नयाँ दिल्ली । भारतकी चर्चित लेखक अरुन्धती रायलाई सन् २०२४ को पेन पिन्टर प्राइज दिइने भएको छ । उनले उक्त पुरस्कार पाउने  घोषणाले आफूलाई खुसी लागेको बताएकी छन् । 

सन् २००९ देखि उक्त प्राइज नोबेल पुरस्कार विजेता तथा प्ले राइटर हेरोल्ड पिन्टरको सम्झनामा दिने गरिएको छ । उक्त पुरस्कार १० अक्टोबर २०२४मा रायलाई दिइनेछ । 

यो पुरस्कार हरेक वर्ष बेलायत र कमनवेल्थ देशबाट प्रतिनिधित्व गर्ने   लेखकलाई दिने गरिएको छ । विश्वभरी एक अडिग तथा साहसी व्यक्ति जसको लेखनमा जीवन र समाजको वास्तविकता झल्किन्छ त्यस्तो लेखकलाई यो पुरस्कार दिने गरिएको छ ।
 
यो पुरस्कारको यस वर्षको जुरीमा पेन संस्थाका अध्यक्ष रुथ बार्थविक, अभिनेता खालिद अबदल्ला र लेखक रोजर रोबिन्सन थिए ।

यो पुरस्कार अरुन्धतीले यस्तो समयमा पाइरहेकी छन जुन समयमा दिल्लीका उपराज्यपाल बीके सक्सेनाले उनीविरुद्ध गैरकानुनी गतिविधि (रोकथाम) अधिनियम अर्थात् यूएपीएअन्तर्गत मुद्दा चलाउने अनुमति दिएका छन् । जुन कानुन आतंककारी गतिविधिविरुद्ध प्रयोग गरिन्छ । 

यो मुद्दा १४ वर्षअघिको उनको एक अभिव्यक्तिलाई लिएर दर्ता गरिएको थियो । बीबीसी