काठमाडौं । फुटबलबाट परिचित स्पेनको घरेलु लिगमा दुई चिरप्रतिद्वन्दी क्लब छन्, बार्सिलोना र रियाल मड्रिड । यी दुईको प्रतिस्पर्धा विश्वभरका सर्मथकमाझ ‘एल क्लासिको’ को रूपमा परिचित छ । जसको अर्थ हुन्छ ‘उच्चतम गुणस्तर र उत्कृष्ट मानिएको’ ।

नेपाली खेलकुदमा जारी क्रिकेट प्रतियोगिता नेपाल प्रिमियर लिग (एनपीएल)मा अहिले यो शब्द निक्कै प्रयोगमा देखिन्छ । फुटबल प्रतियोगिता नभए पनि एनपीएलका दुई टोलीबीचको प्रतिस्पर्धाले पहिलो संस्करणमै ‘एल क्लासिको’ उपनाम पाइसकेको छ । अर्थात ‘उच्च गुणस्तरको आफ्नो क्षेत्रमा उत्कृष्ट मानिएको’ ।

एनपीएलको त्यो प्रतिस्पर्धा हो, पश्चिम नेपालको प्रतिनिधित्व गरिरहेको सुदूरपश्चिम रोयल्स र मधेसको प्रतिनिधित्व गरिरहेको जनकपुर बोल्ट्सबीचको । सामाजिक सञ्जालदेखि कीर्तिपुरमा उपस्थित दर्शक समेत, यी दुई टिमबीचको प्रतिस्पर्धालाई ‘एल क्लासिको अफ नेपाली क्रिकेट’ को उपमा दिने धेरै छन् ।

“म सुदूरपश्चिमको समर्थक हुँ । तर, सुदूरपश्चिमले जनकपुरसँग खेल्दाबाहेक खेल हेर्न आएको छैन । सुदूरपश्चिम र जनकपुरको खेललाई नेपाली क्रिकेटको एल क्लासिको नै भन्दा हुन्छ,” बुधबार प्रतियोगिताको पहिलो क्वालिफायर हेर्न मैदान पुगेका आफूलाई सुदूरपश्चिमको समर्थकका रूपमा चिनाउने एक दर्शकले भने । त्रिवि क्रिकेट मैदानमा बुधबार यही खेल हेर्न भनेर उपस्थित दर्शक ओइरो हेर्नलायक थियो ।

बुधबारको पहिलो क्वालिफायरमा जनकपुरविरुद्ध आठ विकेटको सहज जित निकाल्दै सुदूरपश्चिमले एनपीएल पहिलो संस्करणको फाइनलमा स्थान बनाइसकेको छ । यी दुई टोलीबीच बुधबार भएको प्रतिस्पर्धा भने दर्शकको आशा र पाएको उपनामलाई भने न्याय गर्न सकेन ।

कीर्तिपुरस्थित त्रिवि क्रिकेट मैदानमा सम्पन्न खेलमा टस जितेर जनकपुरले ब्याटिङको निर्णय गर्दै २० ओभरमा १३९ रनको योगफल खडा गरेको थियो, नौ विकेट गुमाएर । १४० रनको लक्ष्यसहित जवाफी ब्याटिङमा आएको सुदूरपश्चिमले १८.३ ओभरमै जित निकालेपछि फाइनल यात्रा तय गरेको हो ।

खेलअघि सबैको अपेक्षा थियो– प्रतिस्पर्धा कडा हुनेछ । तर, ओपनर विनोद भण्डारीले प्रतियोगितामा आफ्नो पहिलो अर्धशतक बनाएपछि सुदूरपश्चिम दोस्रो इनिङभर जनकपुरका बलरमाथि हाबी रह्यो । सुदूरको जितमा ‘प्लेयर अफ दी म्याच’ समेत चुनिएका विनोदले ५८ रन बनाए । ओपनिङमा आएका विनोद जितसम्म अविजित रहे । यसक्रममा उनले समान तीन चौका र छक्का प्रहार गरे । यही प्रदर्शनबाट उनी खेलको ‘प्लेयर अफ दी म्याच’ समेत चुनिए ।

