पोखरा । लमजुङको अधिवेशन सकेपछि सोमबार साँझ एमाले उपमहासचिव पृथ्वीसुब्बा गुरुङ पोखरा आइपुगेका छन् । एमालेकै शक्तिशाली संगठन विभागका प्रमुख खगराज अधिकारी पनि काठमाडौंबाट सोमबार नै पोखरा आए । कास्की एमाले केन्द्रीय सदस्य अधिकारीको गृहजिल्ला पनि हो ।

गण्डकीका पूर्वमुख्यमन्त्री तथा प्रतिनिधि सभा सांसद अधिकारी एमालेमा पहिल्यैदेखि ओलीनिकट हुन् । तर, गण्डकी प्रदेशको राजधानी कास्कीमा एमालेको अधिवेशनलाई उनीहरूले प्रतिष्ठाको विषय बनाएका छन् । स्वयम् एमालेकै कार्यकर्ता तथा उमेदवारहरूले यो कुरालाई निर्विवाद रूपमा स्वीकार्छन् ।

शनिबार बन्दसत्र चल्दैगर्दा लन्च ब्रेकमा एमालेका एक कार्यकर्ताले भन्दै थिए, “यहाँ नेताले एउटा उमेदवार उठाएका छन् भने कार्यकर्ताको मनमा अर्का उमेदवार देखिएका छन् । अर्कातर्फ गुरुङलाई गुरुङ र वैरागीलाई अधिकारीको समर्थन छ । दुवै ओलीनिकट हुन । तर यहाँ भने पृथ्वीसुब्बा भर्सेस खगराजको चुनावजस्तो देखिएको छ ।”

यहीबिचमा तल्लो तहका कार्यकर्ताहरूले पनि लाइन परिवर्तन गरेको चर्चासमेत चलेको छ । 

उनीहरूकाअनुसार कास्की एमालेको नेतृत्वका आकांक्षीमध्ये मनबहादुर गुरुङ पृथ्वीसुब्बा गुरुङको निकट छन् भन अर्का उमेदवार दामोदर बैरागी खगराज अधिकारीसँग निकट छन् ।

नत्रभने अन्य जिल्लामा सर्वसम्मत वा निर्वाचनबाटै भएतापनि अधिवेशन सकिइसक्दा २३ गतेदेखि सुरु भएको कास्कीको अधिवेशन चार दिनसम्म लम्बिने थिएन । अझैपनि कास्कीमा निर्वाचन हुने वा सर्वसम्मत हुने अझै टुंगो छैन ।

तर, सोमबार भने प्यानल नै बनाएर गुरुङ र बैरागी पक्षमा मत मागिएका प्यानल लिस्ट  सामाजिक सञ्जालमा देखिएका छन् ।

मंगलबार बिहान मतदान हुने भनिएतापनि त्यसको सम्भावना भने कम छ । कास्की एमालेको अधिवेशन गर्ने जिम्मेवारी पाएको निर्वाचन समितिले सोमबार साँझ उमेदवारको अन्तिम नामावली टाँसेको छ ।

यही मेसोमा उपमहासचिव गुरुङ र संगठन विभाग प्रमुख अधिकारी सोमबार पोखरा आएका छन् । उनीहरूबीच वार्ता भएपछि मात्रै निर्वाचन हुने वा सर्वसम्मतिले नेतृत्व चयन हुने टुंगो लाग्नेछ ।

कास्कीमा एकएकजना नेता च्याप्ने र आफ्नो उपस्थिति देखाउने होड यसअगाडि पनि देखिइसकेको छ । कास्की एमालेका अध्यक्ष कृष्ण थापा केन्द्रीय सदस्य भएपछि उनले उपाध्यक्षलाई कार्यवाहक दिनुको सट्टा सचिव वैरागीलाई सुम्पेका थिए ।

केन्द्रीय सदस्य थापा पनि खगराज अधिकारीसँगै छन् । बैरागीलाई उमेदवार बनाउन र जिताउनका लागि उनीहरू यतिबेला मतदाता 'कन्भिन्स' गर्नमा लागिपरेका छन् ।

अर्कातर्फ कार्यवाहक नपाएका मनबहादुर गुरुङ आफू स्वत: अध्यक्षको उमेदवार भन्दै मत माग्नमा व्यस्त छन् । उनलाई मुखले स्वीकार नगरे पनि मनबाट पृथ्वीसुब्बा गुरुङसहित पूर्व पोलिटब्युरो सदस्य जगत विश्वकर्मा लगायतको समर्थन रहेको छ ।

केन्द्रीय सदस्य थापा र कार्यवाहक अध्यक्ष गुरुङ दुवै प्रदेशसभा सदस्य पनि हुन् । तर, जिल्ला अध्यक्षको सहयोग नपाएका गुरुङलाई भने पूर्वमुख्यमन्त्रीको साथ छ ।

तर, पूर्वमुख्यमन्त्री गुरुङका स्वकीय सचिव विक्रम न्यौपानेले भने गुरुङले कसैको पक्षमा नलागेको र सम्बन्धित जिल्लाका नेताले नै अधिवेशन सकाउन भनेको बताए ।

