काठमाडौं । नेपाली फुटबलमा विवाद नौलो कुरा होइन । तर यस पटकको विवाद अलि अनौठो छ । अखिल नेपाल फुटबल संघ (एन्फा) का पदाधिकारीबीचको झगडा समर्थकलाई सामान्य लाग्न थालिसकेको छ । तर पछिल्लो विवादको केन्द्रबिन्दुमा मुख्य प्रशिक्षक अब्दुल्लाह अल्मुताइरी छन् । 

कुवेतका नागरिक अल्मुताइरीले साउन १० गते नेपाली समर्थकलाई सम्बोधन गर्दै एन्फा वरिष्ठ उपाध्यक्ष पंकजविक्रम नेम्वाङका कारण राजीनामा दिन कार्यालय जान लागेको स्ट्याटस लेखे । त्यसमा नेम्वाङले पछिल्लो तीन सातादेखि आफुविरुद्ध नाटकीय व्यवहार गरेको अल्मुताइरीको आरोप थियो । स्ट्याटसको अन्त्यमा उनले लेखेका छन्, ‘‘आशा छ, मेरो राजीनामाले नेम्वाङ खुसी हुनेछन् ।’’

यसपछि बल्झिएको विवादले अझै निकास पाएको छैन । 

सामान्यतः फुटबलभित्रको विवाद एन्फा आफैँले सुल्झाउने गर्छ । तर नेम्वाङ र अल्मुताइरीबीचको विवाद एन्फाले मिलाउन सकेन । युवा तथा खेलकुद मन्त्रालय गुहार्नुपर्‍यो । मन्त्रालयले पनि विवादलाई राष्ट्रिय खेलकुद परिषद् (राखेप) तिरै पन्छाइदियो ।

राखेपले पुरेन्द्रविक्रम लाखेको संयोजकत्वमा सात सदस्सीय समिति बनाइ छानबिन गर्न जिम्मेवारी दियो । उक्त समितिले भदौ ९ गते ११ बुँदे निष्कर्षसहित राखेपलाई आफ्नो प्रतिवेदन बुझाएको छ । 

त्यसबारे राखेपले अहिलेसम्म कुनै प्रतिकृया दिएको छैन । तर अल्मुताइरीको प्रतिक्रिया फेसबुकमार्फत नै सार्वजनिक भइसकेको छ । प्रतिवेदनले अल्मुताइरीलाई आफ्नो काममा केन्द्रित हुन र फेसबुकबाट विवादित स्ट्याटस हटाउन निर्देशित गर्नुपर्ने सुझाव दिएको छ । 

तर अल्मुताइरीले प्रतिवेदन सार्वजनिक भएको केही बेरमै फेसबुकबाटै लेखे, ‘आई एम आउट, लेट पोलिटिक्स वर्क’ अर्थात् म बाहिरिएँ, राजनीतिले काम गरोस् । 

प्रतिवेदनको भावनाविपरीत स्ट्याटस लेखेर बाहिरिएको घोषणा गरेका अल्मुताइरी साच्चै बाहिरिएका भने छैनन् ।

उनले यसअघि पनि दुईपटक राजीनामाको ‘स्टन्ट’ गरिसकेका थिए । 

पहिलो पटक राजीनामा दिन एन्फा जान लागेको भन्ने स्ट्याटस लेखेर फुटबलमा नयाँ विवाद सृजना गरेका उनले दोस्रो पटक पनि साउन २६ सम्ममा समस्या समाधान नभए आफू नबस्ने भन्दै धम्क्याएका थिए ।

प्रशिक्षक अल्मुताइरीको नाटकीय व्यवहार

अल्मुताइरीलाई एन्फाले २०७७ चैत २२ गते मुख्य प्रशिक्षकमा नियुक्त गरेको हो । अल्मुताइरी ‘एफसी कोचिङ इन्स्ट्रक्टर र प्रो लाइसन्स’ प्राप्त प्रशिक्षक हुन् । 

यसकारण पनि उनीबाट ठूलो अपेक्षा थियो । तर अल्मुताइरी नेपाल आएदेखि नै विभिन्न कुराले चर्चामा छन् । कहिले उनको अति प्रशंसा हुन्छ भने कहिले चर्को आलोचना । 

नेपाली फुटबल टोलीको खेल्ने शैली परिवर्तन गरेको अल्मुताइरीको दाबी छ । उनको दाबीलाई केहीले पत्याइदिएका छन् ।

