काठमाडौं । यूनाइटेड अरब इमिरेट्स (यूएई) विरुद्ध एकदिवसीय र ट्वान्टी–२० अन्तर्राष्ट्रिय शृंखला जितेर नेपाली राष्ट्रिय क्रिकेट टोली सोमबार स्वदेश फर्किएको छ । एकदिवसीय अन्तर्राष्ट्रिय मान्यता पाएपछि नेपालले खेलेको यो दोस्रो शृंखला हो । त्यसैले अन्तर्राष्ट्रिय क्रिकेटमा नेपाली टोली र खेलाडीको प्रदर्शनमा कीर्तिमान बन्नु स्वभाविक हो । त्यसका बाबजुद यूएईमा यूवा खेलाडीले गरेको प्रदर्शनले नेपाली क्रिकेट टोलीको भविष्य पनि राम्रो रहेको संकेत गरेको छ । 

ट्वान्टी–२० र एकदिवसीय अन्तर्राष्ट्रिय शृंखलाका लागि नेपालको १६ सदस्सीय टोली यूएई गएको थियो । १६ मध्ये चार खेलाडीले पहिलोपटक राष्ट्रिय टोलीमा स्थान बनाएका थिए । कप्तान पारस खड्का, ज्ञानेन्द्र मल्ल, बसन्त रेग्मीबाहेक टोलीमा प्राय सबै यूवा खेलाडी थिए । यसले नेपाली क्रिकेट अब विस्तारै नयाँ पूस्ताको हातमा जादैछ भनेर पनि देखाएको छ । 

पूस्ता हस्तान्तरणतर्फ उन्मुख रहेको यस्तो महत्वपूर्ण अवस्थामा यूवा पूस्ताले यूएईमा आफुलाई प्रमाणित गर्नु नेपाली क्रिकेटको सबैभन्दा सुखद पक्ष हो । दुबई यात्राको पहिलो खेल बिर्सनलायक बन्यो । फितलो ब्याटिङका कारण नेपाल पहिलो एकदिवसीय अन्तर्राष्ट्रिय खेलमा ३ विकेटले पराजित भयो । तर, त्यसपछि खेलका नेपालले उत्कृष्ट पूनरागमन गर्दै ऐतिहासिक सफलता हात पा¥यो । प्राय सबै खेलमा यूवा खेलाडीको भुमिका महत्वपूर्ण रह्यो । 

दोस्रो एकदिवसीयमा रोहितकुमार पौडेलले उत्कृष्ट ब्याटिङ गरेपछि नेपालले यूएईलाई सम्मानजनक लक्ष्य दिन सफल भएको थियो । ५५ रनको योगदान गरेका रोहितकुमार पौडेलले सचिन तेन्डुलकर र साहिद अफ्रिदीको नाममा रहेको कीर्तिमान तोड्न सफल भए । उनी एकदिवसीय अन्तर्राष्ट्रिय क्रिकेटमा अर्धशतक पूरा गर्ने सबैभन्दा कान्छा खेलाडी बने । त्यस्तै पारस खड्कापछि नेपाली टोलीको कप्तानी सम्हाल्ने सम्भावित खेलाडीको सूचीमा रहेका सोमपाल कामी एकदिवसीय अन्तर्राष्ट्रिय खेलमा एकै इनिङमा पाँच विकेट लिने पहिलो नेपाली खेलाडी बने । कप्तान पारस शतक बनाउने पहिलो नेपाली खेलाडी बन्दा सन्दीप जोरा ट्वान्टी–२० अन्तर्राष्ट्रियमा अर्धशतक बनाउने सबैभन्दा कान्छा खोलडी बने । 

पहिलो पटक टोलीमा पर्न सफल चार नयाँ अनुहारमध्ये तीन खेलाडीले डेब्यू गरे । अभिनास बोहरा, सन्दीप जोरा र पवन सर्राफले राष्ट्रिय टोलीमा डेब्यू गर्दा यूएईविरुद्ध भिम सार्की भने बेन्चमै सिमित रहे । खेलेका मध्ये पवनको प्रदर्शन अपेक्षाकृत हुन नसके पनि अभिनास र सन्दीपले आफुलाई प्रमाणित गरेका छन् ।  अभिनासले तीन ट्वान्टी–२० खेलमा महत्वपूर्ण ५ विकेट लिए । पहिलो खेलमा १, दोस्रो खेलमा ३ तथा तेस्रो खेलमा २ विकेट लिएका अभिनास ट्वान्टी–२० अन्तर्राष्ट्रिय शृंखलामा ‘प्लेयर अफ दी सिरिज’ घोषित भए । सन्दीप जोराले पहिलो ट्वान्टी–२० खेलमा अविजित ५३ रन बनाए । उनी ट्वान्टी–२० अन्तर्राष्ट्रिय खेलमा अर्धशतक बनाउने सबैभन्दा कान्छा खेलाडी पनि बने । सान्दीपले एकदिवसीय र ट्वान्टी–२० गरी चार खेलमा १ सय १ रन बनाए । पवन सर्राफ भने यस शृंखलामा फ्लपजस्तै रहे । 