“उहाँ कसैको पक्षमा हुनुहुन्न । मिडियामा नाम जोडेर आएको छ । तर त्यस्तो होइन, कास्कीमा नै अन्य केन्द्रीयस्तरका नेताहरू हुनुहुन्छ । उहाँहरूले नै मिलाउनुहोला, पृथ्वीसुब्बाको नाम अनाहकमा जोडिएको छ,” उनले भने ।

तर, सोमबार साँझ नै पृथ्वीसुब्बा गुरुङ पोखरा आइपुगेको उनले नै जानकारी दिए ।

स्रोतकाअनुसार गुरुङ र खगराज अधिकारीबिच भेटवार्ता हुने छ ।

“राति एकचरणको वार्ता हुन्छ । त्यसपछि के हुन्छ थप निर्णय होला,” स्रोतले भन्यो । चारदिनसम्म पनि अधिवेशन नसकिँदा मतदाता अन्योलमा छन भने दुवैपक्षका कार्यकर्ताले पदाधिकारीको लिस्ट बनाएका छन् ।

निर्वाचन समितिले सोमबार साँझ टाँसेको उमेदवारको अन्तिम नामावलीअनुसार मनबहादुर गुरुङ पक्षको पदाधिकारीमध्ये उपाध्यक्षमा तेजनारायण अधिकारी, सचिवमा विष्णुबहादुर केसी, उपसचिवमा इमानराज शर्मा र मन्बुजा विश्वकर्मा रहेका छन् ।

अर्कातर्फ बैरागी नेतृत्वको पदाधिकारीमध्ये उपाध्यक्षमा प्रदेशसभा सदस्य प्रभा कोइराला, सचिवमा जिसस कास्की प्रमुख बैनबहादुर क्षेत्री तथा उपसचिवमा दर्शन लामा र नवराज ओझा छन् । लामा पोखरा १३ का वडाध्यक्ष हुन् भने ओझा रूपा गाउँपालिकाका प्रमुख हुन् ।

एमालेको जिल्ला कमिटी कुल १२० सदस्यीय हुनेछ । त्यसमध्ये भूगोलबाट ६० सदस्य, समावेशीतर्फ ४३ जना र खुलातर्फ २२ सदस्य निर्वाचित हुनेछन् । निर्वाचन समितिकाअनुसार १५३ जनाको सदस्यमा उमेदवारी परेको छ ।

एमाले कास्की अधिवेशनमा ९१४ जना मतदाता छन् ।

पर्वत र बागलुङमा पूर्व माधवपक्षीयको वर्चस्व

अघिल्लो अधिवेशनमा माधव नेपाल पक्षबाट प्यानल नै बनाएर चुनावमा प्रतिष्पर्धा गरेका राजुप्रसाद पौडेल यसपटक पर्वत जिल्लाको अध्यक्ष सर्वसम्मत भएका छन् । पर्वतमा आज निर्वाचन समितिले पढेको नामअनुसार उनी अध्यक्षमा सर्वसम्मत भएका हुन् ।

महाशिला गाउँपालिका अध्यक्षसमेत रहेका पौडेल अघिल्लो निर्वाचनमा ओली समूहका पदम गिरीसँग प्रतिष्पर्धा गरेका थिए । तर, गिरीले अध्यक्ष जित्दा कार्यसमितिमा बहुमत भने माधवपक्षका सदस्यहरूको थियो ।

तर, माधव नेपालले एमाले छाडेपछि पनि एमालेमा नै रहेका पौडेल एमाले पर्वतको अध्यक्ष बनेका हुन् ।

बागलुङमा पनि तत्कालीन माधव समूहकै उमेदवार निर्वाचित भएका छन् । बागलुङमा भने मतदान नै भएको थियो । निर्वाचनबाट एमाले बागलुङको अध्यक्षमा हिराबहादुर केसी निर्वाचित भएका छन् । उनले प्रतिष्पर्धी कृष्ण पाठकलाई पराजित गरेका हुन् ।

केसीले ३२९ मत ल्याउँदा पाठकले २२८ मत ल्याए । अर्का प्रत्यासी मेहरसिंह पाइजाले ३४ मत ल्याएका थिए ।

यसबाहेक एमालेको जिल्ला अधिवेशनले गोरखामा प्रेम गुरुङ, लमजुङमा कृष्ण अधिकारी, तनहुँमा श्रीप्रसाद श्रेष्ठ र म्याग्दीमा देवेन्द्र कटुवाललाई अध्यक्ष चयन गरेको छ ।

स्याङ्जामा भने बादल समूहबाट एमाले प्रवेश गरेका पारस गैह्रे र प्रतिनिधि सभा सदस्य नारायणप्रसाद मरासिनीबिच प्रतिष्पर्धा छ । स्याङ्जामा पनि मतदान भएको हो । सोमबार साँझसम्म मतदान सकिसकेको छ भने गणनाको काम बाँकी नै छ ।