काठमाडौं । चुनावको मिति तय हुन नसके पनि प्रमुख दल भने चुनाव केन्द्रित गतिविधिमा जुटेका छन् ।
कांग्रेस, एमाले र माओवादी केन्द्रले आ–आफ्नै तरिकाले आन्तरिक तयारी तीव्र पारेका छन् । राप्रपाले पनि महाधिवेशन लगत्तै चुनावी अभियानलाई तीव्रता दिने जनाएको छ भने अहिले गाउँ, नगर र जिल्ला अधिवेशनलाई पनि चुनावी तयारीकै रुपमा लिएको जनाएको छ ।

तर स्थानीय निर्वाचनका बारेमा भने अहिलेसम्म कुनै सहमति जुट्न सकेको छैन ।

संयुक्त लोकतान्त्रिक मधेसी मोर्चाले संविधान संशोधन नभएसम्म कुनै पनि हालतमा चुनावमा जान नसकिने निष्कर्ष निकाल्दै निर्वाचनको मिति घोषणा भए आन्दोलनमा जाने चेतावनी दिएको छ । उसले जबर्जस्ती गरे मधेसमा चुनाव हुन नदिने तयारी थालेको छ ।

सरकारले निर्वाचन आयोगलाई निर्वाचनको तयारी गर्न निर्देशन दिए पनि सत्तारुढ केही दल र विपक्ष एमाले भने चुनाव हुनेमा अझै विश्वस्त भने भएका छैनन् ।
एमालेले भने सरकार निर्वाचन नगराउने र ‘आयु लम्ब्याउने खेलमा’ मात्रै लागेको जिकिर गर्दै आएको छ ।

चुनावकै लागि एमालेले १ मंसिरदेखि निर्वाचन केन्द्रित चार महिने जागरण अभियान सञ्चालन गरिरहेको छ । त्यस्तै उसले २१ फागुनदेखि तराई केन्द्रित दोस्रो अभियान सुरु गर्न लागेको जनाएको छ ।

यस्तै कांग्रेसले पनि विगत एक महिनादेखि देशव्यापी केन्द्रीय प्रतिनिधि खटाएको छ । उसले संगठन सुदृढिकरण, क्रियाशील सदस्यता वितरण, जनता र नेता कार्यकर्ताबीचको सम्बन्ध सुदृढिकरण गर्दै चुनावी तयारीमा जुट्न केन्द्रीय नेताहरूलाई गाउँ– गाउँ पठाएको हो ।

कांग्रेसले शनिबार राजधानीमा आयोजित एक कार्यक्रममा चुनावी अभियान सुरु भएको उद्घोष गर्यो । कांग्रेस सभापति शेरबहादुर देउवा, वर्तमान सरकारमा रहेका मन्त्रीहरू सहभागि कार्यक्रममा नेताहरूले चुनावी अभियान सुरू भएको जानकारी गराउँदै निर्वाचनमुखी कार्यक्रम अघि बढाउन कार्यकर्तालाई निर्देशनसमेत दिएका थिए । 

ओलीले संविधान कार्यान्वयन गर्ने मौका चुकाए
नेपाली कांग्रेसका नेता प्रदीप पौडेलले संविधान कार्यान्वयनका लागि पनि निर्वाचन अपरिहार्य रहेकाले कांग्रेसले आन्तरिक तयारी थालेको बताए । 
कांग्रेस केन्द्रिय सदस्य समेत रहेका पौडेलले नेकपा एमालेले मौका पाएर पनि संविधान कार्यान्वयनमा चुकेको हुँदा कांग्रेस सहभागि सरकारले स्थानीय चुनाव गराउने बताए ।

नेकपा एमालेले संविधान कार्यान्वयन गर्ने मौका चुकाएको बताएका छन् । “संविधान जारी भएको पहिलो नौ महिना उहाँले नै नेतृत्व गर्नुभएको हो । आफू प्रधानमन्त्री भएको बेला संविधान कार्यान्वयनमा सिन्को भाँच्न नसक्नेले अरुलाई संविधान कार्यान्वयन गर भन्न सुहाउँदैन,” उनको टिप्पणी थियो । उनले मुलुक क्रमशः निर्वाचनउन्मुख भएकोसमेत बताए ।

