सत्तारुढ नेपाल कम्युनिस्ट पार्टी (नेकपा) का दुई घटक पूर्व एमाले र माओवादीबीच एकीकरण प्रक्रिया एक पाइला अघि बढेको छ । एमाले र माओवादीबीच भागबन्डा गरेरै भए पनि जिल्ला तहको नेतृत्व तोकिएको छ । देशका ७७ जिल्लामध्ये एमालेलाई ४४ र माओवादीलाई ३३ जिल्लामा अध्यक्ष पद दिइएको छ । साथै एउटा घटकको अध्यक्ष भएका जिल्लामा अर्को घटकको सचिव रहने गरी भाग मिलाइएको छ । जिल्ला तहको नेतृत्वपछि अरू पदहरूमा पनि भागबन्डा गरिने संकेत यसले दिएको छ । संसदीय लोकतन्त्र दुई दलीय व्यवस्थातर्फ उन्मुख भयो भने त्यसले स्थिर सरकार दिनसक्ने सम्भावना बढ्छ । यद्यपि, एकीकृत भएको नेकपा(नेकपा) अधिनायकवादतर्फ उन्मुख हुने जोखिम पनि छ । 

नेकपा (नेकपा) का दुवै घटकले चुनावमा पार्टी एकीकरण गर्ने वाचा गरेका थिए । त्यसलाई उनीहरूले पूरा गरे । दलका नेताले चुनावी वाचा पूरा गर्दामात्रै पनि नेपाली राजनीतिमा त्यसको सकारात्मक प्रभाव पर्नसक्छ । सत्तारुढ नेकपा (नेकपा)का अध्यक्ष तथा प्रधानमन्त्री केपी शर्मा ओलीले पार्टीको किचलोमा धेरै ध्यान दिन नपरे राजकाजमा बढी समय बिताउन पाउनेछन् । सायद, अहिलेका लागि नेकपा एकीकरणबाट नेपाली जनताले पाउने पहिलो फाइदा यही हो । पार्टीभित्र पदको सबालमा केही किचलो हुनु स्वाभाविकै हो । केही नेताको असन्तुष्टि निकट भविष्यमै प्रकट भयो भने पनि आश्चर्य मान्नु पर्दैन । तर, निश्चित पद्धतिमा मानवीय दृष्टिकोणसहित पार्टी सञ्चालन गर्नु चुनौतीपूर्ण हुन्छ । नेकपालाई पनि यान्त्रिक पद्धतिमा चलाउन खोजियो भने दुर्घटना हुनसक्छ भन्ने दलका नेताहरूले पक्कै बुझेका छन् ।  

एकीकरणको घोषणामा शीर्ष नेता द्वयको अभिव्यक्ति भने पार्टीका कार्यकर्ताबाहेक अरूका लागि खासै उत्साहप्रद रहेन । प्रधानमन्त्री ओलीको दम्भ र घोचपेचबाट जनता आजित भइसकेका छन् । आत्मश्लाघा त छँदैछ प्रधानमन्त्री ओलीमा अरूलाई हेप्ने र होच्याउने प्रवृत्ति पनि बढ्दै गएको छ । यस्तै अर्का अध्यक्ष पुष्पकमल दाहालको ’षड्यन्त्रको सिद्धान्त’लाई पनि अब कार्यकर्ताबाहेक अरूले पत्याउन छाडेका छन् । पार्टी र त्यसभित्रका गुटहरूको भागबन्डा मिलाउन नसकेर ढिलो भएको पार्टी एकीकरणमा ‘देशी विदेशी प्रतिक्रियावादी’को हात रहेको बताउँदा जनताले पक्कै पत्याउँदैनन् । यसैले पार्टीका शीर्ष नेताहरूले दम्भ र ‘कौवा चातुर्य’ प्रदर्शन गर्न छाड्नु बुद्धिमानी हुनेछ । सिर्जनशील र सभ्य संस्कार प्रदर्शन गर्दा पनि सत्तारुढ दलको प्रभाव वा वैधता कमजोर हुँदैन बरु बढ्छ । नेकपाको पूर्ण एकीकरण चाँडै सम्पन्न होस् र त्यसले नेपाली जनताको स्वतन्त्रता र नेपालको लोकतन्त्र व्यापक एवं बलियो बनाउन योगदान गरोस् । शुभकामना !