काठमाडौं । नेपाली कांग्रेसका सभापति शेरबहादुर देउवा र महामन्त्रीद्वय गगन थापा र विश्वप्रकाश शर्माबीच भेटवार्ता भएको छ । मंगलबार बिहान ९ः३० देखि करिब एक घण्टा चलेको छलफलमा आसन्न उपनिर्वाचन, उमेदवारको छनोट, उनीहरूको आफ्नो क्षेत्रमा प्रभाव र पार्टीले खेल्नुपर्ने भूमिकाका विषयमा कुराकारी भएको एक महामन्त्रीले जानकारी दिए ।

ती महामन्त्रीका अनुसार, सभापति देउवाले मन्त्रिपरिषद्को पुनर्गठनसहितका चर्चामा रहेका विषयमा भने कुनै जानकारी गराएनन् । कांग्रेसबाट सरकारमा सहभागी मन्त्री हेरफेर हुन लागेका हुन् ? भन्ने प्रश्नमा उनले भने, “बाहिर त्यस्तो चर्चा भएको छ, तर सभापतिज्यूले त्यस्तो विषयमा कुनै जानकारी गराउनुभएको छैन ।”

सभापति देउवाले आफू लामो समय डडेलधुरातिर रहेकाले उपनिर्वाचनसहितका विषयमा अपडेट लिन र केही सुझाव दिने प्रयोजनका निम्ति बैठकमा डाकेको ती महामन्त्रीको भनाइ छ ।

सभापति देउवा डडेलधुराका गाउँगाउँ घुमेर काठमाडौं फर्किएपछि सोमबार (हिजो) प्रधानमन्त्री केपी शर्मा ओलीसँग भेटवार्ता गरेका थिए । प्रधानमन्त्री ओली र देउवाबीच सरकारमा रहेका मन्त्रीहरूका कार्यको समीक्षा गरी प्रभावकारी हुन नसकेकालाई फेर्ने विषयमा कुराकानी भएको चर्चा थियो । तर, देउवाले महामन्त्रीद्वयसँग उक्त विषय नराखेकाले तत्काललाई मन्त्री हेरफेरको निर्णय नहुने संकेत मिलेको छ ।