काठमाडौं । क्यानडाको टोरोन्टोको डन्डास स्क्वायरमा २५५८औं बुद्धजयन्ती मनाइने भएको छ ।  ह्योल्मो सोसाइटी अफ क्यानडाले नेपाली जनजाति (आदिवासी) एसोसिएसन अफ क्यानडासँगको सहकार्यमा मे २५ मा २५५८औं बुद्धजयन्तीका अवसरमा टोरोन्टोको डन्डास स्क्वायरमा कार्यक्रम गर्ने भएको छ । 

वैशाख शुक्लपक्षको पूर्णिमाको दिनमा गौतम बुद्धको जन्म, महाबोधी ज्ञान लाभ र महापरिनिर्वाणको त्रिसंयोग दिवसलाई विश्वभर बुद्धजयन्तीका रूपमा मनाउने गरिन्छ । कार्यक्रमबारे जानकारी दिँदै ह्योल्मो सोसाइटी अफ क्यानडाका अध्यक्ष विश्व स्याङ्वा ह्योल्मोले नेपालको संस्कृति जोगाउन र नयाँ पुस्तालाई आफ्नो संस्कृतिको बारेमा जानकारी गराउन विभिन्न कार्यक्रम गर्न लागेको बताए । 

उनले मे २५ मा बुद्धजयन्ती क्यानडाको टोरोन्टोको डन्डास स्क्वायरमा मनाउन लागेको बताए । कार्यक्रममा यस वर्ष विशेष बौद्ध बज्रयान–महायानी धार्मिक तान्त्रिक नृत्य, ह्योल्मो सांस्कृतिक नृत्य प्रस्तुति, द्विप ‘क्षेमी’ प्रज्वलन तथा लामा गुरुबाट बुद्धको पूजा तथा शान्ति प्रार्थना गरी भगवान गौतमबुद्धको स्मृति र सम्मानमा उनका शान्तिका सन्देशहरु सम्प्रेषण गरी २५६८औं बुद्ध जयन्ती महोत्सव हुने बताए ।

उनले नयाँ पुस्तालाई बुद्ध धर्मको बारेमा जानकारी गराउने, आफ्नो धर्म, संस्कृतिको बारेमा जानकारी दिने उद्देश्यले कार्यक्रम गर्न लागेको बताए । यसले नेपालमा पर्यटन प्रवर्द्धनमा मद्दत पुग्ने उनको विश्वास छ । ह्योल्मो सोसाइटी अफ क्यानडाले प्रत्येक वर्ष बुद्धजयन्तीमा छोग्फुल कार्यक्रम आयोजना गर्दै आएको उनले बताए ।