1677307579.jpg)
काठमाडौं । नेकपा (एमाले)का उपाध्यक्ष सुवास नेम्वाङले राष्ट्रपति रामचन्द्र पौडेलले नागरिकतासम्बन्धी विधेयक अहिले प्रमाणीकरण गर्नु संसद्माथिको नांगो प्रहार भएको बताएका छन् ।
बिहीबार न्युज एजेन्सी नेपालसँग कुरा गर्दै उपाध्यक्ष नेम्वाङले राष्ट्रपतिबाट नागरिकतासम्बन्धी विधेयक प्रमाणीकरण हुनु जनताको अधिकारसहित संसद्माथिनांगो प्रहार भएको जिकिर गरे ।
नागरिकता विधेयक प्रमाणीकरण गरेर संविधान, कानुन, स्थापित अभ्यास र संसदीय परिपाटीले नचिनेको बाटो हिँड्ने काम गरिएको उनले टिप्पणी गरे । संसद्लाई ‘छेउ पार्ने’ काम गरिएको भन्दै उनले यस्तो गर्नु गलत भएको तर्क गरे ।
उपाध्यक्ष नेम्वाङले अघिल्लो प्रतिनिधिसभाको कार्यकालमै उक्त विधेयक दोस्रोपटक पेस हुँदा समेत तत्कालीन राष्ट्रपति विद्यादेवी भण्डारीले १५ दिनभित्र प्रमाणीकरण नगरेको उल्लेख गरे । विधेयक उति बेलै निष्क्रिय भएको उनको भनाइ छ ।
निष्क्रिय भएको विधेयकलाई मन्त्रिपरिषद्ले प्रमाणीकरणका लागि सिफारिस गर्न नमिल्ने उनको तर्क छ ।
नयाँ प्रतिनिधिसभा समेत आइसकेको अवस्थामा संसद्बाट सभामुख र राष्ट्रियसभा अध्यक्षले विधेयक सिफारिस गर्नुपर्ने संवैधानिक व्यवस्थाको समेत उल्लंघन भएको जिकिर उनले गरे ।
उनले नागरिकता प्रमाणीकरणको विषयलाई लिएर एमाले जनतासामु जाने पनि बताए । यो विषय संसद्मा पनि उठाउने उनले उल्लेख गरे । नेम्वाङले यो विषयले अदालतमा प्रवेश पाउन सक्ने संकेत समेत गरे ।
“अहिले उठेका विषयहरूलाई हामी जनताको बीचमा लैजान्छौँ । हामी संसद्मा उठाउँछौँ । यस्ता कतिपय विषयहरू आवश्यक पर्दा अदालतमा प्रवेश पाएका छन्,” उनलेभ भने, “सबै ढंगले हामी यी विषयहरूमा सशक्त ढंगले जनताको बीचमा प्रस्तुत हुन्छौँ । सचिवालय बैठक भोलि बस्दै छ । यी सबै सन्दर्भहरूमा हामी एउटा निष्कर्षमा पुग्छौँ ।”
देशमाथि सबैतिरबाट प्रहारहरू भइरहेको भन्दै उनले यस्तो अवस्थामा सबै राजनीतिक दलका बीचमा राष्ट्रिय विषयमा एकताको आवश्यकता औँल्याए ।
