काठमाडौं । कम्प्युटरमा आधारित सरकारी लेखा प्रणाली (सिगास) अपग्रेड गर्ने क्रममा समस्या देखिएको छ । सरकारको लेखापाल मानिने महालेखा नियन्त्रकको कार्यालयले खर्च भुक्तानी तथा राजस्व प्राप्तिको विवरण सूचना प्रविधिमा आधारित बनाउने क्रममा समस्या देखिएको हो ।

महालेखाले सिगास प्रयोगलाई व्यापाक विस्तार गर्ने गरी चालू आवको सुरुदेखि नै काम थालेको थियो । सिगास गत आवदेखि आंशिक रुपमा प्रयोग गर्न थालिएको छ । महालेखा नियन्त्रकको कार्यालयका कामलाई डिजिटल बनाउने क्रममा समस्या देखिएको कार्यालयका प्रवक्ता ज्ञानेन्द्र पौडेलले बाह्रखरीलाई जानकारी दिए ।

उनका अनुसार महालेखाले प्रयोग गर्ने २-३ वटा सिस्टमलाई इन्टिग्रेट गर्न लाग्दा समस्या देखिएको हो । उनले भने, “सिस्टम अपग्रेड तथा रिफर्म गर्दै छौं । जसका लागि गत शनिबार सबै प्रणाली अवरुद्ध गरेका थियौं । त्यसयता आंशिक रुपमा बनाउँदै, देखिएका कमी कमजोरी सच्याउँदै गएका छौं ।” पौडेलले १ सातामा सबै प्राविधिक समस्या समाधान हुने दाबी पनि गरे ।

महालेखाको कामलाई पूर्ण डिजिटल बनाउने क्रममा कार्यालय चालू वर्ष उल्लेख्य सुधारको काम गर्ने जनाएको छ । 

महालेखा नियन्त्रक गोपीनाथ मैनाली भन्छन्, “कम्प्युटरमा आधारित सरकारी लेखा प्रणालीको प्रयोग व्यापाक बनाउने क्रममा समस्या देखिएको छ । समस्या देखिएको करिब एक महिनाजति भइसकेको छ ।” जसकारण कतिपय निकायका कर्मचारीलाई तलब पठाउन पनि पाइएको उनले बताए ।

मैनालीका अनुसार कार्यालयका कर्मचारीलाई समस्या ठीक पार्न अहोरात्र खटाइएको छ ।

कार्यालयले गत शनिबार बिहान ७ देखि १० बजेसम्म पावर मेन्टेनेन्स तथा एकल खाता कोष प्रणाली, सिगास, विद्युतीय भुक्तानी प्रणालीलगायत प्रणाली सञ्चालन गर्न कार्यालयले ल्याएको सबै प्रणाली अवरुद्ध गरेको थियो ।

सिगासलाई अपग्रेड गर्ने क्रममा आएको समस्याले असार महिनाको पेन्सन पठाउन समस्या भएको थियो ।

महालेखाको काम-कारबाही सुधार गर्ने क्रममा चालु आवदेखि सिगास प्रयोगलाई व्यापकता दिनेसमेत सबै सरकारी भुक्तानी विद्युतीय बनाइनेछ । यस्तै वार्षिक २० लाख रुपैयाँसम्म कारोबार गर्ने साना करदाताले बैंकमार्फत कर भुक्तानी गर्ने र आय विवरण बुझाउन सक्ने विद्युतीय प्रणाली कार्यान्वयनमा आइसकेको छ ।

यस्तै दुई वर्षमा सबै सरकारी भुक्तानी विद्युतीय बनाउने सरकारको योजना छ । अहिले एकचौथाइ भुक्तानी विद्युतीय हुने गरेको छ । संख्याका आधारमा दुईतिहाइ भुक्तानी विद्युतीय हुन्छ । यस्तो भुक्तानी तलबभत्तादेखि ठूलाठूला भुक्तानीसमेत पर्छन् ।