पोखरा । चर्चित र्‍यापर आशिष राना उर्फ ‘लाहुरे’ले बिहीबार सामाजिक सञ्जाल फेसबकुमा एउटा पोष्ट शेयर गरे । नेपाल प्रहरीको लोगो राखिएको उक्त पोष्टमा लेखिएको थियो, ‘आइ डेयर, नो ड्रग्स ।’

सँगै लेखिएको थियो, ‘लागूऔषधविरुद्ध सप्ताहव्यापी सचेतना कार्यक्रम ।’ र, यो कार्यक्रमको आयोजक हो, जिल्ला प्रहरी कार्यालय कास्की ।

उनले फेसबुकमा शेयर गरेको यो पोष्टमा अनेकौँ प्रतिक्रिया आए । कतिपयले त उनलाई व्यंग्यसमेत गरे । तर, उनले त्यसलाई सामान्य मान्दै भन्छन्, “यो एउटा रोग हो, अपराध होइन र सेवनकर्ता अपराधी होइनन् ।”

उनले यो लेख्नुपूर्व उनको विगतलाई नियाल्दा उनी लागूऔषधकै मुद्दामा ५६ दिन हिरासतमा बसिसकेका छन् ।

त्यो दिन थियो, २०७८ पुस १४ । कास्की प्रहरीले उनै लाहुरेलाई लागूऔषध मुद्दामा साथीसहित पक्राउ गरेको थियो । लागूऔषध मुद्दामा चर्चित र्‍यापर समातिएपछि तरंग नै उत्पन्न भयो । यो क्षेत्रमा सबैले लागूऔषध किन सेवन गर्छन् भन्ने बहस सुरु भयो । जुन बहस आजपर्यन्त चलिरहेकै छ ।

त्यतिबेला लाउरे आफ्नै गाडीमा थिए । उनले आफ्ना सहयोगीलाई १२ हजार रुपैयाँ दिएर ब्राउन सुगर लिन पठाएका थिए । 
त्यही ब्राउन सुगर लिनेक्रममा उनलाई प्रहरीले भेट्टाएको थियो । पक्राउ गरेर लगिसकेपछि मात्रै प्रहरीले चर्चित सेलिब्रेटी लाहुरे हुन् भन्ने थाहा पाएको थियो ।

तर, त्यतिबेला लाहुरे होसमा थिएनन् । नसामा मस्त उनी प्रहरी भ्यानमा पनि गीत सुनिरहेका थिए ।

त्यही घटनाले उनलाई हिरासतमा पुर्‍यायो ।

१० वर्षदेखि लागुऔषध सेवन गरिरहेका उनले हिरासतमा ५६ दिन कसरी बिताए होलान् ?

बिहीबार त्यही एन्टी ड्रग मुभमेन्ट कार्यक्रममा आयोजित पत्रकार सम्मेलनमा जिल्ला प्रहरी कार्यालय कास्कीमा उपस्थित लाहुरेले भने, “फिजिकल्ली १/२ महिना कठिन हुन्छ, मेन्टल्ली त सँधैका लागि तयार हुनुपर्छ, यो एउटा तपस्या हो ।”

जिल्ला प्रहरी कार्यालय कास्कीकै तथ्यांक हेर्ने हो भने एकपटक लागुऔषध मुद्दामा परेर छुटेपछि फेरि सोही कार्यमा लाग्ने धेरै छन् ।

तर, लाहुरेको हकमा भने यो अपवाद बन्न पुग्यो । कसरी ?

पहिला त उनको आत्मविश्वास नै सबैभन्दा ठूलो कुरा हो । उनले अब म लागुपदार्थ सेवन गर्दिनँ भन्ने आत्मविश्वास बलियो बनाएका छन् ।

त्यसबाहेक उनले सकारात्मक मनोपरामर्श र साथीसंगतले आफू फेरिएको बताए । 

“मानवीय मनोविज्ञान कस्तो हुन्छ भने राम्रो व्यवाहार पायो भने राम्रै हुन्छ, नराम्रो पायो भने नराम्रो । कस्टडीमा रहँदा मैले एकदमै राम्रो संगत पाएँ ५६ दिन बसेपछि नै लागूऔषधविरुद्धको अभियानमा लाग्नुपर्छ भन्ने ठानें । कस्टडीबाट निस्किएपछिको यो मेरो पहिलो प्रेसमिट पनि हो,” उनी भन्छन् ।

