मस्कट (ओमान) । पपुवा न्युगिनी (पीएनजी)विरुद्धको पहिलो खेलमा संघर्षपूर्ण नतिजा निकालेको नेपाली क्रिकेट टोलीका लागि आज हुने दोस्रो एकदिवसीय अन्तर्राष्ट्रिय खेलमा राम्रो गर्नुपर्ने दबाब छ ।

आईसीसी क्रिकेट विश्वकप लिग–२ मा त्रिदेशीय शृंखलाको प्रतिद्वन्द्वी अमेरिकाले पीएनजीविरुद्ध गरेको प्रदर्शनले नेपालमाथि राम्रो प्रदर्शन गर्न अझ दबाब परेको छ ।

अमेरिकाले पहिलो खेलमा पीएनजीमाथि सात विकेटको विजय हासिल गरेको थियो भने दोस्रो खेल १३४ रनले जितेको थियो । यसको मनोवैज्ञानिक असर त्रिदेशीय शृंखलामा पर्न सक्छ । त्यसकारण पनि आज नेपालले पीएनजीमाथि सहज नतिजा निकाल्नुपर्ने दबाब छ ।

तथापि, पहिलो खेलमा नेपालले केही सिनियर खेलाडीलाई आराम दिएर नयाँ खेलाडीलाई मौका दिएको थियो । तर, त्रिदेशीय शृंखलाका लागि अन्तिम तयारी खेलका रूपमा लिएको पीएनजीविरुद्ध नेपालले आफ्नो पहिलो रोजाइको टोली खेलाउनेछ ।

‘‘लामो समयपछि हामीले खेलेका थियौँ । त्यसैले पनि पहिलो खेलमा नयाँ खेलाडीहरूलाई मौका दिएका थियौँ । सबैले एक्पोजर पाउनुपर्छ भनेर,’’ नेपालका कप्तान ज्ञानेन्द्र मल्लले भने, ‘‘आज हामी सिनियर खेलाडीहरूलाई नै खेलाउनेछौँ । त्रिदेशीय शृंखलाका लागि यो खेल ‘म्याच प्राक्टिस’ हो । त्यसैले हामी राम्रो नतिजा निकाल्नेछौँ ।’’

पीएनजीविरुद्धको पहिलो खेलमा नेपाल दुई विकेटले विजयी भएको थियो । बलिङमा राम्रो प्रदर्शन गरे पनि ब्याटिङमा समस्या देखिएको थियो । पीएनजीलाई ३३ ओभरमै १३४ रनमा अलआउट गरेको नेपालले १३५ रनको लक्ष्य पूरा गर्न ३९.३ ओभर खेलेर आठ विकेट गुमाएको थियो ।

कप्तान ज्ञानेन्द्र पनि पहिलो खेलको तुलनामा ब्याटिङ प्रदर्शनमा सुधार गर्नुपर्ने बताउँछन् । ‘‘पहिलो खेललाई पनि हामीले सकारात्मक रूपमा लिएका छौँ । नयाँ कन्डिसनमा आएर एकैचोटि खेल्दा सजिलो हुँदैन । नयाँ खेलाडीलाई मौका दिएका थियौँ । दुर्भाग्य ! हामीले त्यो अवसरलाई सदुपयोग गर्न सकेनौँ,’’ कप्तान ज्ञानेन्द्रले थपे, ‘‘विस्तारै सिनियर खेलाडीलाई प्रतिस्थापन गर्नका लागि पनि नयाँ खेलाडीलाई मौका दिनुपर्थ्यो । हामीले त्यो गर्‍यौँ । सबैले राष्ट्रिय टोलीमा आउनेबित्तिकै राम्रो गर्छ भन्ने पनि हुँदैन । नतिजाका लागि केही समय कुर्नुपर्छ । पहिलो खेलको तुलनामा हामीले विशेष गरी ब्याटिङमा सुधार गर्नुपर्छ । ज–जसले आज मौका पाउँछन्, उनीहरूले राम्रो प्रदर्शन गर्नुपर्छ ।’’

पहिलो खेलमा सिनियर खेलाडी विनोद भण्डारी, करण केसीलगायत उपकप्तान दीपेन्द्रसिंह ऐरी, सुशन भारी, अभिनाश बोहरा र गुल्सन झालाई आराम दिइएको थियो । त्यसमध्ये आज विनोद, करण र अभिनाश वा सुशन टोलीमा फर्किने सम्भावना छ । शरद भेषावकर, पवन सर्राफ, विक्रम सोबलाई आज आराम दिने सम्भावना छ ।

दीपेन्द्रसिंह र गुल्सनको चोट
खुट्टाको चोटका कारण दीपेन्द्रसिंह र गुल्सनले पहिलो खेल गुमाएका थिए । चोटकै कारण दीपेन्द्रसिंहले बिहीबार साँझ पनि अभ्यास गरेनन् । गुल्सनले अभ्यास गरे पनि पूर्ण देखिएका छैनन् । आजको खेलमा पनि दीपेन्द्र हुने छैनन् । गुल्सनको खेल्ने सम्भावना पनि कम छ ।

