![एन्फाको बजेट करिब ९५ करोड](https://12khari.top/uploads/posts/Anfa extra ordinary1664385539.jpg)
काठमाडौं । अखिल नेपाल फुटबल संघ (एन्फा) को विशेष साधारण सभाले बुधबार आर्थिक वर्ष २०७९/८० का लागि अनुमानित ९४ करोड ८८ लाख ८८ हजार ५८८ रुपैयाँ बजेट पास गरेकाे छ ।
एन्फाले आगामी आर्थिक वर्षमा ९२ करोड ५१ लाख ८२ हजार ४७० रुपैयाँ खर्च हुने अनुमान गरेको छ ।
एन्फा कार्यसमितिले पेस गरेको बजेटलाई साधारण सभाले पास गरेको हो । एन्फाका अनुमानित बजेटमा ६१ करोड ५५ लाख रुपैयाँ फिफाबाट र ८ करोड ८० लाख रुपैयाँ एएफसीबाट आउने र बाँकी रकम आन्तरिक स्रोतबाट जुटाउने महासचिव किरण राईले बताए ।
एन्फा विशेष साधारण सभाले आर्थिक वर्ष २०७७/७८ को बजेट पनि अनुमोदन गरेको छ । एन्फाका महासचिव राईका साधारण सभाले आर्थिक वर्ष २०७७/७८ को आम्दानी २५ करोड ५६ लाख ३२ हजार २१६ र खर्च २४ करोड ६९ लाख १८ हजार ९३३ रुपैयाँको लेखा परीक्षण प्रतिवेदनलाई पास गरेको छ ।
त्यस्तै, आर्थिक वर्ष २०७८/७९ को आम्दानी २६ करोड ८३ लाख २१ हजार ९४ र खर्च ४० करोड ६७ लाख ६७ हजार ८४२ रुपैयाँको लेखा परीक्षण प्रतिवेदनलाई विशेष साधारण सभाले अनुमोदन गरेको छ ।
![Global Ime bank](https://baahrakhari.com/uploads/bigyaapan/30885600.gif)
साधारण सभाले आठ वर्षका लागि दीर्घकालीन रणनीतिक योजना र कार्यक्रमलाई परिमार्जनसहित पास गरेको एन्फा महासचिव राईले बताए । त्यस्तै नयाँ कार्यसमितिको ४ वर्षे कार्यकालमा १० देखि १२ स्थानमा टेक्निकल सेन्टर, आर्टिफिसियल टर्फलगायत भौतिक संरचना बनाउने योजनालाई पनि विशेष साधारण सभाले पास गरेको छ ।
अनुशासन समितिमा मोहनकुमार इगनाम संयोजक, बसन्त खान उपाध्यक्ष, हेमकुमार राई, उमेश लाल प्रधान, रमेश नापित रहने गरी असोज १० गते एन्फा कार्यसमितिले गरेको निर्णयले साधारण सभाले अनुमोदन गरेको छ । त्यस्तै सदाचार समितिमा उपेन्द्रकेशरी न्यौपाने संयोजक, अजयकुमार घिमिरे उपाध्यक्ष, माधवबहादुर खपाङ्गी, मनिषा आचार्य, बाबुकृष्ण महर्जन सदस्य रहने गरी कार्यसमितिले गरेको निर्णयलाई पनि अनुमोदन गरेको छ ।
त्यस्तै अशोककुमार पोखरेल अध्यक्ष, गोवद्धनसिंह सम्झना उपाध्यक्ष, विश्वराज राई, उत्तम थापा, विनोदसिंह बस्नेत रहेको पाँच सदस्सीय पुनरावेदन समितिलाई पनि विशेष साधारण सभाले अनुमोदान गरेको छ ।
लेखा परीक्षण तथा अनुपालन समितिको निर्वाचन भने अबको साधारण सभाले निर्णय गर्ने भएको छ । लेखा परीक्षण तथा अनुपालन समितिमा रहने सदस्यको इमान्दारी परीक्षण सदाचार समितिले गर्नु पर्ने र सदाचार समिति नै आजको साधारण सभाले अनुमोदन गरेका कारण ढिलाइ भएको महासचिव राईले बताए ।
पूर्वअध्यक्ष नरेन्द्र श्रेष्ठ एन्फाको मानार्थ अध्यक्ष र किशोर राई मानार्थ वरिष्ठ उपाध्यक्ष बनाउने कार्यसमितिको निर्णयलाई पनि साधारण सभाले अनुमोदन गरेको छ ।
आर्थिक नियमावली २०७५ को संसोधन तथा आर्थिक कार्यविधि संसोधन गर्ने एजेन्डा भने एन्फाले ‘ड्रप’ गरेको महासचिव राईले बताए । उनले फिफाको अनुरोधमा उक्त एजेन्डा कार्यसमितिले ड्रप गरेको र त्यसलाई विशेष साधारण सभाले अनुमोदन गरेको बताए । त्यस्तै स्वास्थ्य सुविधा तथा आर्थिक सहयोग सम्बन्धि मापदण्डको कार्यविधि बनाउने एजेन्डा पनि कार्यसमितिले ड्रप गरेको जनाइएको छ ।
एन्फा एकेडेमी, टेक्निकल तथा ट्रेनिङ सेन्टर संचालन सम्बन्धि कार्यविधि २०७९ पनि अनुमोदन भएको महासचिव राईले बताए । त्यस्तै फुटसल लाइसेनिङ तथा सञ्चालन कार्यविघि २०७९ पनि अनुमोदन गरिएको राईले बताए ।
आजको विशेष साधारण सभाले रूपेश अधिकारी र दीपेन्द्र धिमाल केन्द्रीय सदस्यमा निर्वाचित भएका छन् । गत असार ६ गते सम्पन्न एन्फा निर्वाचनमा १३ खुला सदस्यका लागि भएको निर्वाचनमा चार जना प्रत्यसीको समान ३९ मत आएपछि दुई सदस्यको टुङ्गो लागेको थिएन ।
त्यतिबेला अधिकारी, धिमाल, दीपक थापा र लोकेन्द्र गुरूङले समान ३९ मत पाएका थिए । बुधबार त्रिपुरेश्वरस्थित वर्ल्ड ट्रेड सेन्टरमा सम्पन्न विशेष साधारण सभामा अधिकारीले ५४ र धिमालले ४७ मत पाएका थिए । पराजित लाेकेन्द्र गुरुङले ४५ र दीपक थापाले ७ मत प्राप्त गरेका थिए । निर्वाचित अधिकारी निवर्तमान अध्यक्ष कर्माछिरिङ प्यानलका हुन् भने धिमाल वर्तमान अध्यक्ष पंकजविक्रम नेम्वाङ प्यानलका हुन् ।