काठमाडौं । नेपाल साफ यू–१९ च्याम्पियनसिपमा घरेलु टोली भारत रहेको समूह ‘बी’ मा परेको छ । आगामी मे ९ देखि १८ सम्म भारतको अरुणाञ्चल प्रदेशमा तेस्रो संस्करणको साफ यू–१९ च्याम्पियनसिप हुँदैछ ।

सोही च्याम्पियनसिपका लागि मंगलबार काठमाडौंमा भएको ड्रमा नेपाल आयोजक भारतको समूहमा ‘बी’ मा परेको हो । यस साफमा आयोजक भारतसहित नेपाल, बंगलादेश, भुटान, माल्दिभ्स र श्रीलंकाले प्रतिस्पर्धा गर्दै छन् । नेपालको समूहमा श्रीलंका छन् ।

अर्को समूह ‘ए’ मा बंगलादेश, भुटान र माल्दिभ्स छन् । सन् २०२३ मा नेपालमा नै भएको साफ यू–१९ च्याम्पियनसिपमा भारतले पाकिस्तानलाई हराउँदै उपाधि उचालेको थियो ।

सन् २०२४ मा भने यू–२० साफ च्याम्पियनसिप भएको थियो । समूहका शीर्ष दुई टोली सेमिफाइनलमा पुग्ने समीकरण छ । लिगकम नकआउटका आधारमा हुने यस साफमा कुल ९ खेल हुनेछन् । खेलहरू आरुणाञ्चल प्रदेशको युपियास्थित गोल्डन जुब्ली स्टेडियममा हुनेछन् ।