काठमाडौं । सहिद स्मारक बी डिभिजन लिगमा श्री भगवती क्लब टोखाले अन्नपूर्ण आरसिटी क्लबविरुद्ध ३–१ को जित निकाल्दै सुखद सुरुआत गरेको छ ।

मंगलबार एन्फा मुख्यालयमा सम्पन्न दोस्रो खेलमा भगवतीलाई जित दिलाउन विक्रान्त नरसिंह राणा र विशाल विक्रम सिलवालले गोल गरे । भगवतीले एक गोल भने आत्मघाती उपहार पाएको थियो ।

आरसीटीका निखिल तामाङले एक गोल फर्काए । खेलमा सुरुआती अग्रता बनाए पनि आरसीटीले त्यसलाई जोगाउन सकेन । ३६औँ मिनेटमा निखिल तामाङले गोल गर्दै आरसीटीलाई अग्रता दिलाएका थिए । तर, ५४औँ मिनेटमा टोखाका विक्रान्त नरसिंह राणाले बराबरी गोल फर्काए ।

७७औँ मिनेटमा आरसीटीका अमर श्रेष्ठले आत्मघाती गोल गरेपछि टोखाले अग्रतालाई २–१ मा पुर्‍याएका थिए । खेलको अन्तिम मिनेटमा विशालले गोल गरेपछि टोखाले ३–१ के जित पक्का गरेको हो ।

यसअघि आजै भएको पहिलो खेलमा मध्यपुर युथ एसोसिएसन र श्री टुसाल युथ क्लबले १–१ को बराबरी खेल्दै अंक बाँडेका थिए ।