काठमाडौं । प्रिमियर लिगमा उक्लिएको दोस्रो सिजन लेस्टर सिटीले उपाधि उचाल्छ भनेर कमैले सोचेका थिए । सट्टेबाजहरुको रोजाइमा त लेस्टर पटक्कै थिएन । लेस्टरको पक्षमा ५०००–१ को अड थियो । तर, प्रिमियर लिगमा उक्लिएको सिजन मुस्किलले शीर्ष डिभिजनको हैसियत जोगाएको लेस्टरले लगत्तैको सिजन विश्वलाई नै चकित बनाउँदै उपाधि उचाल्यो, दोस्रो स्थानको आर्सनललाई दश अंकले पछि छाड्दै । 

नेपाली फुटबललाई बेलायती अवस्थासँग दाँज्न पटक्कै मिल्दैन । तर आधारभूत कुरा फुटबलमा सबैतिर उही हो । रेलिगेशनको प्रावधान हटाएर लामो समयपछि सुरु गरिएको ‘ए’ डिभिजन लिगमा यसपाली न्युरोड टिम (एनआरटी) र च्यासल युथ क्लब नवप्रवेशी टोली हुन् । 

एनआरटी शीर्ष डिभिजनमा लामो समय बसिसकेपछि व्यवस्थापनको रोजाइमा ‘बी’ डिभिजनमा झरेको टिम हो । तर च्यासल भने लामो समय ‘बी’ डिभिजनमा ‘मिड टेबल’ को टोलीका रुपमा परिचय बनाएपछि यसै सिजन च्याम्पियन बन्दै ‘ए’ डिभिजनमा उक्लिएको थियो । नेपाली फुटबलमा पुरानो इतिहास बोके पनि च्यासलका लागि ‘ए’ डिभिजन लिग भने नौलो हो । 

त्यसैले पनि च्यासललाई कसैले पनि आँखा लगाएका छैनन्, लेस्टरलाई जस्तै । उपाधि दाबेदारको नाम लिँदा फुटबल पण्डितहरुले लिने नाम हो, थ्री स्टार, मनाङ मर्स्याङ्दी, त्रिभुवन आर्मी क्बल ।

लिगका दुई खेल सकिँदासम्म च्यासलबाट लेस्टरको जस्तो सनसनी अपेक्षा गर्नु व्यवहारिक नलाग्न सक्छ । पहिलो खेलमा मछिन्द्र क्लबसँग गोलरहित बराबरी नतिजा निकालेको टोलीले दोस्रो खेलमा त्रिभुवन आर्मी क्लबलाई १–० को नतिजा सुम्पिएको थियो । “पक्कै पनि यो स्तरमा पहिलो पटक खेल्दा हामीले सुरुआत उत्कृष्ट बनाउन सकेनौं । तर नतिजा बिर्सने हो भने हाम्रो प्रदर्शन सन्तोषजनक थियो । आर्मीसँगको खेलबाट हाम्रो मनोबल उच्च भएको छ । नियमित अभ्यासमा रहने स्टार खेलाडीले भरिपूर्ण टोलीलाई हामीले दोस्रो हाफको पूरा समय दबाबमा राख्यौं । राम्रो खेले पनि दूर्भाग्यका कारण नतिजा सुम्पनुपर्यो । यसबाट आगामी खेलमा थप सुधारको सम्भावना देखिएको छ,” च्यासलका व्यवस्थापक शंकर व्यन्जनकारले भने । 

‘ए’ डिभिजन लिगका लागि च्यासल युथ क्लब ठूलो नाम होइन । तर, प्रिमियर लिगमा लेस्टरले सबैलाई चकित बनाए जस्तै सहिद स्मारक ‘ए’ डिभिजन लिगमा च्यासलले अपत्यारिलो नतिजा निकाल्न सक्ला त ? 

च्यासलले जुन हिसाबले खेलाडी अनुबन्ध गरेको छ, त्यस अर्थमा ललितपुरको रैथाने क्बलले लिगमा जुनसुकै टोलीलाई हराउन सक्ने क्षमता राख्छ । त्यही अनुसारको तयारी थालेको कारण आशावादी रहेको बताउँछन्, व्यवस्थापक व्यन्जनकार । “ए डिभिजन खेल्न धेरै पैसा चाहिने हुनाले हामी सधै ‘बी’ डिभिजनमा अडिएर बस्थ्यौं । तर गतवर्ष हामीले ‘ए’ डिभिजन उक्लने भनेर तयारी थाल्यौं । त्यसमा सफल पनि भयौं,” क्लबका व्यवस्थापक शंकर व्यञ्जनकारले भने, “हामीले ‘ए’ मा पनि च्याम्पियन बन्ने गरी तयारी थालेका छौं । पहिलो दुई खेलमा नतिजा सन्तोषजनक नरहे पनि हामी आगामी दिनमा सुधार गर्छौं । धेरैले हामीलाई नयाँ टिम भनेर कमजोर आँकेका होलान । तर हामी हामी उपाधि दाबेदार टोली हौं । मैदानमा प्रदर्शनबाट हामी आफूलाई प्रमाणित गर्नेछौं । उपाधि जित्नु हाम्रो पहिलो उद्देश्य हो । त्यसो नभए पनि उपाधिका लागि कडा चुनौती प्रस्तुत गर्नेछौं ।”

