काठमाडौं । नेकपा (एकीकृत समाजवादी)का नेता प्रेम आले पार्टीको महाधिवेशन सुरु हुँदा भारत भ्रमणमा थिए । नेकपा एसको महाधिवेशन सकिनुअघि भारतका विभिन्न सहरको भ्रमण सकेर काठमाडौं फर्किएका छन् । उनी नेकपा एस भने नफर्किने बताउँछन् ।

एकीकृत समाजवादीले ९३ सदस्यीय केन्द्रीय कमिटी घोषणा गर्दा आलेको नाम समेटिएको छैन । उनी आठ महिनाअघिदेखि नै पार्टीमा सक्रिय नभएको भन्दै अब माधव नेपालको पार्टीमा नबस्ने बताउँछन् । “यो पार्टीको राजनीतिक दिशा भएन, नेताहरूको हिम्मत पनि देखिएन,” आलेले भने, “त्यहीकारण म यो पार्टीमा विगत आठ महिनादेखि सक्रिय छैन । यस बीचमा म भारत भ्रमण गरेर फर्किएको छु ।”

बिहीबार मात्र दिल्लीबाट काठमाडौं फर्किएका उनी अहिले आफू स्वतन्त्र भएको बताउँछन् । “म पार्टीको काममा छैन । जनताको काम गर्दै छु । अब म जनताकै काममा बढी समय बिताउनेछु,” आलेले बाह्रखरीसँग भने ।

भविष्यमा अरु राजनीतिक दलमा पनि नलाग्ने भन्ने प्रश्नमा उनले भविष्यमा जे पनि हुनसक्ने बताए । कम्युनिष्ट पार्टीमा सक्रिय हुने हो वा डेमोक्र्याट पनि हुने भन्ने प्रश्नमा उनले कुनै विचार बनाएर आफू नबसेको बताए । “भोलि म डेमोक्र्याट पनि हुनसक्छु कम्युनिष्ट पनि हुनसक्छु,” आलेले भने, “अहिलेलाई म स्वतन्त्र छु ।”