काठमाडौं । नेपाली क्रिकेट टोली मलेसियामा एसिया कप छनोट प्रतियोगिता खेलेर फर्किएको एक महिना पनि बितेको छैन । एसिया कपमा छनोट हुने उच्च आकांक्षाका साथ मलेसिया पुगेको नेपाली टोली घर फर्किंदा त्यति नै धेरै निराश भएर फर्किएको थियो । 

प्रतियोगिता जित्दै एसिया कपमा भारत र पाकिस्तानजस्तो बलियो टोलीसँग एकदिवसीय अन्तर्राष्ट्रिय खेल्ने सपना चकनाचुर हुँदा नेपाली खेलाडी दुःखी हुनु स्वाभाविक थियो । त्यो पीडा टोली स्वदेश फर्किंदा त्रिभुवन विमानस्थलमा कप्तान पारस खड्काले दिएको अभिव्यक्तिमा पनि देखिन्थ्यो । नेपाली टोली अर्को साता पुनः मलेसिया जाँदैछ, ट्वान्टी–२० विश्वकप छनोट प्रतियोगिताका लागि । जहाँ टोली एक महिनाअघिको पीडा भुलाउने प्रयासमा हुनेछ ।

“हाम्रो लागि त्यो कालो दिन हो । पक्कै पनि हाम्रो मनमा पीडा त छ,” एसिया कप छनोट प्रतियोगिता सम्झँदै नेपाली टोलीका प्रशिक्षक जगत टमाटाले भने, “त्यो कुरालाई हामी बिर्सने प्रयासमा छौं । मनमा इख छ, हामी पुनः गरेर देखाउँछौं ।”

ट्वान्टी–२० विश्वकप छनोटअन्तर्गत पूर्व क्षेत्रको सात टोलीले असोज १७ गतेबाट २६ गतेसम्म प्रतिस्पर्धा गर्नेछ । यस प्रतियोगितामा एसिया कप छनोट प्रतियोगिता जस्तो कठिन प्रतिद्वन्द्वी छैन, तुलनात्मक रुपमा । नेपालले आयोजक मलेसिया, सिंगापुर, चीन, भुटान, म्यानमार र थाइल्यान्डसँग प्रतिस्पर्धा गर्नेछ । राउन्ड रोविन लिगका आधरमा हुने यस प्रतियोगिताको शीर्ष तीन टोलीले अर्को चरणमा स्थान बनाउनेछन् । कुवेतमा भएको पश्चिमी क्षेत्रको छनोट प्रतियोगितामा कुवेत, कतार, यनाइटेड अरब इमिरेट्स (यूएई), बहराइन, माल्दिभ्स र साउदी अरेविया छन् । जहाँबाट आयोजकका रुपमा कुवेत, युएई र कतार छनोट भइसकेका छन् ।

अघिल्लो चरण पुग्नेमा आफू विश्वस्त भए पनि प्रशिक्षक टमाटाले प्रतिद्वन्द्वीलाई कमजोर नआँक्ने बताए । “को बलियो को कमजोर भन्दा हामीले आफ्नो क्षमताअनुसरको क्रिकेट खेल्ने हो । अघिल्लो चरण पुग्नका लागि हामी खेल्ने हो,” तुलनात्मक रुपमा कमजोर प्रतिद्वन्द्वी भएका कारण नयाँ खेलाडीलाई मौका दिने हो कि भन्ने प्रश्नमा प्रशिक्षक टमाटाले भने, “हामीसँग नयाँ खेलाडी नै कहाँ छन् र ? २३–२४ जना खेलाडी लिएर बन्द प्रशिक्षण शुरु गरेका छौं । हाम्रो टिममा एउटा फर्म्याट छ, त्यसअनुसार खेल्ने हो । नयाँबारे केही भन्न सकिँदैन । १४ जनाको स्क्वाड हुन्छ । ट्वान्टी–२० फर्म्याट हो । एक दुई नयाँ अनुहार आउन पनि सक्छन् ।”

नेदरल्यान्डविरुद्ध एक दिवसीय अन्तर्राष्ट्रिय खेल्दा आंैलामा चोट लागेका शरद भेषावकर चोटमुक्त भएर प्रशिक्षणमा फर्किएका छन् । उनको आगमनबाट पनि टोली उत्हासित छ । “शरदले मिहिनेत गरिरहेका छन् । चोटका कारण बीचमा केही खेल गुमाए । तर, यसबीचमा उनले राम्रो क्रिकेट खेलिरहेका छन् । ट्वान्टी–२० मा उनले आफूलाई राम्रो फिनिसरको रुपमा स्थापित गरेका छन् । अहिले पनि राम्रो छ,” प्रशिक्षक टमाटाले भने ।

एसिया कप छनोटका लागि मलेसिया गए पनि बेन्चमा बसेर फर्किएका विनोद भण्डारी यसपटक ११ जनाभित्र पर्न सक्छन् । लामो समयपछि पुनरागमन गरे पनि राम्रो प्रदर्शन गर्न नसकेका सुवास खकुरेलले भने स्थान पाउने सम्भावना कम छ । 

उपलब्ध खेलाडीलाई २ टिम बनाएर खेलिरहेको नेपाली टोली यहाँको बन्द प्रशिक्षणपछि सिधै मलेसिया जानेछ । प्रतियोगिता अघि नेपाली टोलीले कुनै अभ्यास खेल नखेल्ने प्रशिक्षक टमाटाले बताए । नेपालीले पाँच खेल बायोमास ओभलमा खेल्नेछ भने एक खेल किन्नरा एकेडेमी ओभलमा खेल्नेछ ।