काठमाडौं । यही मंसिर १६ गते हुने स्थानीय तह उपनिर्वाचनका लागि उमेदवारहरू प्रचारप्रसारमा छन् । मेटा कम्पनीका सामाजिक सञ्जाल फेसबुक र इन्स्टाग्राममा समेत प्रचारप्रसार गरिएको देखिन्छ । 

निर्वाचन आयोगका अनुसार बिहीबार (आज) राति १२ बजेसम्म मात्र उमेदवारहरूले प्रचारप्रसार गर्न पाउँछन् ।

फेसबुकको ‘एड लाइब्रेरी स्पेन्डिङ ट्रयाक’का अनुसार पछिल्ला ३० दिन चुनावी प्रचारका लागि सबैभन्दा धेरै खर्च स्वतन्त्र उमेदवार कवि कुमारले गरेका छन् । उनी कीर्तिपुर नगरपालिकाको मेयरका स्वतन्त्र उमेदवार हुन् । 

कवि कुमारले दुई वटा फेसबुक पेजमार्फत विज्ञापन गरेका छन् । उनले ‘युवा मेयर कवि कुमारलाई जिताऔँ’ नामको फेसबुक पेजमार्फत १३ वटा विज्ञापनमा २२१ अमेरिकी डलर खर्च गरेका छन् । आजको विनिमयदर अनुसार उनले २९ हजार ७२८ रुपैयाँ फेसबुक र इन्स्टाग्राममा विज्ञापनका लागि खर्च गरेका छन् ।

उनले अर्को फेसबुक पेज ‘कवि कुमार’मार्फत चार वटा विज्ञापन गरेका छन् । यी विज्ञापनका लागि उनले एकसय डलरभन्दा कम खर्च गरेका छन् ।

फेसबुकले सार्वजनिक रूपमा उपलब्ध गराउने रिपोर्टअनुसार यही मंसिर १६ गते हुने उपचुनावमा सबैभन्दा धेरै खर्च गर्ने उमेदवार कवि कुमार हुन् ।

फेसबुकले १०० डलरभन्दा बढी खर्चको रकम देखाउँछ, त्योभन्दा कम खर्च गरेको भने देखाएको छैन । फेसबुकमा एक दिएको विज्ञापनका लागि न्यूनतम एक डलर खर्च गर्न पाइन्छ ।

कीर्तिपुर नगरपालिका मेयरमा नेकपा (माओवादी केन्द्र)बाट प्रा.डा. शिवशरण महर्जन उमेदवार छन् । महर्जनले पनि फेसबुक र इन्स्टाग्राममा ६ वटा विज्ञापन गरेका छन् । उनले यी विज्ञापनमा एकसय डलरभन्दा कम खर्च गरेका छन् ।

कीर्तिपुर नगरपालिकाकै मेयरका स्वतन्त्र उमेदवार मिम महर्जनले पनि फेसबुकमा एउटा विज्ञापन गरेका छन् । यो विज्ञापनका लागि उनले सय डलरभन्दा कम खर्च गरेका छन् ।

कीर्तिपुर नगरपालिका–४ को वडा अध्यक्ष पदका लागि स्वतन्त्र उमेदवारी दिएकी पविता खड्का (अधिकारी)को पनि फेसबुकमा विज्ञापन भएको देखिन्छ । अधिकारीको विज्ञापन ‘स्वतन्त्र अभियान कि.न.पा ४’ नामको फेसबुक पेजले गरेको छ । 

यो पेजले अधिकारीसँगै कीर्तिपुर नगरपालिकाको मेयरमा स्वतन्त्र उमेदवारी दिएका दिनेशकुमार अधिकारीको पनि विज्ञापन गरेको छ । यो पेजले उपचुनावका लागि १५ वटा विज्ञापन गरेको छ । यी सबै विज्ञापनमा यो फेसबुक पेजमार्फत एकसय डलरभन्दा कम खर्च भएको देखिन्छ ।

राष्ट्रिय स्वतन्त्र पार्टी (रास्वपा)बाट काठमाडौं महानगरपालिका–१६ की वडा अध्यक्ष उमेदवार रोजिना श्रेष्ठले हालसम्म फेसबुकमा तीन वटा विज्ञापन गरेकी छन् । तीन वटा विज्ञापनका लागि उनले एकसय डलरभन्दा कम खर्च गरेको फेसबुकले देखाउँछ ।

श्रेष्ठका लागि भनेर रास्वपा सांसद गणेश पराजुलीले पनि आफ्नो फेसबुकमार्फत दुई वटा विज्ञापन गरेका छन् । उनले तीन विज्ञापनमा एकसय डलरभन्दा कम खर्च गरेको फेसबुकको विवरणले देखाउँछ ।

फेसबुकले हटायो विज्ञापन
काठमाडौं–१६ का वडा अध्यक्ष पदमा स्वतन्त्र उमेदवारी दिएका पशुपति कठायतले फेसबुकमा एउटा विज्ञापन गरेका छन् । तर, उक्त विज्ञापनले फेसबुकको विज्ञापन निर्देशिका नमानेको भन्दै फेसबुकले नै हटाएको हो । 

त्यसैगरी काठमाडौं–१६ मा राप्रपाका उमेदवार श्यामकृष्ण श्रेष्ठले चुनावी प्रचारका लागि फेसबुकमा सय डलरभन्दा कम खर्च गरेर पाँच वटा विज्ञापन गरेका छन् । तीमध्ये एउटा विज्ञापन फेसबुकले आफ्नो विज्ञापन निर्देशिका नमानेको भन्दै हटाएको छ ।

नेपाली कांग्रेसबाट काठमाडौं–१६ का वडा अध्यक्ष उमेदवार देवेन्द्र पाठकले फेसबुकमा आफ्नो चुनावी प्रचारका लागि राखेको विज्ञापन पनि हटाएको छ । 

हेटौँडा उप–महानगरपालिका–१२ का वडा अध्यक्षका उमेदवार अर्जुनप्रसाद तिवारीले पनि फेसबुकमा विज्ञापन गरेका छन् । ‘अर्जुनप्रसाद तिवारी सचिवालय’ नामको पेजबाट दुई वटा विज्ञापन गरिएको छ । यी विज्ञापनमा पनि सय डलरभन्दा कम खर्च भएको फेसबुकको विवरणमा देखिन्छ ।

यता, गौरीशंकर गाउँपालिका उपाध्यक्ष पदमा उमेदवार बनेकी नेपाली कांग्रेसकी पासादिकी तामाङले पनि ‘पासादिकी तामाङ जिताऔँ' अभियानमार्फत विज्ञापन गरेकी छन् । उनले फेसबुकमा एउटा मात्र विज्ञापन गरेकी छन् ।