रोमाञ्चक रुपमा ‘बी’ डिभिजन लिगको उपाधि जितेको च्यासलले ‘ए’ डिभिजनका लागि वरिष्ठ प्रशिक्षक राजुकाजी शाक्यलाई टोलीको जिम्मेबारी दिएको छ । जारी लिगमा सहभागी क्बलका प्रशिक्षकहरुमध्ये सबैभन्दा ठूलो नाम हो, राजुकाजी शाक्य । राष्ट्रिय टोलीका पूर्वप्रशिक्षक शाक्यले नेपाललाई दक्षिण एसियली खेलकुद(साग) मा फुटबलको उपाधि जिताएका थिए । प्रशिक्षक शाक्यले लिगका लागि पनि सन्तुलित टोली बनाएका छन् । राष्ट्रिय टोलीका फरवार्ड विमल घर्तीमगर, देवेन्द्र तामाङ, हेमन्त थापामगरलगायत गौरव बुढाथोकी, अमिर श्रेष्ठ, संजोग राई जस्ता खेलाडी उनीसँग छन् । गोलकिपर दिनेश थापामगर पनि विगतमा मनाङबाट आफूलाई प्रमाणित गरिसकेका खेलाडी हुन् । राष्ट्रिय टोलीका पूर्व फरवार्ड सन्तोष साउखलको आगमनले टोलीमा उत्साह थपेको छ । भर्खरै मात्र च्यासलले रक्षक फ्लोरेन्ट कोएरा (विदेशी खलाडी)लाई अनुबन्ध गरेको छ । जारी लिगको ‘सरप्राइज प्याकेज’ का रुपमा स्थापित हुनका लागि च्यासल अझै अरु दुई जना विदेशी खेलाडी अनुबन्ध गर्ने योजनामा छ । 

“हाम्रो टिम राम्रो बनेको छ । तर अभ्यास गर्ने मैदानको अभाव हुँदा समस्या भइरहेको छ । हामी मात्र होइन विभागीय बाहेक अन्य सबै टोलीलाई अभ्यास मैदानको समस्या छ । अभ्यास महत्वपूर्ण हो । अभ्यासमा सिकेको कुरा नै मैदानमा कार्यान्वयन गर्ने हो । तर अभ्यास गर्ने मैदान नहुँदा समस्या भइरहेको छ,” सन्तोष साउखलको आगमनबाट अन्य खेलाडीको मनोबल पनि बढेको बताउँदै प्रशिक्षक शाक्यले भने, “सिनियर खेलाडी आएकाले अन्यको मनोबल बढेको छ । अहिले लिगमा नतिजा नआए पनि हामीले राम्रो खेलिरहेका छौं । तर अझै केही बिग्रेको छैन । भर्खर दुई खेलमात्र सकिएको छ । त्यसैले आत्तिनु पर्ने केही छैन ।”

लिगमा दाबेदार मानिएका थ्री स्टार र मनाङले सतप्रतिशत नतिजा निकालेका छन् भने त्रिभुवन आर्मी सुखद नतिजाका लागि संघर्ष गरिरहेको छ । यूवा खेलाडीमा भर परेको पुलिस क्लबको प्रदर्शन सन्तोषजनक छैन । दशै तिहारमा लिग स्थगीत हुँदा च्यासलले रुपन्देहीमा राइनोज गोल्डकपको फाइनलमा नेपाल पुलिस क्लबलाई हराउँदै उपाधि उचालेको थियो । प्रशिक्षक शाक्य राइनोज गोल्डकपको उपाधिले पनि टोलीमा मनोबल बढाएको बताए । 

“लिगको बीचमा त्यो प्रतियोगिता खेल्न त नहुने हो । तर ग्राउन्ड अनुभव हुन्छ भनेर हामीले त्यो प्रतियोगितामा भाग लिएका हौं । उपाधि जित्दा हाम्रा खेलाडीको मनोबल बढेको छ,” बेल्जियममा ट्रायल दिन जाने भएपछि विमललाई फुकुवा गरेको बारे प्रशिक्षक शाक्यले भने, “उनलाई बेज्लियमबाट प्रस्ताव आएको छ भन्ने सुनेको छु । राम्रो खेलाडी नहुँदा विपक्षीलाई दबाब कम हुन्छ । तर हामीसँग अरु पनि राम्रा खेलाडी छन् ।”