काठमाडौं । चिनियाँ रक्षामन्त्री डोङ जुनमाथि भ्रष्टाचारको आरोप लागेको छ । उनीविरुद्ध अनुसन्धान सुरु भइसकेको छ ।

फाइनान्सियल टाइम्सको रिपोर्टअनुसार, चीनका रक्षामन्त्री डोङ जुन पिपुल्स लिबरेसन आर्मी (पीएलए) का वरिष्ठ अधिकारीहरूलाई लक्षित गरेर चलाइएको भ्रष्टाचार विरोधी अभियानमा परेका हुन् ।

रिपोर्टका अनुसार, भ्रष्टाचारका कारण चिनियाँ सेना कमजोर बनिरहेको भय चीनलाई छ । त्यसैले सन् २०२३ देखि चिनियाँ सेनामा भ्रष्टाचार विरोधी अभियान चलिरहेको छ । यस अन्तर्गत हालसम्म नौजना पीएलए जनरल र धेरै अधिकारीहरूलाई हटाइएको छ ।

यसअघि पनि दुई रक्षामन्त्रीमाथि लागेको थियो आरोप

डोङलाई सन् २०२३ मा चीनको रक्षामन्त्री बनाइएको थियो । यसअघि ली साङ्फु चीनका रक्षामन्त्री थिए । पदभार ग्रहण गरेको सात महिनापछि नै लीलाई पदबाट हटाइएको थियो । २९ अगस्ट २०२३ मा एक कार्यक्रममा भाषण दिएपछि उनी बेपत्ता भएका थिए । त्यसपछि सेप्टेम्बरमा उनलाई रक्षामन्त्रीको पदबाट हटाइएको थियो । कम्युनिस्ट पार्टीका अनुसार लीले सैन्य उपकरण खरिदमा अनियमितता गरेका थिए ।

यसअघि, २०२३ मा वेई फेंगेलाई पनि अनुशासन उल्लंघन गरेको आरोपमा कम्युनिस्ट पार्टीबाट निष्कासन गरिएको थियो । वेईमाथि पार्टीको विश्वास तोडेको, सेनाको प्रतिष्ठामा आँच पुर्‍याएको र ठूलो घुस लिएको आरोप लागेको थियो ।

अल्जजिराबाट ।