काठमाडौं । नेकपा (एकीकृत समाजवादी) ले पदाधिकारी र केन्द्रीय सदस्य अपुरै राख्दै महाधिवेशन सकेको छ । 

पाँच दिनसम्म चलेको महाधिवेशनले पुरै पदाधिकारी र केन्द्रीय कमिटी चुन्न सकेन । महाधिवेशनको हलबाट बिहीबार अध्यक्षमा माधवकुमार नेपाल र महासचिवमा घनश्याम भुसाल सर्वसम्मत् चयन भए । 

‘सम्मानित नेता’कै स्थानमा दोहोरिए, झलनाथ खनाल । महाधिवेशनबाट २१ पदाधिकारी र २९९ केन्द्रीय सदस्य चुन्नुपर्ने थियो । तर, बाँकी १८ पदाधिकारीसहित केन्द्रीय सदस्य सहमतिमा टुंग्याउने नेताहरूको प्रस्ताव महाधिवेशनको हलले अनुमोदन गरेको थियो । 

शुक्रबार केन्द्रीय समितिको टुंगो लगाउने नेताहरूको वचन थियो । सचिवालय बैठक शुक्रबार दिउँसोसम्म बस्दा पनि सहमति हुन सकेन । पदाधिकारीबारे मौन बसेरै अध्यक्षमण्डलका अध्यक्ष झलनाथ खनालले ९३ जना केन्द्रीय सदस्यको नाम वाचन गरे । 

९३ जनाको नाम मात्रै पढिएपछि हलमा असन्तुष्टिको स्वर पनि सुनिएको थियो । महाधिवेशन हलमा केही प्रतिनिधिहरूले विधि मिचिएको भन्दै विरोध गरे ।  “विधि मिचेर नाम पढियो । टीका लगाएर बनाइने केन्द्रीय सदस्य मान्य छैन,” एक महाधिवेशन प्रतिनिधिले हलमा भने । अधिकांश प्रतिनिधि सहमतिकै पक्षमा उभिए । 

नेताहरूले सर्वसहमतिको नाममा ‘थामथुम’ पार्दै सचिवालय बैठकको निर्णय अनुमोदन गराए ।  बाँकी निर्णयको जिम्मेवारी नवनिर्वाचित केन्द्रीय कमिटीले पाएको छ । बाँकी केन्द्रीय सदस्यहरू १० दिनभित्रै टुंग्याउने नेता राजेन्द्र पाण्डेले जानकारी दिए ।

निर्वाचित केन्द्रीय सदस्यहरूको पहिलो बैठक शनिबार दिउँसो १ बजे बोलाइएको छ । बैठक पार्टी कार्यालय आलोकनगरमा बस्नेछ । अध्यक्ष नेपालले उपाध्यक्ष, सचिवलगायतका पदमा आकांक्षी धेरै भएकाले कुरा मिल्न नसकेको बताए ।

उपाध्यक्षमा ७ पद भएपनि दोब्बर नेताहरूले आकांक्षा राखेको पनि सुनाए । त्यस्तै सदस्य टुंग्याउन क्लस्टरहरूमा कुरा नमिलेका कारण सबै घोषणा गर्न नसकिएको नेपालको भनाइ थियो । 

“सहमतिमा नाम ल्याउन सकेनौं । २९९ केन्द्रीय सदस्य बनाउनुपर्नेछ । ६–८ सयको दाबी छ । कुनै क्लस्टरले मिलाए होलान् । अधिकांश मिलेन,” अध्यक्ष नेपालले भने, “पार लागेन भने मतदानको प्रक्रियाबाट टुंग्याउने सोचेका थियौं । तर, समस्या देखिए । प्रदेशका जिम्मेवार नेतासँग सोध्यौ, अझै समय लाग्ने पायौं ।”

त्यसैले सहमतिबाट पहिलेको पोलिटब्यूरो, प्रदेशका अध्यक्षहरूलाई मिलाएर ९३ जनाको नाम प्रस्ताव गरिएको सुनाए । बाँकी पदमा टिका  लगाएर मनोनीत नगर्ने भन्दै नव निर्वाचित कमिटीबाट त्यसको टुंगो लगाइने नेपालले जानकारी दिए । 

निर्वाचन कानुन, पार्टीको विधानलाई ध्यानमा राखेर महाधिवेशन टुंग्याइएको उनको भनाइ छ ।

सरकार फेरबदलले राष्ट्रिय राजनीतिमा पार्टीको खोजी भइरहेकाले पनि महाधिवेशन छिट्टै टुंग्याउनुपर्ने बाध्यता रहेको उनले हलमा सुनाए । 

नेपालले भने –अरुले जस्तै विधि अबलम्बन गर्नुपर्‍यो 

पार्टीका पदाधिकारीले भने अध्यक्षमा नेपाल र महासचिवमा भुसालको पद सुनिश्चित गर्न महाधिवेशन गरिएको टिप्पणी गरेका छन् । नेकपा (एमाले)सँग पार्टी विभाजन गरिएको तीन वर्ष नपुग्दै एकीकृत समाजवादीले १० औं महाधिवेशन गरेको हो ।

“अध्यक्षमा नेपाल र महासचिवमा भुसालको पद सुनिश्चित गर्न मात्रै महाधिवेशन भए जस्तो देखियो । केन्द्रीय सदस्य र पदाधिकारी नै नटुंग्याइ सहमतिका नाममा विधि मिचियो,” महाधिवेशन प्रतिनिधिको गुनासो छ ।

अध्यक्ष नेपालले अरु पार्टीको जस्तै आफूहरूले पनि सोही शैली अपनाइएको स्वीकार गरे । भोटिङ गर्दा महाधिवेशन लम्बिने र खर्च बढ्ने भएकाले अधुरै रुपमा महाधिवेशन सक्नुपर्ने बाध्यता अध्यक्ष नेपालले सुनाए ।

“हामीले सोचेजस्तो सबै कुरा हुँदैन । इलेकट्रोनिक भोटिङ मेसिन तयार नगरेका पनि होइनौं । त्यो पनि सजिलो रहेनछ । घण्टौं लाग्दो रहेछ,” उनले भने, ‘‘एक दिन बढ्दा पनि खर्च व्यवस्थापन र थुप्रै समस्याहरू पर्दारहेछन् ।’’ 

अध्यक्ष नेपालले भनेजस्तै २०७८ पुसमा नेकपा (माओवादी केन्द्र), गत जेठमा जनता समाजवादी पार्टी, नेपालकै महाधिवेशन त्यस्तै ढंगबाट सकिएको थियो । तिनले पदाधिकारी र कमिटीहरू अधुरै छाड्दै अधिवेशन सकेका थिए ।