‘‘दीपेन्द्रको मेडिकल रिपोर्ट आउन बाँकी नै छ । फिजियोले राम्रोसँग हेरिराख्नुभएको छ । अहिले केही भन्ने अवस्था छैन,’’ कप्तान ज्ञानेन्द्र मल्लले थपे, ‘‘फिजियोले दुवैको राम्रो रिकभर भइरहेको बताउनुभएको छ । आजको खेल हाम्रो लागि धेरै महत्वपूर्ण होइन । अर्को प्रतियोगिता महत्वपूर्ण हो । त्यसैले चोटबाट फर्किनेबित्तिकै खेल्दा केही हुनसक्छ । त्यसकारण हामी फिजियोको सुझाव र उनीहरूको फिटनेसको अवस्था हेरेर मात्र निर्णय लिनेछौँ ।’’

ओपनिङ जोडीमा परिवर्तन नहुने संकेत
नेपाली क्रिकेट टोलीमा ओपनिङ जोडीको प्रदर्शन लामो समयदेखि सन्तोषजनक छैन । यसबीचमा ओपनिङ जोडीमा धेरै प्रयोग भयो । धेरै खेलाडीलाई मौका दिइयो । तर, कसैले पनि लामो समय ओपनिङमा स्थान बनाउन सकेका छैनन् । तर, गत अप्रिलमा नेपालमै सम्पन्न मलेसिया, नेपाल र नेदरल्यान्ड्सबीचको त्रिदेशीय शृंखलाबाट कुशल भुर्तेल र आसिफ शेखको जोडी उदाएको छ ।

दुईजनाको जोडीले राम्रो सम्भावना देखाएको छ । कुशलले पाँच इनिङ्समध्ये चारमा अर्धशतक बनाए । उनले शृंखलामा सबैभन्दा धेरै २७८ रन बनाए । धेरै रन बनाउने सूचीको तेस्रो स्थानमा रहेका आसिफले १७२ रन बनाएका थिए ।

कुशल र आसिफको जोडीको नेदरल्यान्ड्सविरुद्धको पहिलो खेलमा ११६ र मलेसियाविरुद्धको दोस्रो खेलमा १०२ रनको साझेदारी गरेको थियो । त्यसपछिका खेलमा यो जोडीले औसत प्रदर्शन गरेको छ । तर, त्यो ट्वान्टी–२० अन्तर्राष्ट्रिय खेल थियो । यो एकदिवसीय अन्तर्राष्ट्रिय खेल हो । तर पनि पीएनजीविरुद्ध कुशल र आसिफले पहिलो विकेटका लागि ४६ रनको साझेदारी गरेका थिए । कुशल १५ र आसिफ ३० रन बनाएर पवेलियन फर्किएका थिए ।

‘‘ओपनिङमा अहिले जसले खेलेका छन्, उनीहरूलाई मौका दिनुपर्छ । अस्ति पनि राम्रो गरेका छन्,’’ कप्तान मल्लले भने, ‘‘ओपनिङ भन्ने कुरा धेरै परिवर्तन गर्दैमा राम्रो हुन्छ भन्ने हुँदैन । उनीहरू क्लियर माइन्ड लिएर क्रिजमा जानुपर्छ । ओपनिङमा पर्मानेन्ट स्पट दिनुपर्छ ।’’

एकदिवसीय अन्तर्राष्ट्रियमा पहिलो दिवारात्रि खेल
नेपालले ट्वान्टी–२० अन्तर्राष्ट्रिय खेलमा यसअघि नै दिवारात्रि क्रिकेट खेलिसकेको छ । तर, एकदिवसीय अन्तर्राष्ट्रिय खेलमा पनि आज पहिलोपटक एकदिवसीय अन्तर्राष्ट्रिय खेल खेल्दै छ । आईसीसी क्रिकेट विश्वकप लिग–२ मा त्रिदेशीय शृंखलाका सबै खेला दिवारात्रि हुनेछन् । त्यसका लागि पनि आजको खेल नेपाललाई महत्वपूर्ण छ ।

‘‘मुख्य प्रतियोगिता सुरु हुनुअघि हामीले दिवारात्रि क्रिकेट खेल्ने मौका पाएका छौँ । यसमा अभ्यस्त नभएका कारण पनि हाम्रो लागि राम्रो कुरा हो,’’ नेपाली राष्ट्रिय टोलीका कप्तान ज्ञानेन्द्रले भने, ‘‘बेलुका खेल्दा कन्डिसन फरक हुन्छ । लाइटले गर्दा फिल्डिङदेखि लिएर धेरै फ्याक्टरमा असर पार्छ । हाम्रो लागि नयाँ अनुभव हुन्छ । त्रिदेशीय शृंखलाका लागि तयारी गर्ने राम्रो अवसर पनि हो ।’’