यूवा खेलाडीको प्रदर्शनका कारण सधै कमजोर देखिने नेपालको ब्याटिङ यूएईमा सुधारिएको हो की भन्ने देखिएको छ । यसअघि नेपाली ब्याटिङ प्रायजसो कप्तान पारस खड्का, शरद भेषावकर र ज्ञानेन्द्र मल्लको वरिवरि अडिएको हुन्थ्यो । तर, यस भ्रमणमा नेपाली टोली त्यो मानसिकताबाट बाहिर आएको देखिन्छ ।

गत मार्चमा जिम्बाब्वेमा सम्पन्न विश्वकप छनोट २०१८ मा स्कटल्यान्ड, नेपाल र युएईले एकदिवसीय अन्तर्राष्ट्रिय मान्यता पाएको थियो । पहिलो पटक एकदिवसीय अन्तर्राष्ट्रिय मान्यता पाएपछि नेपालले नेदरल्यान्ड्ससँग दुई खेलको एकदिवसीय अन्तर्राष्ट्रिय शृंखला खेलेको थियो । जुन १–१ को बराबरीमा टुंगिएको थियो । त्यसपछि नेपालले युएईविरुद्ध खेलेको हो । 

एकदिवसीय अन्तर्राष्ट्रिय मान्यता पाएको लगभग एक वर्ष सकिन लागेको छ । अब नेपालसँग ३ वर्षमात्र बाँकी हुन्छ । यस्तो अवस्थामा नेपालले सक्दो धेरै खेल खेल्नु आवश्यक छ । जति धेरै खेल खेल्यो त्यति नै नयाँ खेलाडीले मौका पाउने र टोली भित्र पर्नका लागि प्रतिस्पर्धा बढ्दै जाने संकेत यूएई भ्रमणले दिएको छ । 

सरकारी निकाय यही एउटा सफलता दंग परेर बस्नुभन्दा जतिसक्दो चाडो नेपाल क्रिकेट संघ (क्यान) विवाद सल्टाएर नेपाली क्रिकेटलाई दिर्घकालिन निकास दिनतर्फ केन्द्रित हुनुपर्छ । क्यान विवाद लम्बियो र नेपाली क्रिकेटले दिर्घकालिन निकास पाएन भने नेपालको यो सफलता पानीको फोकाजस्तै हुने निश्चत छ । 

यूएईमा ऐतिहासिक सफलता हासिल गर्नुका बाबजुद नेपाली क्रिकेट टोलीको ओपनिङ समस्या भने अझै सुल्झिन सकेको छैन । नेपाली टोलीले लामो समयदेखी ब्याटिङतर्फ ओपनिङ जोडीमा धेरै प्रयोग गरिसकेको छ । तर अहिलेसम्म सफलता हात परेको छैन । मध्यक्रमका ज्ञानेन्द्र मल्लले ओपनिङमा आफ्नो स्थान सुरक्षित गरे पनि उनले भरपर्दो जोडी भेट्टाउन सकेका छैनन् । यूएई भ्रमणमा एकदिवसीयमा ज्ञानेन्द्रलाई साथ दिएका विनोद भन्डारी पूर्ण असफल जस्तै बने । उनले तीन खेलमा ३५ रन मात्र जोड्न सके । 

ट्वान्टी–२०मा कप्तान पारस खड्का आफै प्रदीप ऐरीसँग नयाँ बल खेल्न आए । तर प्रदीप ऐरी पनि सफल भएनन् । दूई खेलमा मौका पाएका प्रदीपले ८ रन मात्र जोड्न सके । अन्तिम खेलमा पवन सर्राफले मौका पाए । उनी पनि रनको खाताको नखोली पवेलियन फर्किए । त्यसैले नेपाली टोलीलाई अझै ओपनिङ जोडीको समस्या टाउको दुखाई बनेको छ ।

यूएई भ्रमणमा मध्यक्रममा ब्याट्सम्यान दीपेन्द्रसिंह ऐरीको प्रदर्शन पनि अपेक्षाकृत हुन सकेन । उनले दोस्रो ट्वान्टी–२० अन्तर्राष्ट्रियमा अवितिज ४७ रन बनाए पनि बाँकी खेलमा दोहोरो अंकमा रन बनाउनका लागि संघर्ष गर्नु प¥यो । दीपेन्द्रसिंह पनि पारसपछि कप्तानी पाउने खेलाडीको सूचीमा छन् ।