काठमाडौं । धादिङ र झापामा भएका दुई छुट्टाछुट्टै दुर्घटनामा दुईजनाको मृत्यु भएको छ । धादिङको गल्छि गाउँपालिका ७ मा गएराति बसको ठक्करबाट मोटरसाइकल चालकको मृत्यु भएको हो । 

थाक्रे गाउँपालिका ११ बस्ने २५वर्षीय सुनील थापाको मृत्यु भएको हो । गम्भीर घाइते भएका थापाको उपचारको लागि अम्बेभरोसा अस्पताल गल्छी लैजादै गर्दा बाटोमै मृत्यु भएको प्रहरीले जनाएको छ । 

घाइते भएका पछाडि सवार ३४ वर्षीय रमेश लामाको सोही अस्पतालमै उपचार भइरहेको छ । 

झापाको शिवसताक्षी नगरपालिका ९ मिलन चोकमा गएराति यात्रु बसको ठक्करबाट मोटरसाइकल चालकको मृत्यु भएको छ । पश्चिमबाट पूर्वतर्फ जाँदै गरेको मे १ ख २३२१ नम्बरको यात्रुबाहक बसले बिपरित दिशाबाट आउँदै गरेको प्र १ ०१ ०१२ प ४९९६ नम्बरको मोटरसाइकललाई हिजो साँझ ६ बजे ठक्कर दिएको थियो । 

दुर्घटनामा गम्भीर घाइते भएका झापाकै दमक नगरपालिका ६ का २३ वर्षीय रोनी बोसको उपचारको क्रममा विर्तामोड स्थित वी एण्ड सी अस्पतालमा पौने ७ बजे  मृत्यु भएको हो  ।