काठमाडौं । पशुपति क्षेत्र विकास कोषले आर्यघाटबाट २ करोड ३८ लाख रुपैयाँ संकलन गरेको छ । विद्युतीय शव दाह गृह र आर्यघाटमा रहेका चितामा शव व्यवस्थापनबापत गत आर्थिक वर्षमा कोषले २ करोड ३८ लाख ४९ हजार रुपैयाँ संकलन गरेको हो । यद्यपि यो लक्ष्यभन्दा १ करोड ४४ लाख २१ हजार कम हो ।
कोषका कोषाध्यक्ष मिलन थापाका अनुसार घाटतर्फ ३ करोड ८३ लाख १५ हजार रुपैयाँ रकम संकलन गर्ने लक्ष्य रहेकामा २ करोड ३८ लाख ४९ हजार रुपैयाँ मात्रै संकलन भएको थियो । लक्ष्यभन्दा कम आम्दानी हुनेका कारण घाटतर्फ शव कम आउनु र विद्युतीय शवदाह गृहमा कोभिड-१९ संक्रमणबाट मृत्यु भएका शव र अलपत्र परेका शव निःशुल्क जलाउनु रहेको थापाले बताए ।
“कोभिड-१९ कारण सवारीसाधन नचल्दा जहाँ मृत्यु भएको हो त्यहीं शव व्यवस्थापन हुनु र गम्भीर प्रकृतिका बिरामीलाई उपचारका लागि काठमाडौं ल्याउन नसक्नु हो,” थापाले भने, “यसबाहेक अरु कारण पनि रहेको हुनसक्ने कुराहरु आइरहेका छन् । यो खोजीको विषय हो ।”
कोषले विद्युतीय शवदाह गृहमा चार हजार र आर्यघाटको २ नम्बर चितामा शव जलाएको ५ हजार तथा साधारण चितामा शव व्यवस्थापन गरेको १८ सय रुपैयाँ लिने गरेको छ ।
थापाका अनुसार हाल कोषले औसतमा दैनिक कोभिडका १० शव विद्युतीय शवदाह गृहमा व्यवस्थापन गर्दै आएको छ । हाल आर्यघाटमा औसत ३० वटा शव अन्तिम संस्कारका लागि ल्याइने गरेको कोषले जनाएको छ ।