पोखरा । राष्ट्रिय सभा निर्वाचनमा मंगलबार बिहान मतदान गर्न पूर्व मुख्यमन्त्री पृथ्वीसुब्बा गुरुङ आइपुगे । उनको दल नेकपा एमाले राष्ट्रिय सभाका तीन क्लस्टरमा पाँचदलीय गठबन्धनसँग एक्लै भिड्दै थियो । एमालेको आफ्नो मतभार गठबन्धनको भन्दा ६९६ ले कम थियो ।

तैपनि गुरुङ भन्दै थिए, “गठबन्धनमा एकले अर्कालाई शंका पनि गर्ने, विश्वास नगरी पनि नहुने अप्ठ्यारो ठाउँमा उहाँहरू हुनुहुन्छ । यसले पनि केही न केही संकेत गर्दछ । मलाई लाग्दछ, जति भोट जो जससँग छ, केही न केही फेरबदल हुन्छ ।”

उनले भनेझैँगरी ३ बजे सकिएको मतदानको परिणाम फेरिएर आयो । एक्लो एमालेसँग २७ जना प्रदेश सांसदको एक हजार २९६ र ७० जना स्थानीय तहका जनप्रतिनिधिको एक हजार २६० गरी कुल २ हजार ५५६ मतभार मात्रै थियो ।

गठबन्धनसँग चाहिँ ९८ स्थानीय तहको एक हजार ७६४ सय र ३१ प्रदेशसभा सदस्यको एक हजार ४८८ गरी ३ हजार २५२ मतभार थियो ।

एक स्वतन्त्र सांसदलाई नगन्दा पनि गठबन्धन स्पष्ट रूपमा एमालेसँग ६९६ मतभार अगाडि रहेको गणित थियो ।

दुई स्थानीय तहका जनप्रतिनिधि रहेको राप्रपा र एक स्वतन्त्र सांसदले पनि गठबन्धनको उक्त अन्तरमाथि प्रभाव पार्न सक्दैनथे ।
तर, पृथ्वीसुब्बाले भनेझैँ, एमालेका उमेदवारले आफ्नो मत त पाए, अरूको पनि 'चोर्न' सके ।

गठबन्धनले जित्यो । तर, उसले त्यसको स्वाद चाख्न पाएन, उल्टो अविश्वासको र शंकाको घेरामा उसका जनप्रतिनिधि परे । त्यही शंकालाई चिर्न र 'फ्लोर क्रस' गर्ने जनप्रतिनिधि चिन्न गठबन्धन छानबिनतर्फ अगाडि बढेको छ ।

एमालेले अन्य क्लस्टरमा पुण्यप्रसाद पौडेल, दलितमा अर्जुनकुमार सुनाम र महिलामा लिला थनेतलाई उमेदवार बनाएको थियो । यी उमेदवारहरूले एमालेबाहेक २ प्रदेश सांसद र ४ जनासम्म स्थानीय तहका जनप्रतिनिधिको मत तान्न सफल भए ।

दलिततर्फका उमेदवार सुनामले २९ जना प्रदेश सांसद र ७४ जना स्थानीय तहका जनप्रतिनिधिको मत पाए । यसको कुल मतभार २ हजार ७२४ हुन आउँछ । जुन एमालेको भन्दा १६८ मतभार बढी हो ।

दलित क्लस्टरमा एक जना प्रदेश सांसद र २ जना स्थानीय तहका जनप्रतिनिधिको मत बदर भयो ।

एमालेको महिला उमेदवार लिला थनेतले पनि २ जना प्रदेश सांसदको मत बढी पाइन् । स्थानीय तहमा पनि उनले एमालेको भन्दा चारजना बढी गठबन्धनका जनप्रतिनिधिको मत तान्न सफल भइन् ।

खुलाबाट लडेका पुण्यप्रसाद पौडेलले चाहिँ एकजना प्रदेश सांसद र ५ जना स्थानीय तहका जनप्रतिनिधिको मत गठबन्धनबाट ताने ।

