काठमाडौं । युनाइटेड अरब इमिरेट्स (यूएई) विरुद्धको दोस्रो एकदिवसीय अन्तर्राष्ट्रियमा १ सय ४५ रनको सहज जित निकालेको थियो । नेपाली क्रिकेट टिमका कप्तान पारस खड्काले निर्णायक तेस्रो खेलमा पनि सोही लयलाई निरन्तरता दिन प्रयास गर्ने बताएका छन् । 

पहिलो खेलमा कमजोर ब्याटिङका कारण यूएईलाई ३ विकेटको नतिजा सुम्पिएको नेपालले दोस्रो खेलमा १ सय ४५ रनको सहज विजय हासिल गरेको थियो । नेपालले यूएईविरुद्धको तेस्रो तथा अन्तिम एकदिवसीय अन्तर्राष्ट्रिय खेल सोमबार दुबईस्थित आईसीसी एकेडेमी ओभलमा खेल्नेछ । 

“शनिबार हामी राम्रो नतिजा निकाल्न सफल भयौं । तर सोमबार नयाँ दिन हो । नयाँ खेल हो । त्यसैले यूएईले पनि पूनरागमनका लागि सक्दो प्रयास गर्नेछ । त्यसैले हामी सकरात्मक क्रिकेट खेल्नेछौं । जुन लयमा खेलिरहेका छौं त्यसलाई निरन्तरता दिने प्रयास गर्नेछौं,” क्रिकेटिङ नेपालसँगको कुराकानीमा नेपालका कप्तान पारस खड्काले भने, “हिजो हामीले राम्रो नतिजा निकाल्यौं भनेर त्यसमा रमाएर बस्ने अवस्था छैन । राम्रो क्रिकेट खेल्नुपर्छ । शृंखला जित्नका लागि भोली एकपटक फाइनल पन्च दिनुपर्छ ।”

लामो समयदेखी नेपालले ब्याटिङमा समस्या झेल्दै आएको थियो । त्यसैले पहिलो खेलमा नेपालले ब्याटिङ लाइनअफमा केही परिवर्तन गरेको थियो । मध्यक्रममा खेल्ने विनोद भण्डारीलाई ओपनिङ गराएको थियो भने बलिङ अलराउन्डर सोमपाल कामीलाई ‘टु डाउन’मा ब्याटिङ गराएको थियो ।तर नेपालको त्यो रणनीति प्रभावकारी भएन । नेपाल ३ विकेटले पराजित भयो । दोस्रो खेलमा विनोदलाई ओपनरमै खेलाए पनि सोमपाललाई तल्लो क्रममा खेलाएको थियो भने थप एक ब्याट्म्यान थपेको थियो । बसन्त रेग्मीको स्थानमा रोहितकुमार पौडेललाई टोलीमा स्थान दिएको थियो । 

उनै रोहितकुमारले ५५ रन बनाउँदै आरिफ शेखसँग छैटौं विकेटका लागि ८२ रनको साझेदारी गरेपछि नेपाल सम्मानजनक स्कोर बनाउन सफल भएको थियो । ओपनर ज्ञानेन्द्र मल्ल र विनोद भन्डारीले पहिलो विकेटका लागि ६१ रनको साझेदारी गर्दै त्यसको जग हालेका थिए । ब्याट्सम्यानको प्रदर्शनमा सोमपाल (५ विकेट) र सन्दीप लामिछाने (४ विकेट)ले उत्कृष्ट बलिङ प्रदर्शन गरेपछि नेपाल सहज जित निकाल्न सफल भएको थियो । 

सोमबार हुने तेस्रो खेलमा पनि दोस्रो खेलकै टोलीलाई निरन्तरता दिने हो भन्ने प्रश्नमा पारसले भने, “त्यो अहिल्यै केही भन्न सकिँदैन । भोलि बिहानको पिचको अवस्था कस्तो हुन्छ, त्यसले टोलीको निर्धारण गर्छ । राम्रो नतिजाका लागि एकरुपको प्रदर्शनलाई निरन्तरता दिन आवश्यक छ । हामी राम्रो क्रिकेट खेलेर जसरी हुन्छ जित्ने प्रयास गर्नेछौं ।”

आइतबार रोहितकुमार सबैभन्दा कम उमेरमा अर्धशतक पूरा गर्ने कीर्तिमान बनाएका छन् । भने सोमपाल कामी एकदिवसीय अन्तर्राष्ट्रियमा पाँच विकेट लिने पहिलो नेपाली खेलाडी बनेका छन् । कप्तान पारसले नेपालमा प्रतिभावान खेलाडी भए पनि मौका नपाएको बताए । 

“नेपालमा धेरै प्रतिभावान खेलाडी छन् । तर उनीहरुसँग आफ्नो क्षमता देखाउने माध्यम पाएका थिएनन्,” दी नेशनलसँगको कुराकानीमा पारसले भने, “तर नेपालले एकदिवसीय अन्तर्राष्ट्रिय मान्यता पाएकाले अब त्यो मौका पनि जुरेको छ । आशा छ, खेलाडीसँगै टिमले पनि राम्रो गर्दै जानेछ ।”

यूएईका प्रशिक्षक डोउगी ब्राउनले तेस्रो एकदिवसीय अन्तर्राष्ट्रिय जित्नका लागि ब्याट्सम्यानले राम्रो प्रदर्शन गर्नुपर्ने बताएका छन् । पहिलो खेल तीन विकेटले जिते पनि १ सय १४ रनको लक्ष्य पूरा गर्नेक्रममा यूएईले ७३ रन जोड्दा ७ विकेट गुमाइसकेको थियो । दोस्रो खेलमा २ सय ४३ रनको लक्ष्य पछ्याएको घरेलु टोली यूएईले ९७ रन जोड्दा सबै विकेट गुमाएको थियो ।

“हामीले अभ्यास गर्दा जस्तौ खेलिरहेका छौं, खेलमा त्यस्तो प्रदर्शन गर्न सकेका छैनौं । अभ्यासमा केटाहरुले राम्रो ब्याटिङ गरिरहेका छन् । तर त्यसलाई खेलमा लागु गर्न सकेका छैनन् ।  सम्वेदनशिल भएर ब्याटिङ नगरेपछि यस्तो अवस्था आउछ,” नेपालले आइतबार गरेको प्रदर्शनबारे दी नेशनलसँग यूएईका प्रशिक्षक ब्राउनले भने, “हामी अभ्यासमा खेलेजस्तो उनीहरुले त्यस्तै खेलेका छन् । धैर्यता देखाएका छन् । दबाब चिरेर खेलेका छन् । त्यसैले उनीहरु सफल भए । मलाई थाहा छ, हामी पनि त्यस्तो खेल्न सक्षम छौं । तर हामीले धैर्य भएर खेल्नु पर्छ । अभ्यसमा जसरी खेलेका छौं त्यसलाई खेलमा उतार्न सक्नुपर्छ ।”

यूएईका मुख्य ब्याट्सम्यान मध्येका कप्तान रोहन मुस्तफा र रामीज शाहजद निलम्बनमा छन् । पाकिस्तानमा सम्पन्न इमर्जिङ टिम्स एसिया कपमा व्यवस्थापन राम्रो नभएको प्रतिकृया दिएका कारण यूएई क्रिकेट बोर्डले कप्तान मुस्तफासहित दुई सिनियर खेलाडी अहमद राजा र रामीज शाहजदलाई ८ हप्ताका लागि निलम्बन गरेको थियो ।