काठमाडौं । इलामको सूर्योदय नगरपालिकाबासीले स्वर्गीय भक्तराज आचार्यलाई उनैले गाएका गीतमार्फत् सम्झना गरेका छन् । गायक तथा संगीतकार स्वर्गीय भक्तराज आचार्यको सम्झनामा श्रद्धाञ्जली साँझ कार्यक्रम ‘सम्झनामा भक्तराज’मार्फत् सूर्योदय नगरपालिकाका संगीत अनुरागीहरूले सोमबार उनका एक दर्जन गीत गाएका थिए । 

गायक तथा संगीतकारहरू गणेश पराजुली, विकास चौधरी, भूपेन राई, पुजन प्रधान, रविन गुरुङ, महेश गदाल, बेलकुमार प्रधान, गायिका निर्मला कट्टेल, गायत्रा ओली, सपना थापा मगरलगायतले भक्तराजका गीत गाएका थिए । 

उनीहरूले भक्तराजका ‘मुटु जलिरहेछ’, ‘जति चोट दिन्छौ’, ‘जहाँ छन् बुद्धका आँखा’, ‘हजार सपनाहरूको’, ‘माया मेरी’, ‘हजार आँखा’, ‘एक दिन मैले प्रभूसँग सोधे’लगायत दर्जनभन्दा धेरै लोकप्रिय गीत कलाकारहरूले गाएका थिए ।

कार्यक्रमको आयोजना सूर्योदय संगीत अनुराग समूहले गरेको थियो ।