काठमाडौं । नेपाली राष्ट्रिय क्रिकेट टिमका प्रशिक्षक मोन्टी देसाईले विश्व क्रिकेटमा ठूलो इतिहास बोकेको वेस्ट इन्डिज क्रिकेटसँगको शृंखलाबाट नेपालले राम्रो तयारी गर्ने बताएका छन् ।
शनिबार हुन लागेको शृंखलाअघि आयोजित पत्रकार सम्मेलनमा प्रशिक्षक देसाईले यस शृंखलाबाट खेलाडीमा आत्मविश्वास बढ्ने विश्वास व्यक्त गरे ।
ब्याटिङ युनिट आशाभन्दा कम देखिए पनि दीपेन्द्रसिंह ऐरीको एकै ओभरमा ६ छक्कालगायत केही सकारात्मक पक्ष ओमानबाट आएको प्रशिक्षक देसाई बताउँछन् ।
उनले त्रिवि मैदानमा आफ्नो टिमले केही सुधार गर्ने धारणा राखे ।
वेस्ट इन्डिज ‘ए’का प्रशिक्षक फ्लोयड रेइफरले शृंखलामा राम्रो प्रदर्शन गर्ने आशा व्यक्त गर्दै एसोसियट राष्ट्रलाई सहयोग गर्ने उद्देश्यले पनि नेपाल आएको धारणा व्यक्त गरे । उनले नेपालमा पनि प्रतिभावान खेलाडी रहेको उल्लेख गर्दै यो शृंखला राम्रो रहने आशा व्यक्त गरे ।
