अस्ट्रेलिया । न्युजिल्यान्ड सरकारले नेपाली वाणिज्यदूत दिनेश खड्कालाई ‘न्युजिल्यान्ड मेरिट अफ अवार्ड’ उपाधिबाट विभूषित गर्ने भएको छ । न्युजिल्यान्डको नेपाली समाजमा अतुलनीय योगदान दिएबापत खड्कालाई सो उपाधि प्रदान गर्न लागिएको बताइएको छ । 

न्युजिल्यान्डका प्रधानमन्त्री क्रिष्टोफर लुक्सनले पत्र पठाउँदै उनलाई सो उपाधि प्रदान गर्ने निर्णय भएको जानकारी गराएका हुन् । प्रधानमन्त्रीद्वारा हस्ताक्षरित पत्रमा ‘नेपाली समुदाय र यहाँको समाजमा खड्काको योगदान आफैँमा महत्त्वपूर्ण र गौरवशाली भएकोले न्युजिल्यान्ड सरकारको तर्फबाट यो सम्मान प्रदान गर्न लागिएको’ उल्लेख छ ।

न्युजिल्यान्डको अर्डर अफ मेरिट पाउने खड्का सम्भवतः पहिलो नेपाली मूलका नागरिक हुन् । स्थानीय राजनीति र नेपाली समुदायको सरोकारमा सधैँ अग्रस्थानमा रहेर चासो लिने खड्काले पछिल्लो कोरोनाकाल र त्यसपछिका दिनमा नेपाली विद्यार्थी र समुदायका हितमा निकै महत्त्वपूर्ण कार्य गर्दै आएका छन् । 

उनलाई नेपाल सरकारले वाणिज्यदूत नियुक्त गरेको थियो । त्यसपछि पनि बसाइ, पढाइ र कामका दौरान समस्यामा परेका नेपालीको विषयमा समाधानको बाटो खोज्ने र न्युजिल्यान्ड सरकारसँग सहकार्य गर्ने काममा खड्काले महत्त्वपूर्ण जिम्मेवारी बहन गरेका थिए ।