पोखरा । नेपाली कांग्रेसका महामन्त्री गगन थापाले सरकारले निराशा चिर्न परिणाममुखी काम गर्न नसक्नु अहिलेको कमजोरी रहेको बताएका छन् । पोखरामा भइरहेको १२औँ एनसेल फाउन्डेसन नेपाल लिटरेचर फेस्टिभलमा अन्तरसंवादका क्रममा उनले यस्तो बताएका हुन् । 

फेस्टिभलमा ‘निराशा : व्याख्या र वास्तविकता’ सत्रमा वक्ता रूपमा बोल्दै थापाले सरकारमा सेन्स अफ अर्जेन्सी नभएको विचार राखे । ‘‘निराशालाई चिर्नका लागि एक्सन र रिजल्टबाट हुनुपर्ने कुरामा मजाले मस्ती छ, मसँग संख्या छ, दुईतिहाइ छ भनेको जस्तो देखिन्छ । सेन्स अफ अर्जेन्सी देखिँदैन,’’ गगनले भने । 

सहजकर्ता तथा पत्रकार उमेश चौहानको प्रश्नको जवाफ दिँदै सत्रमा आएर आफूले प्रश्न गरिरहँदा सरकारको कमीकमजोरीबाट आफू पनि भाग्न नमिल्ने गगनको भनाइ थियो । 

‘‘त्यो नदेख्दै गर्दा मेरो पनि प्रश्न नै प्रश्न छ तर यसको अर्थ मैले यहाँ प्रश्न गरे यो गरे भन्ने होइन, म सरकार सञ्चाल गर्ने जिम्मेवार ठाउँमा भएकाले मेरो संलग्नता भए पनि नभए पनि यसभित्र भएका कमीकमजोरीबाट म भाग्न हुँदैन भाग्दिनँ, यसको सबै दोष पनि मैले यहाँबाट भोगेर जानुपर्छ,’’ गगनले भने । 

यस्तै दर्शकबाट गगनलाई प्रदेशप्रति किन निराशा भइरहेको भन्दै प्रश्न गरेका थिए । यसको जवाफ दिँदै थापाले प्रदेशलाई ‘स्केप गोट’ (बलिको बोका) बनाउन खोजेको उत्तर दिए । 

‘‘हामीले संघले प्रदेशलाई दिनुपर्ने अधिकार केही पनि नदिईकन संघीयताको सही अभ्यास नगरीकन फेरि एउटा ‘स्केप गोट’ प्रदेशलाई बनाउन खोजिरहेका छौँ,’’ गगनको जवाफ थियो । 

निराशाकै बीचमा आशा रहेको टिच फर नेपाल फेलोसिपकी सहसंस्थापक एवं प्रमुख कार्यकारी अधिकृत स्वस्तिका श्रेष्ठले भनिन् । ‘‘समुदायमा आशा पनि छ निराशा पनि छ । आशालाग्दा कुरा पनि छ अप्ठ्यारो पनि छन् । तर हाम्रो प्राथमिकता के हुन्छ भने यो कसको जिम्मेवारी हो,’’ स्वस्तिकाले भनिन् । 

सत्रमा वक्ताका रूपमा बोल्दै राजनीतिशास्त्रमा विद्यावारिधि गरेका सोसल साइन्स बहाःका सह–निर्देशक जीवन बानियाँले नेपालमा मात्र निराशा रहेको देश नभएको सुनाए । तर, निराशाको विन्दु र तत्त्वहरू मुख्य रहेको उनको भनाइ थियो ।