उसो त, कास्की प्रहरी नै लाहुरेलाई सकारात्मक मनोपरामर्श दिएर लागूऔषधविरुद्धको अभियन्ता नै बनाउने भन्ने सोचमा पुगेको थियो ।

कास्की प्रहरी प्रमुख रमेश थापा भन्छन्, “हामीले केही कुरा बुझायौँ, केयर गर्‍यौँ, मोटिभेट गर्‍यौँ भने उसलाई सकारात्मक बनाउन सकिन्छ भन्ने सोच थियो । तिमी रोलमोडल भइसकेका छौ, उसका हरेक सकारात्मक कुरालाई लगिदियौँ, भविष्यको लक्ष्य उपलब्धिलाई सम्झायौँ... ।”

लाहुरेले पनि कास्की प्रहरीको मनोपरामर्शले सकारात्मक उर्जा दिएको बताए । 

“तिमी युवाको आवाज हौ भन्नुभयो, काउन्सेलिङ गर्नुभयो” उनले भने, “मैले सकारात्कम रुपमा त्यसलाई लिएँ ।”

आशिष रानाबाट लाहुरे बन्दैगर्दा उनले जति चर्चा, नेम र फेम कमाए, विवादले पनि उनलाई पछि छाडेनन् ।

विगत सम्झिँदै उनी भन्छन्, “१० वर्षअघि नै कलेज पढ्नेबेला मन बढी चञ्चल हुने रहेछ । मन र दिमागको बढी द्वन्द्व चल्ने रहेछ । त्यही द्वन्द्वको कारण म नराम्रो बाटोमा लागेँ ।”

उनले त्यसपछि लागूऔषधलाई निरन्तरता दिए । कहिलेकाहीँ छाड्ने सोच पनि नबनाएका होइनन् । तर, उनले लागुऔषध छाड्छु भन्दैगर्दा लागुऔषधले चाहिँ उनलाई नछाड्ने भइसकेको थियो ।

उनी सम्झिन्छन, “प्रत्येक पटक ड्रग्स लिंदा अब त छोड्छु भन्ने लाग्थ्यो । तर शरीरले सक्दैन, फिजिकल्ली मात्रै नभएर मेन्टल्ली असर गर्ने भएकाले छाड्न नसकिने रहेछ ।”

जतिजति उनको युवावय बढ्दै गयो, चर्चा पनि बढ्न थाल्यो, अनि नशाको मात्रा पनि । तर, उनको उमेर र सिर्जनालाई लागूऔषधले जित्न थाल्यो ।

त्यही कारण उनले विदेशमा हुने कार्यक्रम गुमाए । यतिसम्म कि विमानस्थलमा लागूऔषध लैजान नपाइने भएपछि विदेशको कार्यक्रम क्यान्सिल गर्नेसम्मको अवस्थामा उनी पुगे ।

“लागूऔषध सेवन भनेको सुगरको बिरामीलाई इन्सुलिन दिएजस्तो हो । काममा फोकस पनि भएन । फिलिङ्स नै मर्दोरहेछ । त्यसकै कारण विदेशका कार्यक्रम क्यान्सिल भएको छ,” उनले सुनाए ।

उनले यी सबै कुरा रियलाइज गरे । हिरासतका ती ५६ दिनलाई उनले एउटा सिकाइको रुपमा लिएका छन् । त्यहाँ उनले आफ्नो विगतदेखि वर्तमान स्मरण गरे र लागूऔषध नछुने प्रण गरे ।

त्यो प्रणमात्र होइन, आफूमा बितेको त्यो घटना र लागूऔषधको नशामा कोइ नपरुन् भनेर लागूऔषधविरुद्धको अभियन्ता बन्ने सोच पनि उनले हिरासतबाटै बनाए । अनि हिरासतबाट उनले लागूऔषध मुद्दामा धरौटी बोकेको व्यक्ति नभई, लागूऔषधविरुद्धको अभियन्ता बनेर निस्के ।

अदालतले उनको मुद्दामा अझै पनि सफाई त दिएको छैन । तर, लागूऔषधबाट लाहुरे आफूले आफैंलाई चाहिँ सफाई दिइसके । उनले त्यो रोगलाई जितिसके । र, यो रोगमा फसेका अरुलाई पनि जिताउन अगाडि सरेका छन् । उनले अब आफ्ना सिर्जना पनि लागुऔषधविरुद्धका सचेतनामा केन्द्रित हुने बताए ।