केहीले कुनै सत्यता नरहेको बताइरहेका छन् । मैदानभित्र उनको प्रदर्शन अहिलेसम्म औसत छ । तर मैदानबाहिर उनको प्रदर्शन ‘लाजमर्दो’ रहेको खेल विज्ञको टिप्पणी छ । कम्तिमा ‘एफसी कोचिङ इन्स्ट्रक्टर र प्रो लाइसेन्स’ प्राप्त प्रशिक्षकलाई सुहाउने गतिविधि छैनन् ।

उनका अभिव्यक्तिहरु हेर्दा लाग्छ, उनी एन्फाभित्र पदाधिकारीको विवादमा खेल्न खोज्दैछन् । ‘राजनीतिले काम गरोस्’ भन्दै उनी आफैँ राजनीति गरिरहेका छन् । 

“खासमा उनी एन्फाले नियुक्त गरेका एक सामान्य कर्मचारी हुन् । भलै उनको तलब कतारले व्यहोर्छ । कतारको सहयोगमा उनी नेपाल आएका हुन् । त्यसको मतलब उनले यहाँ जे पनि गर्न सक्छन् भन्ने होइन,” एक अधिकारी भन्छन् । 

तर एन्फा नेतृत्व निरीह बन्दा यस्तो भइरहेको छ । एन्फाले आचार  संहिता बनाएको छ । त्यसमा कसले के गर्ने, के नगर्ने भनेर पनि लेखिएको छ । प्रशिक्षक अल्मुताइरीले त्यसको पालना नगरिरहँदा पनि एन्फा नेतृत्वले उनलाई लगाम लगाएको छैन । बरु एउटा कर्मचारीसामु पूरा एन्फा निरिह देखिएको छ ।

अल्मुताइरीले आचार संहिताविपरीत सुरुमै एन्फा पदाधिकारीहरुले फुटबल विकासमा सोच्नुपर्ने भन्दै विवादास्पद अभिव्यक्ति दिएका थिए । 

यसअघिको नेपाली टोली जित्नको लागि भन्दा विदेश घुम्नका लागि जाने भन्दै नेपाली फुटबलमा जीवन समर्पित गरेका खेलाडी तथा पदाधिकारीहरुको अपमान गरे । 

पछि निक्कै आलोचना भएपछि यस विषयमा उनले माफी माग्नुपर्‍यो । वरिष्ठ उपाध्यक्ष नेम्वाङका कारण आफुले राजीनामा दिनुपरेको बताए । एन्फामा राजीनामा दिन जाँदैछु भने । तर राजीनामा दिएनन् । 

त्यसपछि साउन १५ गते एन्फा कार्यसमिति बैठक बसेर प्रशिक्षक र उपाध्यक्षबीचको विवाद समाधानका लागि युवा तथा खेलकुद मन्त्रालय पठाउने निर्णय गर्‍यो । 

त्यसपछि अल्मुताइरीले एन्फामा उजुरी दिँदै साउन २६ गतेसम्म विवाद टुंगो नलागे नेपाल छाड्ने चेतावनी दिएका थिए । तर उनको त्यो भाका नाघेको पनि धेरै भइसक्यो । उनले पद छाडेका छैनन् ।

राखेपद्वारा गठित छानबिन समितिले भदौ ९ गते प्रतिवेदन सार्वजनिक गर्‍यो । प्रतिवेदनको निष्कर्ष सार्वजनिक भएलगत्तै अल्मुताइरीले ‘आफु हट्ने र राजनीतिले काम गरोस्’ भनेर अभिव्यक्ति दिए । जुन उनको पछिल्लो अभिव्यक्ति हो । 

पछि हटेँ भनेर सामाजिक सञ्जालमा अभिव्यक्ति दिए पनि अल्मुताइरीले पोखरामा कुनै पनि दिन प्रशिक्षण रोकेनन् । पटक पटक पदबाट राजीनामा दिन्छु भन्ने तर नदिने । एन्फालाई घुर्काउने मात्र उनको रणनीति देखिन्छ । 

नेपाली फुटबल अहिले महत्वपूर्ण क्षणमा छ । भदौ १७ र २० गते भारतविरुद्ध मैत्रीपूर्ण खेल खेल्दैछ । त्यसपछि माल्दिभ्समा साफ च्याम्पियनसिप खेल्दैछ । साथै चीनमा हुने एएफसी एसियन कपको तयारी गरिरहेको छ । यस्तो अवस्थामा उनका स्टन्टबाजीले टिमलाई फाइदा भन्दा घाटा नै बढी हुन्छ ।