यी त भए पराजित भएपनि गठबन्धनको मत तान्न सफल एमालेका उमेदवारहरू ।

गठबन्धनबाट चाहिँ महिलामा कमला पन्तले २९ प्रदेश सांसद र ९४ स्थानीय तहका जनप्रतिनिधिको मत पाएर विजयी बनिन् । प्रदेश सांसदको एक मत बदर भयो भने उनले आफ्नै गठबन्धनका दुई सांसदको साथ पाइनन् । स्थानीय तहका चार जनप्रतिनिधिले उनलाई मत दिएनन् ।

दलित क्लस्टरमा विजयी भएका भुवन सुनारलाई त गठबन्धनका ६ जनप्रतिनिधिले पत्याएनन् । दुईजना सांसदको मत पनि उनले पाएनन् ।

अन्य पदमा विजयी भएका सुरेशबहादुर आलेले ३० जना सांसदको साथ पाए । उनलाई एक सांसदले मत हालेनन् भने स्थानीय तहका ६ जनप्रतिनिधिको मत पनि उनले पाएनन् ।

राष्ट्रिय सभाको मतगणना चलिरहँदा दुई सांसदले 'फ्लोर क्रस' गरेको खबर बाहिरिँदै गर्दा निर्वाचन कार्यालयको परिसर बाहिर माओवादी संसदीय दल गण्डकीका नेता हरि चुमान चाहिँ गम्भीर देखिएका थिए ।

माओवादी केन्द्र गण्डकी प्रदेश अध्यक्ष तथा प्रदेश सांसद गायत्री गुरुङ मतपरिणाम सार्वजनिक भइसकेपछि भन्दै थिइन्, “फ्लोर क्रसबारे छानबिन गर्नुपर्छ ।”

राष्ट्रिय सभामा विजयी उमेदवारहरू हँसिलो मुद्रामा फूलमाला, अबिर र खादा थाप्दै गर्दा त्यहीँ उपस्थित गठबन्धनका नेताहरू चाहिँ फ्लोर क्रसले खुसी थिएनन् ।

कांग्रेस गण्डकीका महामन्त्री विष्णुप्रसाद लामिछानेले भने, “यसको बारेमा छानबिन हुनेछ ।”

'फ्लोर क्रस' त्यो पनि सांसद र स्थानीय तहका जनप्रतिनिधिबाट भएपछि सत्ताघटक गठबन्धनका नेताहरू एमालेका उपमहासचिव गुरुङले भनेझैँ 'शंका र विश्वास'को दोधारमा देखिएका थिए ।

यो विषय निकै गम्भीर रहेको माओवादी केन्द्रका नेता चुमान स्वीकार्छन् ।

कांग्रेस गण्डकी सभापति शुक्रराज शर्माले चाहिँ छानबिन नै गर्ने बताए ।

“यो छानबिन गर्ने विषय हो । छानबिन हुन्छ । भर्खरै नतिजा आएको छ, भोलितिर हेरौँ, छानबिन गर्नुपर्छ भन्ने हामीलाई लागेको छ,” उनले भने ।

राष्ट्रिय जनमोर्चाका गण्डकी प्रदेश अध्यक्ष शंकर बरालले बिहीबार समीक्षा बैठक बस्ने र छानबिन गरिने बताए ।

“कोही जनप्रतिनिधिले व्यक्तिगत रूपमा मत दिएको हुनसक्छ । संस्थागत रूपमा कुनै दलले त्यस्तो गरेजस्तो लाग्दैन । अब भोलि गठबन्धनको बैठक बस्छ । त्यहाँ कुरा उठ्छ र पत्ता लगाउने कुरा त हुन्छ,” उनले भने ।

जनता समाजवादी पार्टी संसदीय दल गण्डकीका नेता तथा मन्त्री हरिशरण आचार्यले पनि छानबिन गरिने बताए ।

“हामीले गठबन्धनमा छलफल गर्छौं, कहाँ कसले कसरी, कुन हिसाबले फ्लोर क्रस गर्नुभयो, त्योबारेमा अध्ययन गर्छौं । त्यसको निष्कर्ष कुन दल सम्बद्ध छ भन्ने आउला, त्यसपछि सम्बन्धित पार्टीमा कुरा हुनेछ,” उनले भने ।