मस्कट (ओमान) । विश्वकप क्रिकेटको खुड्किलोका रूपमा रहेको आईसीसी क्रिकेट विश्वकप लिग–२ मा नेपालले भोलि (सोमबार) अमेरिकाविरुद्धको खेलमा त्रिदेशीय शृङ्खलाको सुरुआत गर्नेछ । 

ओमानको मस्कटस्थित अल अमारत क्रिकेट मैदानमा अमेरिकाविरुद्ध नेपाली टिमले स्पिनरलाई आफ्नो मुख्य हतियार बनाउने नेपाली टोलीका कप्तान ज्ञानेन्द्र मल्लले बताएका छन् । तथापि, यसपटकको भ्रमणमा नेपाली टोलीले पाँच जना तीव्र गतिका बलर ल्याएको छ । त्यसका बाबजुद पनि कप्तान ज्ञानेन्द्रले अमेरिकाविरुद्ध स्पिनर नै आफ्नो मुख्य हतियार भएको बताए । 

‘‘अमेरिका बलियो प्रतिद्वन्द्वी हो । उनीहरूको मिडियम पेस बलरहरू राम्रा छन् । ब्याटिङ पनि राम्रो छ,’’ अमेरिकाविरुद्धको खेलबारे नेपालका कप्तान ज्ञानेन्द्रले भने, ‘‘हाम्रो स्पिनर बलर राम्रा छन् । हाम्रा ब्याट्सम्यानले उनीहरूको मिडियम पेसलाई ट्याकल गरेर हाम्रो स्पिनरले राम्रो गर्यो भने नतिजा पनि राम्रो आउनसक्छ ।’’

ओमान भ्रमणमा नेपाली टोलीको मुख्य स्पिनर भनेको सन्दीप लामिछाने र सुशन भारी हुन् । कुशल मल्ल पनि छन् । त्यसबाहेक पवन सर्राफ, शरद भेषावकर र ज्ञानेन्द्र आफैँले पनि ‘पार्ट टाइम’ बलिङ गर्छन् । तर, टिममा अहिले सोमपाल कामी, करण केसी, बिक्रम सोब, अभिनाष बोहरा, गुल्सनकुमार झा तीव्र गतिका बलर छन् । 

अमेरिका र ओमानविरुद्धको त्रिदेशीय शृंखलाअघि पपुवा न्युगिनी (पीएनजी)विरुद्धको एकदिवसीय अन्तर्राष्ट्रिय खेलमा नेपालका लेग स्पिनर सन्दीपले उत्कृष्ट प्रदर्शन गरेका छन् । पीएनजीविरुद्धको दुई खेलमा नेपालले सन्दीपबाहेक सुशन, कुशल र पवनलाई प्रयोग गरेको थियो । कुशलले दुई र सुशनले एक विकेट लिएका छन् । पवनले पहिलो खेलमा दुई ओभर बलिङ गरेका थिए । 

‘‘हामीले अहिलेसम्म धेरै स्पिनरको प्रयोग गर्नु परेको छैन । टिममा सुसन, कुशल छन् । अरूले पनि पार्टटाइम बलिङ गर्न सक्छन् । त्यसैले अमेरिकालाई हाम्रो स्पिनरले दबाबमा राख्न सक्छ भन्ने हो,’’ ज्ञानेन्द्रले थप प्रष्ट पारे । 

सन्दीपले अघिल्लो पीएनजीविरुद्धको दोस्रो खेलमा करियरकै उत्कृष्ट प्रदर्शन गरेका थिए । उनले ५.१ ओभरमा ११ रन दिएर ६ विकेट लिएका थिए । पहिलो खेलमा पनि दश ओभरमा ३५ रन दिएर चार विकेट लिएका थिए ।

कप्तान ज्ञानेन्द्रले भोलि पिचको अवस्था हेरेर टोलीको समिश्रण निधो हुने बताएका छन् । ‘‘पीएनजीविरुद्ध खेलेको टोलीमा धेरै परवर्तन त हुँदैन । तर, हामी बलिङमा थप स्पिनर लिएर खेल्ने कि भनेर सोच्दैछौँ,’’ ज्ञानेन्द्रले थपे, ‘‘पिच र बाहिरको कन्डिसन कस्तो हुन्छ, अवस्था हेरेर हामी थप ब्याट्सम्यान राख्ने कि बलर थप्ने निर्णय लिन्छौँ ।’’

अमेरिकाले पनि ओमानमा पीएनजीविरुद्ध दुई एकदिवसीय अन्तर्राष्ट्रिय खेल खेलेको थियो । दुवै खेलमा अमेरिकाले उत्कृष्ट नतिजा निकालेको थियो । पहिलो खेलमा सात विकेटले जितेको अमेरिकाले दोस्रो खेलमा पनि १३५ रनको विजय हासिल गरेको थियो । दोस्रो खेलमा अमेरिकाका जसकरण मल्होत्राले ६ बलमा ६ छक्कासहित अविजित १७३ रन बनाएका थिए । 

