फैलने थिएन । भ्रमले जनतालाई अत्याउन थालेपछि त्यसलाई चिर्न निकै कठिन हुन्छ भन्ने सरकारी अधिकारीहरूले कहिले बुझ्ने हुन् ?

अहिलेसम्म नेपालमा कोरोनाभाइसरको संक्रमण भएको थाहा भएको छैन । यसको अर्थ सरकारी स्वास्थ्य संस्थामा कोरोनाका बिरामी आइपुगेका छैनन् भन्नेमात्रै हो । आशा गरौँ साँच्चै नै नेपाल संक्रमण मुक्त नै छ । त्यस अवस्थामा पनि विदेशबाट कोरोना संक्रमित व्यक्ति नेपाल नआऊन् र नेपालमा कसैलाई संक्रमण भएको भेटिएमा उपचारको व्यवस्था हुनेछ । चीनबाट फर्काइएकाहरू कसैमा पनि संक्रमण नभेटिएको सुखद समाचार कायमै रहोस् । अब ढिला नगरी सरकारले विमानस्थल र स्थल नाकाहरूमा पनि संक्रमणको जाँच गर्ने भरपर्दो व्यवस्था तत्काल मिलाओस् । साथै, सहरी क्षेत्रलगायत संक्रमणको जोखिम भएका ठाउँहरूमा यसका लक्षणहरूका बारेमा र कसरी संक्रमणबाट जोगिन सकिन्छ भन्ने सम्बन्धमा जनचेतना जगाउने काम युद्धस्तरमा साँच्चै नै युद्धस्तरमा सञ्चालन गरियोस् । कोरोनाको संक्रमण रोक्ने प्रबन्ध मिलाउन प्रधानमन्त्री केपी शर्मा ओली स्वयं अगाडि सरुन् ! नत्र, उनका कमरेडहरूले यसैलाई पनि प्रधानमन्त्रीलाई घेर्ने निहुँ बनाउन सक्छन् ।