काठमाडौं । कुवेती नागरिक अब्दुल्लाह अल्मुताइरी गत चैतमा नेपाली राष्ट्रिय फुटबल टोलीको मुख्य प्रशिक्षक नियुक्त हुँदा नेपालले कतारमा हुने फिफा विश्वकप–२०२२ तथा चीनमा हुने एएफसी एसियन कप–२०२३ को छनोट प्रतियोगिता खेलिरहेको थियो ।

अल्मुताइरीले नेतृत्व लिँदा नेपालको विश्वकप छनोटमा अघिल्लो चरण पुग्ने सम्भावनाा सकिइसकेको थियो । तथापी एएफसी एसियन कप छनोटको तेस्रो चरणमा स्थान बनाउने सम्भावना बाँकी थियो । र नेपालले साफ च्याम्पियनसिप खेल्दै थियो । ठीक त्यही बेला नेपाल आइपुगेका अल्मुताइरीले भनेका थिए, “मेरो मुख्य लक्ष्य साफ च्याम्पियनसिपको उपाधि जित्नु हो र एसियन कप छनोट हो । त्यसका लागि हाम्रो तयारी गर्नेछौं ।”

अल्मुताइरीले विश्वकप तथा एसियन कप छनोटमा कुवेत भ्रमणका लागि टिम बनाउँदा केही सियनर खेलाडीलाई हटाएर युवालाई मौका दिएका थिए । उनले गरेको खेलाडी छनोटले धेरैलाई अचम्ममा पारेको थियो । अल्मुताइरीले यसै विषयमा आलोचना पनि खेपेका थिए । तर उनी आफ्नो निर्णयमा विश्वस्त थिए । अल्मुताइरी भन्थे, “अहिले मैले छनोट गरेको टिम नेपाली फुटबलको भविष्य र साफलाई ध्यानमा राखेर टिम बनाएको हुँ ।”

मतलब, साफ च्याम्पियनसिपमा नेपालले राम्रो नतिजा ल्याउनुपर्छ भन्ने उनको जोड थियो । त्यसपछि अल्मुताइरीले हरेक अभिव्यक्तिमा साफलाई मुख्य प्राथमिकतामा राखेका थिए । हुन पनि साफमा नेपालले अहिलेसम्म सेमिफाइनलभन्दा अगाडिको यात्रा तय गर्न सकेको छैन । 

त्यसैले यसपटक माल्दिभ्समा नेपालले फाइनलमा स्थान बनायो भने सबभन्दा ठुलो उपलब्धि हुनेछ । र उपाधि जित्यो भने अल्मुताइरीको नाम नेपाली फुटबलको इतिहासमा स्वर्ण अक्षरमा लेखिनेछ । नेपाललाई पहिलो पटक साफ च्याम्पियनसिपको उपाधि जिताउने प्रशिक्षक अल्मुताइरी भनेर । 

साफका लागि यसपटक नेपालले तयारी पनि राम्रो गरेको छ । सहायक प्रशिक्षक किरण श्रेष्ठले पनि बिहीबार त्यही भनेका छन्, “यस प्रतियोगितामा हामीले अहिलेसम्मकै राम्रो तयारी गरेका छौं ।” 

हुन पनि पछिल्लो समय नेपाली फुटबल टोली निकै व्यस्त छ । विश्वकप तथा एसियन कप छनोट खेलेर फर्किएपछि नेपाली टोलीले काठमाडौं र पोखरामा बन्द प्रशिक्षण गरेको थियो । त्यसैबीचमा नेपालले छिमेकी चीर प्रतिद्वन्द्वी भारतविरुद्ध दुई मैत्रीपूर्ण फुटबल खेल्यो । भारतविरुद्ध एउटा खेलमा १–१ को बराबरी खेलेको नेपालले अर्को खेलमा २–१ ले पराजित भयो । त्यसपछि नेपाल विशेष प्रशिक्षणका लागि कतार गयो । कतारमा झण्डै एक साता विशेष प्रशिक्षणमा रहँदा नेपालले ओमानविरुद्ध मैत्रीपूर्ण फुटबल खेलेको थियो । उक्त खेलमा नेपाल ७–२ ले हार्‍यो । नेपाली टोली कतारबाटै माल्दिभ्स गएको हो ।

