काठमाडौं । नेपाल प्रिमियर लिग क्रिकेट (एनपीएल) मा ‘म्याच फिक्सिङ’ र सट्टेबाजी नहोस् भनी प्रहरीले विशेष निगरानी गर्ने भएको छ । त्यसका लागि प्रहरी प्रधान कार्यालयले विशेष प्रहरी टोलीलाई सादा पोशाकमा परिचालन गर्ने भएको हो ।

नेपाल क्रिकेट संघ (क्यान) को आयोजनामा शनिबारदेखि हुन लागेको फ्रेन्चाइज क्रिकेटमा सहभागी हुन विदेशी खेलाडीसमेत सहभागी हुँदैछन् । क्यानद्वारा आयोजित एनपीएल हालसम्मकै ठूलो घरेलु प्रतियोगिता हो ।

प्रहरी स्रोतका अनुसार, आईसीसीको एन्टी करप्सन युनिटको आग्रहमा प्रहरी प्रधान कार्यालयले सहभागी टीमका खेलाडीहरूको निगरानी र खेल अवधिको विश्लेषण गर्न सादा पोशाकमा प्रहरी खटाएको हो ।

प्रहरी प्रधान कार्यालयले खटाएका प्रहरी टोली सहभागी टीमहरूसँगै बस्नेसमेत प्रहरी प्रधान कार्यालयले जनाएको छ । स्रोतले भन्यो, “एन्टी करप्सन टिमको आग्रहमा हामीले सहभागी टिम हेर्न छुट्टाछुट्टै प्रहरी टोली बनाएर खटाएका छौँ । उनीहरू खेलाडी बसेकै होटलमा बस्नेछन् र सकेसम्म खेलाडीहरूले नचिनून् भन्ने छ ।”

एनपीएलका लागि आईसीसीको एन्टी करप्सन युनिटमा पूर्वप्रहरी नायब महानिरीक्षक ईश्वरबाबु कार्की छन् । कार्की नेतृत्वकै न्युनिटमा रहेर प्रहरीले समेत सहयोग गर्ने छ ।

क्यानका प्रवक्ता छुम्बी लामाले एन्टी करप्सन टिममा सबै आईसीसीकै हुने भएकाले उनीहरूले के–के गरिरहेका छन् भन्ने आफूहरूलाई थाहा नहुने बताए । प्रहरी प्रधान कार्यालय स्रोतले भने आईसीसीको एन्टी करप्सन युनिटसँग काम गर्न एक जना प्रहरी निरीक्षकको नेतृत्वमा टोली पठाएको छ ।

यसअघि २०७९ मा क्यानले आयोजनाका गरेको नेपाल टी–२० लिगमा भने खेलाडीमाथि ‘स्पट फिक्सिङ’को आरोप लागेको थियो । उक्त ‘स्पट फिक्सिङ’मा पूर्वराष्ट्रिय क्रिकेटर मेहबुब आलम र राष्ट्रिय क्रिकेट टोलीका सदस्य आदिल अन्सारी पक्राउ परेका थिए । उनीहरूलाई प्रहरीको केन्द्रीय अनुसन्धान ब्युरो (सीआईबी)ले पक्राउ गरेको थियो ।

हाल दुवैले अदालतबाट सफाई पाइसकेका छन् । तर, आदिल अझैँ टिममा फर्केका छ्रैनन् । क्यान स्रोतका अनुसार, यही मुद्दाका कारण आईसीसीले उनलाई क्लिन–चिट दिन मानेको छैन ।

यसपालिको एनपीएलमा समेत कुनै टिममा छैनन् । आदिलले २०७९ को जेठमा अमेरिकाविरुद्धको खेलबाट राष्ट्रिय टिममा डेब्यू गरेका थिए ।

नेपाल टी–२० लिगमा उनी जनकपुर रोयल्सबाट सहभागी थिए । उनलाई नेपाली क्रिकेट जगतमा आशा लाग्दा खेलाडीका रूपमा हेरिएको थियो । तर, त्यही प्रकरणबाट उनको खेल–जीवन धरापमा छ । त्यसयता क्यानले आयोजना गरेको एनपीएल पहिलो प्रतियोगिता हो ।

एनपीएलको पहिलो संस्करणमा विराटनगर किंग्स्, जनकपुर बोल्ट्स, काठमाडौं गुर्खाज, लुम्बिनी लायन्स, पोखरा एडभेन्चर्स, कर्णाली याक्स, सुदूरपश्चिम रोयल्स र चितवन राइनोजले प्रतिस्पर्धा गर्नेछन् ।

प्रतियोगिताका आठवटै टिमले आफ्नो ‘मार्की खेलाडी’ घोषणा गरिसकेका छन् भने विदेशी खेलाडी समेत सार्वजनिक गरिरहेका छन् । विराटनगर किंग्स्को मार्की खेलाडीमा सन्दीप लामिछाने, चितवन राइनोजको मार्की खेलाडीमा कुशल मल्ल, जनकपुर बोल्ट्सको मार्की खेलाडीमा आशिफ शेख छन् ।

त्यस्तै काठमाडौं गुर्खाजको मार्की खेलाडीमा करण केसी, लुम्बिनी लायन्सको मार्कीमा राष्ट्रिय टिमका कप्तान रोहित पौडेल, पोखरा एभेन्जर्सको मार्कीमा कुशल भुर्तेल छन् । यसरी नै कर्णाली याक्सको मार्कीमा सोमपाल कामी तथा सुदूरपश्चिम रोयल्समा दिपेन्द्रसिंह ऐरी मार्की खेलाडीका रुपमा छन् ।