अमेरिका पछिल्लो त्रिदेशीय शृंखलाकै लागि फेब्रुअरी २०२० मा नेपाल जादाँको टोलीमा केही खेलाडी परिवर्तन भएका छन् । ओमान आउँदा अमेरिकाले केही युवा खेलाडीलाई समेटिएको छ । दुई जनाले पीएनजीविरुद्ध एकदिवसीय अन्तर्राष्ट्रिय खेलमा डेब्यू गरेका थिए । अमेरिकामा प्रशिक्षक पनि नयाँ छन् । जे अरूण कुमारको प्रशिक्षणमा अमेरिकाले आईसीसी क्रिकेट विश्वकप लिग–२ मा पहिलोपटक खेल्न लागेको हो । 

‘‘अमेरिका राम्रो टिम हो । उनीहरूले टिममा केही परिवर्तन पनि गरेका छन् । पीएनजीविरुद्धको पछिल्लो दुई खेलमा पनि राम्रो नतिजा निकालेका छन्,’’ अमेरिकी टोली बारे नेपालका कप्तान ज्ञानेन्द्रले भने, ‘‘अमेरिकालाई सजिलो टिम भन्न मिल्छजस्तो लाग्दैन । उनीहरू अङ्क तालिकाको पनि राम्रो स्थानमा छन्,’’ ज्ञानेन्द्रले भने, ‘‘त्यसैले भोलिको खेल एकदम प्रतिस्पर्धात्मक हुन्छ । नेपालमा हामीले हराएपनि त्यहाँको र यहाँको कन्डिसनमा फरक छ । त्यसले नतिजामा पनि फरक पार्छ जस्तो लाग्छ ।’’ 

नेपाल र अमेरिका आईसीसी क्रिकेट विश्वकप लिग–२ मा तेस्रोपटक आमनेसामने हुन लागेका हुन् । यसअघि कीर्तिपुरस्थित त्रिवि क्रिकेट मैदानमा नेपालले अमेरिकालाई ३५ रन र आठ विकेटले हराएको थियो । एकदिवसीय क्रिकेटमा नेपाल र अमेरिका डिभिजन ५ देखिका प्रतिद्वन्द्वी हुन् । अहिलेसम्म नेपाल र अमेरीकाले  एकदिवसीयमा ६ पटक खेलेका छन् । त्यसमध्ये तीन खेल नेपालले जितेको छ भने अमेरिकाले पनि तीन खेल जितेको छ ।

आईसीसी क्रिकेट विश्वकप लिग–२ को अङ्क तालिकामा अमेरिका दोस्रो स्थानमा छ भने ओमान शीर्ष स्थानमा छ । अमेरिकाले अहिलेसम्म खेलेको १२ खेलमा ६ मा जित र ६ मा हार ब्यहोरेको छ । चार खेलबाट चार अङ्क जोडेको नेपाल छैटौँ स्थानमा छ । नेपालले यसअघि पनि ओमान र अमेरिकाविरुद्ध नेपाललै त्रिदेशीय शृंखला खेलेको हो । ओमान १६ अङ्कका साथ शीर्ष स्थानमा छ । 

दीपेन्द्रसिंह ऐरीले शृंखला गुमाउने

नेपालका उपकप्तान दीपेन्द्रसिंह ऐरीले खुट्टाको चोटका कारण जारी शृंखला गुमाउने भएका छन् । दीपेन्द्रको अघिल्लो आइतबार अभ्यासका क्रममा घाइते भएका थिए । फिजियो विक्रम न्यौपानेकाअनुसार दीपेन्द्रको दायाँ कुर्कुच्चामा ‘हाइ ग्रेड एटीएफएल टियर’ भएको छ । 

चोटका कारण दीपेन्द्रले पीएनजीविरुद्धको दुवै खेल गुमाएका थिए । दीपेन्द्रको अनुपस्थितिले नेपालको कमजोर मानिने ब्याटिङ लाइनअपमा असर पर्ने पक्का छ । तथापि, पछिल्लो दुई खेलमा रोहितकुमार पौडेलको प्रदर्शनले नेपाललाई आशा जगाएको छ । 

‘‘अवश्य पनि उपकप्तान दीपेन्द्रसिंह हाम्रो टोलीको मुख्य खेलाडी हुन् । राम्रो ब्याट्सम्यान हुन् । त्यो हामी सबैलाई थाहा छ कि उनको क्षमता कस्तो छ भनेर,’’ दीपेन्द्रको अनुपस्थितिबारे कप्तान ज्ञानेन्द्रले थपे, ‘‘उनी घाइते हुनु हाम्रा लागि ठुलो सेटब्याक हो । तर यो स्तरमा हामीले क्रिकेट खेल्ने भएपछि टिममा परेका सबै खेलाडीले आफ्नो जिम्मेवारी पूरा गर्न सक्नुपर्छ ।’’