काठमाडौं । प्रि–क्वार्टरफाइनलको अन्तिम खेलमा कप्तान क्रिस्टियानो रोनाल्डोले पेनाल्टीमा गोल गर्न असफल रहे पनि पोर्चुगलले स्लोभेनियालाई टाइब्रेकरमा हराउँदै अन्तिम–८ मा स्थान निश्चित ग¥यो । 

स्लोभेनियाविरुद्ध निर्धारित समय गोलरहित बराबरीमा सकिएपछि खेल अतिरिक्त समयमा धकेलिएको थियो । अतिरिक्त समयको १०५औँ मिनेटमा पोर्चुगलले पेनाल्टी अवसर पाए पनि रोनाल्डोको प्रहार स्लोभेनियाका गोलकिपरले विफल बनाएका थिए । खेलको निर्धारित र अतिरिक्त समय गोलरहित बराबरीमा समाप्त हुँदा टाइब्रकेरमा पोर्चुगलले ३–० को जितसहित क्वार्टरफाइनल यात्रा सुनिश्चित गरेको हो । योसँगै प्रतियोगिताको क्वार्टरफाइनलमा प्रतिस्पर्धा गर्ने आठ वटै टिमको टुंगो लागेको छ ।

प्रतियोगिताको १७औँ संस्करणमा स्पेन, स्वीट्जरल्यान्ड, जर्मनी, टर्कीया, इंग्ल्यान्ड, नेदरल्यान्ड्स, पोर्चुगल र फ्रान्स क्वार्टरफाइनल यात्रा तय गर्न सफल रहे । प्रतियोगिताको क्वार्टरफाइनल खेलहरू जुलाई ५ देखि सुरु हुनेछन् ।

प्रतियोगिताको क्वार्टरफाइनलमा यसपटक जर्मनीविरुद्ध स्पेन र फ्रान्सविरुद्ध पोर्चुगल सबैभन्दा प्रतिक्षित खेल बनेको छ । प्रतियोगिताको क्वार्टरफाइनल खेलमा साविक उपविजेता इंग्ल्यान्डले स्वीट्जरल्यान्डविरुद्ध खेल्नेछ । इंग्ल्यान्डले अन्ति–१६ को खेलमा स्लोभाकियाको चुनौती २–१ ले पन्छाएको थियो । यता, स्वीट्जरल्यान्डले भने प्रि–क्वार्टरफाइनलमा साविक विजेता इटालीको चुनौती २–० ले पन्छाउँदै सनसनी मच्चाएको थियो ।

सेमिफाइनल प्रवेशका लागि नेदरल्यान्ड्सले टर्कीयालाई प्रतिद्वन्द्वीको रूपमा पाएको छ । प्रतियोगिताको प्रि–क्वार्टरफाइनलमा नेदरल्यान्ड्सले रोमानियाविरुद्ध ३–० को सहज जित निकालेको थियो । टर्कीयाले अस्ट्रियाविरुद्ध २–१ को जित हासिल गरेको थियो ।

यस्तै, सेमिफाइनल प्रवेशका लागि घरेलु टिम जर्मनीले सन् २००८ र २०१२ मा लगातार च्याम्पियन बनेको स्पेनविरुद्ध प्रतिस्पर्धा गर्नेछ । अन्तिम–१६ को खेलमा स्पेनले जर्जियाविरुद्ध ४–१ को सहज जित निकालेको थियो । जर्मनीले भने डेनमार्कविरुद्ध २–० को जित निकालेको थियो । यी दुई टिमबीचको खेल जुलाई ५ मा हुनेछ । 

जुलाई ६ मा फ्रान्ससामु पोर्चुगलले चुनौती प्रस्तुत गर्नेछ । रुस विश्वकप–२०१८ को विजेता र कतार विश्वकप–२०२२ को उपविजेता फ्रान्सले प्रि–क्वार्टरफाइनलमा बेल्जियमविरुद्ध १–० को जित निकालेको थियो । पोर्चुगलले स्लोभेनियाविरुद्ध पेनाल्टी सुटआउटमा जित निकालेको थियो ।