काठमाडौं । प्रधानमन्त्री पुष्पकमल दाहाल ‘प्रचण्ड’ले राष्ट्रपति रामचन्द्र पौडेलले नागरिकता विधेयक प्रमाणीकरण गर्ने विश्वास व्यक्त गरेका छन् ।

शनिबार प्रतिनिधिसभा बैठकमा उनले अघिल्लो राष्ट्रपति विद्यादेवी भण्डारीले दुईपटक ‘होल्ड’ गरेको नागरिकता विधेयक वर्तमान राष्ट्रपतिले प्रमाणीकरण गरेर समस्या समाधान गर्नेमा आफू विश्वस्त रहेको बताए ।

उनले मन्त्रिपरिषद्बाट उत्पत्ति भएको विधेयक मन्त्रिपरिषद्कै निर्णयबाट पुनः प्रमाणीकरणका लागि पठाइएको बताए ।

“दुवै सदनबाट पारित भएर राष्ट्रपतिकोमा पुगेको र राष्ट्रपति कार्यालयमाा होल्ड भएर बसेको थियो । खारेज गर्ने प्रावधान पनि संविधानमा थिएन । फिर्ता गर्ने प्रावधान पनि थिएन,” उनले भने, “होल्डमा रहेको भएकाले समाधान कसरी गर्ने भन्दा जहाँबाट उत्पति भएको त्यसैले खोजी गर्नु नै सबैभन्दा वस्तुवादी र वैज्ञानिक हुन्छ भन्ने निष्कर्षसहित उत्पति क्याबिनेटबाट भएको नागरिकता विधेयकलाई क्याबिनेटले विगतको यथार्थ विवरणलाई राष्ट्रपतिसमक्ष प्रमाणीकरणको निम्ति अनुरोध गर्ने निर्णय गरिएको छ । र, पत्र राष्ट्रपतिकोमा पुगेको छ । मलाई विश्वास छ, राष्ट्रपतिले प्रमाणीकरण गरेर नागरिकता समस्या समाधान गर्नुहुन्छ भन्ने विश्वास छ ।”

राष्ट्रपति पौडेलले भने विधेयक प्रमाणीकरण गर्दा कानुनी अड्चन आउने आशंकामा कानुनविद्सँग छलफल गरेका छन् ।