“यसअघि पनि सुरुआत राम्रो पाइरहेको थिए । तर, फिनिस भइरहेको थिएन । तर आज अन्तिमसम्म खेल्नुपर्छ भन्ने थियो । अहिले सुदूरपश्चिमले राम्रो खेलिरहेको छ । त्यसैले सुदूरपश्चिमले फाइनल डिजर्भ गर्छ जस्तो लाग्छ,” जितपछि विनोदले भने ।

प्रतियोगितामा आठौँ खेल खेल्दा सुदूरपश्चिमले निकालेको यो सातौँ जित हो । लिग चरणमा चितवन राइनोजविरुद्धबाहेक सुदूरपश्चिमले प्रतियोगिताका कुनै पनि टिमसँग हार बेहोरेको छैन ।

यता, अनिल साहको कप्तानीमा रहेको जनकपुर भने एनपीएलका पहिलो चार खेल यता जितको लय कायम राख्न संघर्षरत छ । जनकपुरले प्रतियोगितामा लगातार चार जित निकालेको थियो । तर, त्यसयता चार खेल खेल्दा जनकपुरले एक खेलमा मात्र जित निकालेको छ । अझ नियमित कप्तान अनिल साह चोटका कारण बाहिरिनु जनकपुरलाई ठूलै घाटा बनेको छ । लिग चरणको अन्तिम खेलमा चितवन राइनोजविरुद्ध आउट भएपछि निराश अनिलले आफ्नै हातमा ब्याट बजार्न पुगे । उनको औँलामा चोट लागेको छ ।

“ट्वान्टी–२० मा जसले कम गल्ती गर्छ । त्यही टिमले खेल जित्छ । हामीले बलिङ र ब्याटिङ दुवैमा केही सुधार गर्न आवश्यक छ । पछिल्लो खेलमा पनि हामीले देखिरहेका छौँ,” हारपछि नियमित कप्तान नहुँदा कप्तानी जिम्मेवारी पाएका आसिफ सेखले भने, “अनिल दाई नेपालकै सबैभन्दा उत्कृष्ट ब्याटरमध्येका एक हुन् । त्यसमा कुनै शंका छैन । तर, हामीसँग ब्याकअप छ । त्यसैले खासै फरक पर्दैन ।”

प्रतियोगितामा सुदूरपश्चिमविरुद्ध जनकपुरको यो पहिलो हार भने होइन । जनकपुरले यसअघि लिग चरणको खेलमा पनि सुदूरपश्चिमसँग ७२ रनको फराकिलो हार बेहोरेको थियो ।

सुदूरपश्चिमसँगको हारका बाबजुद जनकपुरको सम्भावना समाप्त भइसकेको छैन । जनकपुरले अब दोस्रो क्वालिफायरमा बिहीबार कर्णाली याक्सविरुद्ध प्रतिस्पर्धा गर्नेछ । जसमा जित निकाल्ने टिमले उपाधिका निम्ति सुदूरपश्चिम प्रदेशसँग प्रतिस्पर्धा गर्नेछ । अर्थात् फाइनलमा सुदूरपश्चिमसँग नै खेल्ने जनकपुरको सम्भावना अझै छ । यो सम्भावनाप्रति सबैभन्दा विश्वस्त छन्, आसिफ सेख । उनले बुधबार फाइनलमा सुदूरपश्चिमलाई नै हराएर उपाधि जित्ने प्रतिक्रिया दिए ।

“उनीहरूको टिम धेरै राम्रो छ । हाम्रो टिम पनि राम्रो छ । हाम्रो भेट फाइनलमा हुन्छ र उपाधि हामीले जित्छौँ भन्ने हामीलाई विश्वास छ,” आसिफले थपे ।

फाइनल पुग्न जनकपुरले दोस्रो क्वालिफायर खेल्न बाँकी नै छ । तर, जे होस्, प्रतियोगितामा हालसम्म जनकपुरविरुद्ध सुदूरपश्चिमले २–० को अग्रता बनाएको छ ।