तर माल्दिभ्स भ्रमण अल्मुताइरीका लागि सहज हुनेछैन । फिफाको निलम्बनका कारण पाकिस्तान र कोभिड–१९ महामारीका कारण भुटानले यस संस्करणमा सहभागिता जनाएका छैनन् । आयोजक माल्दिभ्ससहित नेपाल, बंगलादेश, भारत र श्रीलंकागरी पाँच टोलीले मालेमा प्रतिस्पर्धा गर्नेछन् । प्रतियोगिताका पाँचै टोलीविरुद्ध साफ च्याम्पियनसिपमा नेपालको नतिजा उत्साह जगाउने खालको छैन । नतिजामा नेपाल सबभन्दा कमजोर छ । 

प्रशिक्षक अल्मुताइरीले पनि यस तथ्याङ्कलाई स्विकार गरेका छन् । उनी भन्छन्, “विगत हेर्ने हो भने नेपाल सबभन्दा कमजोर टोली हो । तर हामीलाई विगतसँग कुनै मतलब छैन । हामी नयाँ गोर्खाली हौं । इतिहास रच्नका लागि खेल्नेछौं ।”

मुख्य प्रशिक्षक अल्मुताइरीले सधैँ रक्षात्मक फुटबल नखेल्ने बताउँदै आएका छन् । आक्रामक फुटबल खेल्ने र जित्नका लागि खेल्ने बताउँदै आएका छन् । तर उनले भनेको जस्तो नतिजा भने अहिलेसम्म आएको छैन । उनको प्रशिक्षणमा नेपालले खेलेको सात खेलमध्ये एक खेलमात्र जितेको छ । भारतविरुद्ध एक खेल बारबरी खेल्नुबाहेक बाँकी सबै खेल हारेको छ । तर ती सबै खेलमा नेपालले तुलनात्मक रुपमा बलियो प्रतिद्वन्द्वीविरुद्ध खेलेको थियो । 

साफमा भने नेपाल सदाबहार दाबेदार हो । भलै अहिलेसम्म उपाधि जित्न नसकेको किन नहोस् । फिफा वरियाता हेर्ने हो भने पनि भारत र माल्दिभ्समात्र नेपालभन्दा माथि छन् । तर भारतविरुद्ध खेल्दा नेपालले सधै राम्रो प्रदर्शन गर्दै आएको छ ।

माल्दिभ्सको स्तर पनि नेपालभन्दा धेरै माथि होइन । 

नेपालका कप्तान किरण चेमजोङले पनि प्रशिक्षककै भाषामा भनेका छन्, “हामी गोर्खाली हौं । हामीले अन्तर्राष्ट्रिय क्षेत्रमा धेरै इतिहास बनाएका छौं । हामी कसैसँग डराउँदैनौं । सबैसँग लड्छौं । यस प्रतियोगितामा हाम्रो लक्ष्य कम्तिमा फाइनल पुग्नु हो । त्यसकैे लागि हामी लड्नेछौं ।”

ओमानविरिुद्धको खेलअघि अल्मुताइरीले फेसबुकमा लेखेका छन्,  “हामीले ५, ६ महिनाको छोटो अवधिमा बलियो प्रतिद्वन्द्वीविरुद्ध ६ खेल खेल्यौं । अबको २३ दिनमा हामीले थप ५, ६  खेल खेल्दैछौं । फुटबल विकासका लागि बलियो प्रतिद्वन्द्वीविरुद्ध खेल्नु महत्वपूर्ण हुन्छ । अझ बुझ्नुपर्ने अर्को महत्वपूर्ण कुरा फुटबल विकास एक दिन वा एक महिनामा हुने होइन । त्यसका लागि लामो समय लाग्छ ।”

अब भने त्यो समय आएको छ । अल्मुताइरीले आफुलाई प्रमाणित गर्नुपर्ने । साफ च्याम्पियनसिपमा नेपालले पहिलो खेल नै आयोजक माल्दिभ्सविरुद्ध खेल्नेछ । र अल्मुताइरीले आफुलाई प्रमाणित गर्नुपर्ने यात्रा त्यहीँबाट सुरु हुनेछ ।