उनले राष्ट्रियताको नाममा पहाड–मधेसका कित्ता छुट्टयाउन लागिएको भन्दै कांग्रेसले त्यसलाई मेटाउन पनि चुनाव केन्द्य्रित कार्यक्रम अघि सार्न लागेको बताए ।

“एकाथरीले पहाडमा बसोबास गर्नेलाई पहाडीया शासक देख्ने, अर्कोथरीले तराईमा बस्नेलाई विखण्डनकारी सोच्ने, यो दुई अतिवादलाई चुनावमार्फत कांग्रेस तोड्न चाहन्छ । तराईंबासी देशका जंगेपिलर हुन् ।”

एमाले अध्यक्ष ओलीले आफू प्रधानमन्त्री हुँदा संविधान संशोधन गरेर चित्त बुझाउँछु भन्ने र सरकारबाट हटेपछि संविधान संशोधन गर्नै हुन्न भन्नु आश्चर्यजनक अभिव्यक्ति भएको बताए ।

सरकारको औचित्य समाप्त हुँदैछ : एमाले
सरकार निर्वाचन नगराउने दिशामा अघि बढेकाले सरकारको औचित्य समाप्त हुँदै गएको एमालेको निष्कर्ष छ । “आफूले मिति तोकेर निर्वाचन आयोगलाई पत्र लेख्नुपर्नेमा आयोगलाई जिम्मा दिएको जस्तो गरिएको छ । सरकार निर्वाचन टार्ने मस्थितिमा छ,” एमाले सचिव तथा प्रचार विभाग प्रमुख योगेश भट्टराईले बाह्रखरीसँग भने, “सरकारको औचित्य समाप्त हुँदैछ ।”

एमाले निर्वाचनको लागि सदैव तत्पर रहेको उनको भनाई थियो । “एमाले निर्वाचनको लागि सधैँ तयार छ । देशव्यापी अभियान सञ्चालन गरिरहेको छ । तर, सरकार निर्वाचनको मिति नै तोक्दैन,” उनले प्रष्ट पारे ।

स्थानीय निकायको निर्वाचन गर्ने कि तहको गर्ने भनेर कांग्रेस–माओवादी केन्द्रबीच झगडा चर्किएको भन्दै त्यही कारणले निर्वाचनको मिति नतोकिएको आँकलन गरे । 
माओवादी केन्द्र पनि तयारै छ
माओवादी केन्द्रका उपाध्यक्ष नारायणकाजी श्रेष्ठले माओवादी केन्द्रले पनि निर्वाचन केन्द्रित कार्यक्रम सुरु गरिरहेको जानकारी दिए । “माओवादी केन्द्रले पनि विगत एक महिनादेखि अभियान सञ्चालन गरिरहेको छ । नगर, गाउँ घर–घर जाऔँ, माओवादी केन्द्रलाई विजय बनाऔँ भन्ने अभियान सञ्चालन गरेर निर्वाचन केन्द्रित कार्यक्रम सुरु गरिसकेको छ,” उनले थपे ।

निर्वाचनको मिति तोक्न किन ढिला भयो त भन्ने जिज्ञासामा उनले भने, “मधेसी मोर्चालगायत असन्तुष्ट सबै पक्षलाई सहमतीमा ल्याउन खोज्दा मिति तोक्न ढिलाइ भएको हो । मिति नतोक्दैमा निर्वाचनको तयारीमा ढिलाइ भएको छैन । सरकारले निर्वाचन आयोगलाई पत्र लेखेर तयारी थाल्न आवश्यक निर्देशन दिइसकेको छ ।”

राप्रपाका सह–प्रवक्ता मोहन श्रेष्ठले  स्थानीय निर्वाचनमा सबैभन्दा बढी राप्रपा नै सक्रिय भएको बताए ।

उनले महाधिवेशनको तयारी र स्थानीय निर्वाचनको तयारी सँगसँगै भएकाले अहिले राप्रपाका नेताहरु २४० वटै निर्वाचन क्षेत्रसहित गाउँ गाउँमा पुगेको बताए ।
“सबैभन्दा बढी चुनावको तयारी राप्रपाले गरिरहेको छ,” उनले भने, “२४० निर्वाचन क्षेत्रमै पार्टीका गतिविधि भएको छ । यो महाधिवेशन सँगसँगै स्थानीय चुनावको तयारी पनि हो ।”