लाहुरेले लागूऔषधसँग सम्बन्धि तयार गरेको एउटा गीतको असार ११ गते टिजर सार्वजनिक हुँदै छ ।

उनलाई थाहा छ, कुन उमेरसमूहमा यो रोगले बढी प्रभाव पार्छ, त्यो बुझेर नै उनले असार ६ गते जिल्ला प्रहरी कार्यालय कास्कीले गर्न लागेको कार्यक्रममा पोखरा सभागृहमा युवापुस्ता लक्षित प्रस्तुती दिनेछन् ।

“मलाई फलो गर्ने धेरै योङ जेनेरेसनकै साथीहरू हुनुहुन्छ । लागूऔषधमा फस्ने भनेको पनि यही उमेर हो, त्यसैले पनि यो अभियानले राम्रो सन्देश दिन्छ भन्ने मलाई आशा छ,” उनले भने ।

उनी आफैले गाएको चर्चित गीत केस नम्बर ४२० जस्तै, हिरासतका ५६ दिनले उनको बाटो बदलेको छ । उनी अब यो बाटोमा फर्किने छैनन् । करिअर अगाडि बढाउनेछन् ।

पोखराको नयाँबजारमा जन्मिएका हुन लाहुरे । र्‍याप गीतप्रति उनी कक्षा ६ पढ्दादेखि नै आकिर्षत भएका थिए । त्यसको प्रयोग भने उनले देउसीभैलोमा भट्याउने क्रममा प्रयोग गर्थे ।

बाल्यकाल बढ्दै जाँदा, विद्यालयमा पढ्दै जाँदा साथीहरूले विदेशबाट ल्याइदिएको एमिनेमको र्‍याप (सिडी) नै उनले सुनेको पहिलो र्‍याप थियो । 

एमिनेमको ‘द रियल स्लिम सेडी’ सुन्दा उनलाई निकै आनन्द लागेको थियो । त्यसैले उनमा र्‍याप मोह जगाएको थियो । त्यसपछि त उनी र्‍याप गीतहरू इन्टरनेटमा खोजीखोजी सुन्न थाले ।

उनको परिवार र हुर्केको समाज ब्रिटिस लाउरे भनेपछि मरिहत्ते गर्थे । प्रायः सबै युवाले एक पटक प्रयास गर्थे नै । तर, उनको परिवारले लाउरेलाई ब्रिटिस लाउरे बन्न दबाव दिएन । सबैजना लाहुरे बन्ने प्रयास गर्दा उनी पनि त्यसैमा होमिए । विस्तारै र्‍याप उनीबाट टाढा हुँदै थियो ।

साढे १७ वर्षको उमेरमा ब्रिटिस आर्मी छनोटको फाइनल पुगे तर बाहिरिए । डिप्रेसनमा पुगे । स्नातक भर्ना भएका उनले अध्ययन अगाडि बढाएनन् । 

धेरै दिन कलेज नगएको थाहा पाएपछि एकदिन उनलाई बुबाले समातेर कलेज लगेर छोडेका थिए । त्यसपछि उनी निरन्तर कलेज त जाने थाले तर क्लास बंक गर्न थाले । कलेजमा साथीभाइले जिस्काउने क्रममा उनको नाम ‘लाहुरे’ राखिदिए । जुन पछि उनलाई चिनाउने सबैभन्दा ठूलो परिचय बन्यो ।

उनी लाहुरे त भएनन् तर र्‍याप गाउने लाहुरे चाहिँ बने ।

ब्याचलर पास भएपछि ‘मेरो सोल्टा’ भन्ने र्‍याप रेकर्ड गरे । त्यहीँबाट उनको गायनयात्रा अगाडि बढ्यो । 

लाउरेको ‘मेरो सोल्टा’, ‘लाहुरे’, ‘पोखरा’, ‘केस नम्बर ४२०’, ‘नेपहपको बाटो’लगायत गीत चर्चित छन् । उनले ताण्डव नामक फिल्ममा समेत काम गरिसकेका छन् । पछिल्लो समय उनी रियालिटी शो हिमालय रोडिजको निर्णायकको भूमिकामा थिए ।

हिपहपमा शताब्दी र परिवारकाे किस्ताकिस्ता सम्झनामा बाँचेका यमबुद्ध